ويۋلى كىلەمدەر كورمەسى

471
0
بولىسۋ:

ساۋىر ايىنىڭ 25-29 ارالىعىندا ۇلتتىق مۋزەيدە قازاق قول جۇمىسى كىلەمدەرىنىڭ «ويۋلار سىرى»  اتتى كورمەسى وتۋدە. ەكسپوزيتسيياعا قازاقستاندىق جەكە كوللەكتسيياداعى 100-دەن استام كىلەم ۇسىنىلۋدا. 

وسى بىرەگەي ەكسپوناتتىڭ بارلىعى باعزى زاماننان-اق ۇلى دالاداعى قازاق حالقىنىڭ كەيىنگى عاسىرلارداعى داستۇرلى كوركەم مادەنيەتىنىڭ نەگىزىن قۇراعان بەينەلەۋ ونەرىنىڭ لۇپىلى مەن دامۋىنىڭ بىرى ەكەنىنىڭ نانىمدى دالەلى.

كوشپەندىلەر وركەنيەتى بەينەلەۋ ونەرىنىڭ بىلدەكتى تۇرىن جاساعان جوق, الايدا ول كيىز ۇيدى كوركەم بەزەندىرەتىن جابدىقتاردىڭ ەڭ ماڭىزدىسى سانالاتىن بىرەگەي قۇبىلىس كىلەمدى جاساپ شىعاردى. قازاق شەبەرلەرى كيىز ۇيدى بەزەندىرۋ ۇشىن تۇكتى جانە تۇكسىز كىلەم, الاشا, ورنەكتەلگەن باسقۇر توقىعان.

قىزىلوردا, وڭتۇستىك قازاقستان, جامبىل وبلىستارى سىندى وڭتۇستىك ولكە تۇكتى كىلەم توقيتىن داستۇرلى ورتالىق رەتىندە مويىندالعان. تىقىر توقىما ونەرى جاپپاي بارلىق جەردە تارالعان.

تۇكسىز كىلەمدەردىڭ ىشىندە ارابى كىلەم جانە بەس كەستە ەڭ ادەمىلەرى سانالادى. ونىڭ ويۋ كومپوزيتسيياسى ورنەكتى جانە بىرتۇستى جولاقتاردىڭ بىرقالىپتى كەزەكتەسۋى ارقىلى جاسالادى. بۇل جەردە ومىرتقا دەپ اتالاتىن ىرى گۇلورنەكتەر مەن الاباس دەپ اتالاتىن تۇرلى تۇستى ساتىلى جولاقتار ۇساق گەومەترييالىق ورنەكتەرمەن ساتتى ۇيلەسىم تابادى. بەس كەستە دەپ اتالتىن كىلەم مۇيىز بولشەكتەرى بار ۇساق گەومەترييالىق ويۋلارمەن بەزەندىرىلەدى.

جەرگە توسەۋگە ارنالعان تەكەمەتتەر كوركەمدىك اسەرىنىڭ ەرەكشە كۇشتىلىگىمەن, ۇلكەندىگىمەن جانە كوركەمدىگىمەن تاڭعالدىرادى. كومپوزيتسييالاردىڭ سيممەتريياسى مەن ويۋلاردىڭ گرافيكالىق انىقتىعى – كيىز بۇيىمدارىنىڭ كەلەسى تۇرى سىرماققا تان. كيىزدەن جاسالعان توسەنىشتەردىڭ ويۋلارىندا بايلىق پەن داۋلەتتىلىكتىڭ سيمۆولى سانالاتىن قوشقار مۇيىزويۋلاردىڭ ارتۇرلى نۇسقالارى باسىمدىققا يە. الايدا تەكەمەتتەرگە قاراعاندا, سىرماقتاردىڭ ويۋ كومپوزيتسيياسى اعاش, جاپىراق تۇرىندەگى وسىمدىك موتيۆىندەگى شوعىرلانعان ورنەكتەرگە باي.

قابىرعاعا ىلەتىن توقىلعان تۇسكيىزدەر دە كوپتۇستىلىگىمەن, وسىمدىك ستيلىندەگى ويۋ-ورنەكتەردىڭ كوپتىگىمەن,بايلىعىمەن, تالعامدىلىعىمەن ەرەكشەلەنەدى. ولاردى بارقىتتان, شۇعادان نەمەسە جىبەكتەن تىگەتىن بولعان. وتباسىلىق باقىتتى كورسەتەتىن تۇسكيىز كىلەمدەردىڭ باسقا تۇرلەرى سيياقتى قالىڭدىق جاساۋىنىڭ مىندەتتى بولىگى سانالعان.

بۇگىندە ويى جانە ورىندالۋ تەحنيكاسى تەرەڭ كونە سۋرەتتەردىڭ تۇتاستىعىنان تۇراتىن كانوندى قازاق كىلەمدەرىنىڭ تولىققاندى كوللەكتسيياسىن جاساقتاۋ قيىن ارى قىمبات. كورمە بىر الاڭنان ەلىمىزدىڭ كىلەم توقۋشى ەڭ ۇزدىك شەبەرلەردىڭ قولدارىنان شىققان كىلەمدەردى كورۋگە تاماشا مۇمكىندىك بەرەدى.

 

انار قونىس,

سۋرەت: سوۆەتبەك ماعزۇموۆ.

 

 

 

بولىسۋ: