دينارا زاكيەۆا, بالالار قۇقىعىن قورعاۋ كەڭەسى توراعاسىنىڭ ورىنباسارى: بالاعا بەي-جاي قاراماساق ەكەن…

350
0
بولىسۋ:

ەكى اي بۇرىن رەسپۋبليكالىق Nur Otan پارتيياسى جانىنان بالالار قۇقىعىن قورعاۋ كەڭەسى قۇرىلعان بولاتىن. جاڭادان اشىلسا دا, بالالاردىڭ قۇقىعى مەن قاۋىپسىزدىگىن قامتاماسىز ەتۋ ماسەلەسىن دەرەۋ قاراستىرۋعا كىرىستى. كەڭەس توراعاسىنىڭ ورىنباسارى دينارا زاكيەۆامەن ومىردىڭ گۇلى – بالالار جايلى تىلدەسىپ, ماسەلەلەردى شەشۋ جولدارىنا توقتالدىق.

– اڭگىمەمىزدىڭ باسىن «باقىتتى وتباسى» جول كارتاسىنان باستاساق. ماقساتى مەن مىندەتتەرى قانداي?
– بۇل جوبا كۇللى قازاقستان بويىنشا ىسكە اسىرىلىپ جاتىر. بۇرىن قاناتقاقتى جوبا رەتىندە بىر­نەشە ايماقتا باستاعان ەدىك. سو­نىڭ ناتيجەسى قۋانتىپ, ەندى اۋ­قىمىن كەڭەي­تۋدى كوزدەپ وتىرمىز. مينيستر­لىكتەر مەن ۇكىمەتتىك ەمەس ۇيىم وكىل­دەرىنەن قۇرالعان ەكسپەرتتىك توپ بو­لىپ ايماقتارعا ىسساپارعا شى­عامىز. بالالار قۇقىعى قالاي قور­عالىپ جاتىر, وڭىردەگى احۋال قانداي دەپ زەرتتەۋ جۇرگىزەمىز? ماسەلەن, اق­مولا وبلىسىنداعى شورتاندى اۋى­لىندا بالالاردىڭ بارى جۇزۋگە قا­تىسادى ەكەن. ششۋچينسكتەگى بالالار ۇيىندە اتا-اناسىز بالالاردىڭ سانى – بار بولعانى التاۋ. قالعاندارىن اتا-انالارى بىر اپتاعا نە بىر تۇنگە قالدىرىپ كەتەدى ەكەن. وسىلايشا, ول جەر بۇگىندە وتباسىن قولداۋ ورتالى­عىنا اينالىپ وتىر. جول كارتاسىنىڭ ۇسىنىستارىنا وزىمىز بارىپ, ارالاعان مەكەمەلەردىڭ تاجىريبەسىن ەنگىزەمىز. سونىمەن بىرگە, «بالاعا ارنالعان قالا» جوباسىن جول كارتاسىنا قوسىپ وتىرمىز. ويتكەنى بالالارعا ارنالعان ينفراقۇرىلىمدار, سونىڭ ىشىندە بالالار الاڭى, الاڭقايلار, قاۋىپسىز اۋماقتار بولۋىن قاداعالاۋ كەرەك ارى جاسوسپىرىمدەرگە كەرى اسەر ەتىپ, جامان ادەت جۇقتىرۋى مۇمكىن ورىنداردىڭ مەكتەپتەن الىس جەردە ورنالاسۋى تيىس. وسىعان قاتىستى ارنايى جۇمىس اتقارىلادى. Nur Otan پارتيياسىنىڭ قوعامدىق قابىلداۋلارى بويىنشا بىرىڭعاي الەۋمەتتىك تەرەزەلەر اشىلعانىن بىلەسىزدەر. بۇل جوبا «حالىققا كومەكتىڭ» اياسىندا ىسكە اسىرىلىپ وتىر. بۇگىندە 2500 وتىنىش ساتتى شەشىلگەن. سونىڭ بىرقاتارى جۇمىسپەن قامتۋ جانە بالالاردى بالاباقشاعا ورنالاستىرۋ ەكەن. سونىمەن قاتار بىزدىڭ كەڭەس مۇشەلەرى جۇزەگە اسىراتىن جوبالار دا بار. ايتالىق, قازاقستاننىڭ ىسكەر ايەلدەرى «جاردەم» جوباسىن قولعا الدى. مۇنىڭ اياسىندا دەكرەتتە وتىرعان ايەلدەر قوسىمشا ماماندىق يگەرە الادى. كوبىنە ۇيدە وتىرىپ ىستەي بەرەتىن مانيكيۋر, ماسساج, اسپازدىقتى وقىپ الادى. مەكەمەلەرگە ترانسفورماتسييا شارالارىن جۇرگىزىپ, قىزمەت اياسىن كەڭەيتكىمىز كەلەدى. مىسالى, جاستار رەسۋرستىق ورتالىق­تارىنىڭ بازاسىندا وتباسىن قولداۋ ورتالىقتارىن اشۋدى