مامين «رجد» توراعاسىن قابىلدادى

408
0
بولىسۋ:

اسقار مامين «رجد» ااق باس ديرەكتورى, باسقارما توراعاسى و. بەلوزەروۆپەن كەزدەسۋ وتكىزدى.

قازاقستان رەسپۋبليكاسىنىڭ پرەمەر-مينيسترى اسقار مامين «روسسييسكيە جەلەزنىە دوروگي» كومپانيياسىنىڭ باس ديرەكتورى, باسقارما توراعاسى و. بەلوزەروۆپەن كەزدەسۋ وتكىزدى. ماسەلەنى تالقىلاۋعا قر يندۋسترييا جانە ينفراقۇرىلىمدىق دامۋ مينيسترى ر. سكليار, «قازاقستان تەمىر جولى» ۇلتتىق كومپانيياسىنىڭ باسقارما توراعاسى س. مىڭباەۆ قاتىستى.

كەزدەسۋ بارىسىندا قازاقستان مەن رەسەيدىڭ كولىك-لوگيستيكالىق جۇيەلەرى اراسىنداعى ىنتىماقتاستىقتى ودان ارى تەرەڭدەتۋ جانە كەڭەيتۋ, بىرلەسكەن ترانزيتتىك الەۋەتتى دامىتۋ جانە جولاۋشىلار مەن جۇك تاسىمالداۋدىڭ تيىمدىلىگىن ارتتىرۋ ماسەلەلەرى قارالدى.

«رجد» ااق باس ديرەكتورى و. بەلوزەروۆ قازاقستاندىق ارىپتەستەرمەن وزارا قارىم-قاتىناس رەسەيلىك تەمىر جول جۇيەسى ۇشىن اسا ماڭىزدى ەكەنىن اتاپ وتتى. ەلدەر اراسىنداعى جۇك تاسىمالى سوڭعى ۋاقىتتا ايتارلىقتاي ۇلعايدى.

– وسى جىلدىڭ قاڭتار–ناۋرىز ايلارىندا ترانزيتتىك تاسىمالدار وتكەن جىلدىڭ سايكەس كەزەڭىمەن سالىستىرعاندا 51 پايىزعا ارتتى, جانە بىز ىنتىماقتاستىقتى كەڭەيتە تۇسۋگە نيەتتىمىز, — دەدى و. بەلوزەروۆ.

2018 جىلى قازاقستان مەن رەسەي اراسىنداعى جۇك تاسىمالداۋ كولەمى 2017 جىلمەن سالىستىرعاندا 467,7 مىڭ تونناعا ارتىپ, 85,4 ملن توننانى قۇرادى. بيىلعى ى توقساننىڭ قورىتىندىسى بويىنشا جۇك تاسىمالدارىنىڭ كولەمى 21 ملن توننانى قۇرادى.

قر پرەمەر-مينيسترى ا. مامين قازاقستاننىڭ وزارا تيىمدى شارتتارمەن سىندارلى ىنتىماقتاستىقتى كەڭەيتە تۇسۋگە نيەتتى ەكەنىن اتاپ وتتى. سونىمەن بىرگە, قر ۇكىمەتىنىڭ باسشىسى «بىر بەلدەۋ, بىر جول» جوباسىنىڭ اياسىندا ەكى ەلدىڭ تەمىر جول جۇيەلەرىنىڭ بىرلەسىپ قاتىسۋىنىڭ ۇلكەن الەۋەتىن ايتىپ وتتى.

جالپى العاندا, تاراپتار قازىرگى وزارا ىس-قيمىلدى نىعايتۋدى جالعاستىرۋعا جانە ىنتىماقتاستىقتىڭ جاڭا بىرلەسكەن باعىتتارىن ىسكە اسىرۋ جونىندەگى جۇمىستاردى جانداندىرۋعا نيەت بىلدىردى.

«ايقىن» اقپارات

بولىسۋ: