تۇركىستان جاسىل جەلەككە اينالادى

340
0
بولىسۋ:

تۇركىستان قالاسىن سۋلاندىرۋ ماقساتىندا جارامسىز بولىپ قالعان 150 جۋىق تىك ۇڭعىمالار قايتا قالپىنا كەلتىرىلمەك. سونداي-اق, كەنتاۋ قالاسى ايماعىنان كەلەتىن كانالدىڭ بولىگىن بەتونمەن قاپتاۋ ارقىلى مول مولشەردە اعىن سۋ ۇنەمدەلەدى. تۇركىستان ماگيسترالدى كانالىن دارييادان سۋعا تولتىرۋ ۇشىن 3 كوتەرمەلى ناسوس قويۋ جانە ماشينالىق كانال سالۋ ارقىلى قوسىمشا 80 ملن. م3 اعىن سۋ جەتكىزىلەدى. بۇل تۋرالى ماجىلىس دەپۋتاتتارىنىڭ قاتىسۋىمەن وتكەن «سۋارمالى جەرلەردى تيىمدى پايدالانۋدىڭ وزەكتى ماسەلەلەرى» اتتى كوشپەلى جيىنىندا ايتىلدى.

تۇركىستاندا قر پارلامەنت ماجىلىسى اگرارلىق ماسەلەلەر كوميتەتىنىڭ «سۋارمالى جەرلەردى تيىمدى پايدالانۋدىڭ وزەكتى ماسەلەلەرى» اتتى كوشپەلى وتىرىسى وتتى. وتىرىسقا قر پارلامەنت ماجىلىسى اگرارلىق ماسەلەلەر كوميتەتىنىڭ دەپۋتاتتارى, قر اۋىل شارۋاشىلىعى مينيسترلىگىنىڭ وكىلدەرى, جامبىل, قىزىلوردا, الماتى وبلىسى اكىمدەرىنىڭ ورىنباسارلارى مەن اۋىل شارۋاشىلىعى سالاسىنىڭ باسشىلارى, اۋدان, قالا اكىمدەرىنىڭ ورىنباسارلارى مەن اۋىل شارۋاشىلىعى تاۋار وندىرۋشىلەرى قاتىستى.

شارادا كوكساراي سۋ رەتتەگىشى مەن بوگەن سۋ قويماسىنىڭ جۇمىسىمەن جانە شارۋا قوجالىقتارىنىڭ سۋارمالى جەردى تيىمدى پايدالانۋ اياسىندا وسىرىپ وتىرعان باۋ-باقشالارى تانىستىرىلدى. سونداي-اق, سۋارمالى جەردى ۇلعايتۋ جوبالارى مەن جەردى تيىمدى پايدالانۋدىڭ وزەكتى ماسەلەلەرى تالقىلاندى.

كوشپەلى وتىرىس 2 كۇنگە جوسپارلاندى. بىرىنشى كۇنى سۋ نىساندارىنىڭ جۇمىسىمەن جانە سۋارمالى جەردى تيىمدى پايدالانىپ وتىرعان شارۋا قوجالىقتارىمەن تانىسسا, ال ەكىنشى كۇنى 100-دەن اسا اۋىل شارۋاشىلىعى قىزمەتكەرلەرى مەن تاۋار وندىرۋشىلەرى قاتىسۋمەن وتىرىس وتتى.

جيىندا تۇركىستان ايماعىنداعى 63,3 مىڭ گا سۋارمالى جەردى سۋمەن قامتاماسىز ەتەتىن جالعىز سۋ نىسانى «بوگەن» سۋ قويماسى ارقىلى جەتكىزىلەتىن, ۇزىندىعى 145 شاقىرىم قۇرايتىن تۇركىستان ماگيسترالدى كانالدىڭ جاعدايى قارالدى.

سونىمەن قاتار, تۇركىستان ماگيسترالدى كانالىن تولىعىمەن اعىن سۋمەن قامتاماسىز ەتۋ ۇشىن, سىردارييا وزەنىنەن سۋ وتكىزۋ قابىلەتى 20م3/سەك, 3 كوتەرمەلى ناسوس ستانتسيياسى, ۇزىندىعى 53,2 شق (و.ى. 20,7 شق – جەر ارىق, 17 شق – ترۋبا,15,5 شق بەتوندى) بولاتىن ماشينالىق كانال سالۋ ناتيجەسىندە, قوسىمشا 80 ملن. م3 اعىن سۋ جەتكىزىلەدى.

بۇدان باسقا, سىيىمدىلىعى 16 ملن.تەكشە مەتر قۇرايتىن «كەڭساي-قوسقورعان 2» سۋ قويماسىن سالۋ ۇسىنىلدى. سونىمەن قوسا, كەنتاۋ قالاسىنىڭ ايماعىندا ۇزىندىعى 54,8 شاقىرىم بولاتىن تۇركىستان ماگيسترالدى كانالدىڭ بولىگىن بەتونمەن قاپتاۋ جۇمىستارىن جۇرگىزۋ ارقىلى 60 ملن. م3 فيلتراتسييالىق اعىن سۋدى ۇنەمدەۋ كۇتىلۋدە.

ايتا كەتەيىك, تۇركىستان قالاسىن سۋمەن قامتاماسىز ەتۋدە جەر بەتى سۋلارىمەن قاتار, جەر استى سۋلارىنىڭ ماڭىزى زور. قازىرگى تاڭدا, جارامسىز بولىپ قالعان 145 دانا تىك ۇڭعىمالاردى قايتا قالپىنا كەلتىرۋ ارقىلى 34,7 ملن. م3 اعىن سۋمەن قامتاماسىز ەتۋگە مۇمكىندىك بەرىلمەك. ناتيجەسىندە, جىلىنا قوسىمشا 3755,0 ملن. تەڭگەنىڭ اۋىل شارۋاشىلىعى ونىمدەرى وندىرىلىپ, 1500 جاڭا جۇمىس ورنى اشىلادى. 189,7 ملن. م3 اعىن سۋ تاپشىلىعىن شەشۋگە قول جەتكىزىلەدى.

تەلمان بەيسەنوۆ,
تۇركىستان وبلىسى

بولىسۋ: