جوعارى تەحنولوگييانى جەتىلدىرەدى

502
0
بولىسۋ:

Nur Otan پارتيياسىنىڭ ورتالىق اپپاراتىندا پارتييا كۋراتورى, ماجىلىس دەپۋتاتى البەرت راۋدىڭ جەتەكشىلىگىمەن جوعارى تەحنولوگييالاردى دامىتۋ جونىندەگى كوميسسييانىڭ وتىرىسى وتتى. كەزدەسۋگە ماجىلىس دەپۋتاتتارى, يندۋسترييا جانە ينفراقۇرىلىمدىق دامۋ مينيسترلىگى, قازاقستاندىق يندۋسترييانى دامىتۋ ينستيتۋتى, «عىلىم قورى» اق جانە ۇكىمەتتىك ەمەس ۇيىم وكىلدەرى قاتىستى.

كوميسسييا وتىرىسىندا قازاقستاندا كوممەرتسييالاندىرۋ جانە تەحنولوگييالاردى بەرۋ تەتىكتەرى ارقىلى يننوۆاتسييالىق ونىمدەردىڭ ۇلەسىن ارتتىرۋ ماسەلەلەرى تالقىلاندى.
جيىندى اشقان پارتييا كۋراتورى البەرت راۋ عىلىم مەن تەحنيكانى ترانس­فەرتتەۋدى كوممەرتسييالاندىرۋ بىلىمگە نەگىزدەلگەن ەكونوميكانىڭ قالىپتاسۋىنا, وندىرىسكە عىلىمي زەرتتەۋلەردى ەنگىزۋگە جانە يننوۆاتسييالىق ونىمدەردى جاساۋعا ىقپال ەتەتىنىن اتاپ وتتى.
– عىلىمي ناتيجەلەردى كوممەرتسييا­لاندىرۋ, ولاردى ەكونوميكالىق اينالىمعا تارتۋ ماڭىزدى. باستى ماقساتى­مىز – عىلىمدى كوممەرتسييالاندىرۋدىڭ قار­قىندى دامۋى ۇشىن بارلىق جاعداي جاساۋ. سونىڭ ىشىندە زاڭنامالىق بازانى قۇرۋ اسا ماڭىزدى, – دەيدى البەرت راۋ.
باسقوسۋدا بايانداما جاساعان ين­دۋسترييا جانە ينفراقۇرىلىمدىق دامۋ ۆيتسە-مينيسترى ا.ەرجانوۆ قازىرگى كەزدە يننوۆاتسييالىق ساياساتتى ىسكە اسىرۋ قۇرالدارىنىڭ بىرى تەحنولوگييالىق دا­مۋدىڭ ۇلتتىق ينستيتۋتى جۇزەگە اسىراتىن يننوۆاتسييالىق گرانتتار بەرۋ ەكەنىنە ەرەكشە توقتالدى.
بۇل جوبا اياسىندا 2011 جىلدان باستاپ 2019 جىلدىڭ 1 اقپانىنا دەيىن جالپى سوماسى 18,7 ملرد تەڭگەگە 356 كەلىسىمشارت الۋشىلارمەن گرانت بولىندى. بۇل گرانتتار 11 باسىم باعىتقا بولىندى. ونىڭ ىشىندە ەڭ كوبى اقپاراتتىق-كوممۋنيكاتسييالىق تەحنو­لوگييالار سالاسىنا (69), ال ەڭ ازى نانو جانە عارىشتىق تەحنولوگييا سالاسىنا تيەسىلى (1).
تالقىلاۋ كەزىندە «عىلىم قورى» اق باسقارما توراعاسى ا.سۇلتانعازين جوعارى تەحنولوگييالاردى دامىتۋ بويىنشا اتقارىلعان جۇمىستارعا ساراپ­تاما جاسادى.
– بۇگىنگى كۇنى 6 جوبا اياقتالدى. 34 جوبانى بيىلعى جىلدىڭ سوڭىنا دەيىن اياقتاۋ جوسپارلانۋدا. ال 2020 جىلعا دەيىن 52 جوبا اياقتالادى. 2019 جىلدىڭ I توقسانىندا 31 جوبادان تاۋارلار مەن قىزمەتتەردى ساتۋدان تۇسەتىن تابىس 955 ملن تەڭگەدەن استى.
كۇن تارتىبىن تالقىلاۋ بارىسىندا جينالىسقا قاتىسۋشىلار عىلىمي-تەحني­كالىق قىزمەتتىڭ ناتيجەلەرىن كوممەرتسييا­لاندىرۋ بويىنشا جوبالاردى قارجىلان­دىرۋعا, كوممەرتسييالاندىرۋ جوبالارىنا, جاس عالىمدارعا ارنالعان گرانتتارعا جانە ەل وڭىرلەرىندە يننوۆاتسييالىق بەلسەندى­لىكتىڭ تومەن دەڭگەيىنە بايلانىستى بىرقاتار ماڭىزدى ماسەلەلەردى انىقتادى. كەزدەسۋ قورىتىندىسى بويىنشا تيىستى مەملەكەتتىك جانە جەرگىلىكتى اتقارۋشى ورگاندارعا ۇسىنىستار جولداندى.

ابىلايحان جۇماش

بولىسۋ: