گاۋحار الدامبەرگەنوۆا, قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى, پروفەسسور: ەلباسى سەنىمى – ەل دامۋىنىڭ كەپىلى
– Nur Otan پارتيياسىنىڭ كەزەكتەن تىس XIX سەزىندە ەلباسى نۇرسۇلتان نازارباەۆ قازاقستان پرەزيدەنتتىگىنە كانديدات رەتىندە قاسىم-جومارت توقاەۆتى ۇسىندى. بۇل ەگەمەندىك جىلدارىنداعى تاريحي ساتتەردىڭ بىرى دەپ قابىلدايمىن جانە ۇتىمدى تاڭداۋ دەپ بىلەمىن.
وتانداستارىمىز قاسىم-جومارت كەمەلۇلىن ەگەمەندىكتىڭ ەلەڭ-الاڭ جىلدارىنان بەرى تۇڭعىش پرەزيدەنت نۇرسۇلتان ابىشۇلىنىڭ سەنىمدى سەرىكتەسى, شاكىرتى رەتىندە بىلەدى. سوندىقتان دا مەملەكەتتىڭ نەگىزىن قالاعان تۇلعانىڭ ەلىمىزدىڭ دامۋىنا وزىندىك ۇلەسىن قوسىپ كەلە جاتقان بىلىكتى ساياساتكەرگە قازاق ەلىنىڭ تاعدىرىن سەنىپ تاپسىرعانى جانە ۇلكەن جاۋاپكەرشىلىك جۇگىن ارتقانى – ەل بولاشاعىنىڭ باعدارىن ايقىنداپ بەرگەنى دەپ تۇسىنەمىز.
بۇگىندە ىرگەلى باستامالارعا ۇيىتقى بولىپ وتىرعان Nur Otan پارتيياسىنىڭ اتىنان تۇسەتىن ۇمىتكەر وتكەنىمىزدى ۇمىتپاي, بولاشاقتى ۇلىقتاۋعا وزىندىك ۇلەس قوسىپ, ەل ازاماتتارىنىڭ كوڭىل ۇدەسىنەن شىعاتىنىنا كامىل سەنىمدىمىز.
ەلباسى ەگەمەندىك جىلدارى قازاقستاننىڭ الەمدىك ساحناداعى بەدەلى مەن ورنىن ايقىنداپ, دامۋدىڭ قازاقستاندىق ۇلگىسىن قالىپتاستىردى. بۇل كەزەڭدە حالىقتىڭ ال-اۋقاتى ارتىپ, تۇرمىس دەڭگەيى كوتەرىلدى. جۇرتشىلىق ۇشىن جاعىمدى, جاقسى ۇردىستى ودان ارمەن جالعاستىرۋ بۇگىندە ۇلكەن ماڭىزعا يە. بۇل تۇرعىدا ق.توقاەۆ – قازاقستاننىڭ تۇڭعىش پرەزيدەنتىنىڭ ساليقالى ساياساتىن ودان ارمەن جالعاستىرا الاتىن بىردەن-بىر ساياساتكەر.
قاسىم-جومارت كەمەلۇلى – الەمدىك ساياسات ساحناسىندا دا وزىندىك دارا ورنى بار, ديپلوماتييانىڭ قىر-سىرىن تەرەڭ مەڭگەرگەن تۇلعا. بۇل قاسيەتتەر قازاقستاننىڭ بۇگىنگى ابىرويىن اسقاقتاتىپ, بەدەلىن ودان ارى كوتەرۋگە ىقپال ەتپەك.