جوسپارلاپ وتىرمىز. ارنايى بىلىم العان ما­ماندار ەش شارالارعا قاتىناسپايتىن جاستارمەن جۇمىس ىستەيتىن out rich جۇيەسىن ەنگىزەمىز دەگەن جوسپار بار. ويتكەنى اتالعان توپ ومىردە اداسۋى ابدەن مۇمكىن. سونىڭ الدىن الۋىمىز كەرەك. ولارمەن تىلدەسىپ, قىزىعۋشى­لىقتارى تۋرالى سۇراپ, وز جولىن تابۋعا باعىت بەرەدى. مىسالى, سپورت سەكتسييالارىنا جازىلۋعا كەڭەس بەرۋى مۇمكىن.
– شىنى كەرەك, بۇگىندە وتباسىن­داعى زورلىق-زومبىلىق ماسەلەسى ورشىپ تۇر. كۇنى كەشە تۇركىستان وبلىسىندا وگەي انانىڭ ۇش قىزىنا كورسەتكەن قورلىعىن ەستىپ, جانىمىز تۇرشىكتى. مۇنداي جاعدايدى بولدىرماۋ ۇشىن نە ىستەۋ كەرەك?
– وتباسىندا زورلىق بار-جوعىن انىقتاۋ وڭاي ەمەس. الدىن الۋ ۇشىن بىرنەشە شارالار ەنگىزۋدى جوسپارلاپ وتىرمىز. بىرىنشىسى – سەنىم تەلەفو­نىنا «111» نومىرى بويىنشا حابار­لاسىپ, جاعدايدى ايتۋ. جەلى بىرنەشە جىلدان بەرى ىستەپ كەلەدى. مىسالى قاڭتاردا 800 ادام, ناۋرىزدا 2000 ادام حابارلاسقان. سەنىم تەلەفونىنا شىققان ەڭ كىشكەنتاي بالانىڭ جاسى ۇشتە ەكەن. سويتسەك, ۇيدە جالعىز قالىپ قويىپتى. بارلىق وڭىرلەرگە اقپارات تاراتىپ, بالالار­دىڭ وز قۇقىعىن بىلۋ كەرەگىن ايتىپ جۇرمىز. مەكتەپتەردە دە ونداي مالى­مەت ىلىنىپ تۇر. بالالار عانا ەمەس, اتا-انالار دا سەنىم تەلەفونى بار ەكەنىن بىلسە دەيمىز. ويتكەنى كور­شى­لەرى نەمەسە تۋىستارى زورلىق كورسە­تىلىپ جاتقانىن بىلسە, بىزگە ايتسىن. ەشكىم بەيجاي قاراماسا ەكەن. شىنىندا, كورشىنىڭ ۇيىندە نە بولىپ جاتقانىن كوبى بىلەدى. تەك ارالاسقىسى كەلمەيدى. قاراپ تۇرساڭىز, بار بول­عانى بىر نومىردى بەرىپ, حابارلاۋ عانا. ودان كەيىنگى ماسەلەمەن ۋچاسكەلىك پوليتسييا اينالىسادى. وتباسى باقى­لاۋعا الىنادى. ۆەدومستۆوارالىق بايلانىستىڭ دا مۇندايدا ماڭىزى زور. مەكتەپتەگى پسيحولوگ, پەداگوگ, ۋچاسكەلىك پوليتسييا قىزمەتكەرى – بارى بىرلەسىپ جۇمىس ىستەۋى كەرەك. بىزدىڭ كەڭەسكە بارلىق مەملەكەتتىك ورگاندار مەن ۇكىمەتتىك ەمەس ۇيىمدار مۇشە. سەبەبى, بارلىعىمىز كۇش بىرىكتىرسەك, قولىمىزدان كوپ نارسە كەلەدى. ەل بويىنشا اۋقىمىمىز ۇلكەن, وتباسى ماسەلەسىن شەشە الاتىن الاڭنىڭ پروتوتيپى بولىپ وتىرمىز. بۇگىندە مەملەكەت الەۋمەتتىك الجۋاز توپتارعا كوپ كومەك بەرەدى. دەگەنمەن كوپشىلىگى بۇدان بەيحابار. وسىنى ەسكەرە وتى­رىپ, ارنايى بروشيۋرالار ازىرلەدىك. وندا تولىق اقپارات بار. بروشيۋرا­لاردى ار ۇيگە تاراتىپ شىققىمىز كەلەدى. سول ۇشىن ۇيدى-ۇيدى ارالاپ, ار وتباسىنىڭ قولىنا جەكە تابىس­تايمىز. ەلىمىزدەگى بۇكىل وتباسىنىڭ احۋالىمەن تانىسىپ, كىمنىڭ كومەككە زارۋ ەكەنىن بىلسەك دەيمىز. وسىدان بارىپ الدا قانداي شارالار اتقارى­لاتىنىن, قالاي دامۋ كەرەگىن, ورىن العان جاعدايلاردى وڭتايلى شەشۋ ادىستەرىن انىقتايمىز.

بولىسۋ: