پرەمەر تۇركىستانداعى قۇرىلىستى كۇندىز-تۇنى جۇرگىزۋدى تاپسىردى

895
0
بولىسۋ:

ۇكىمەت باسشىسى اسقار مامين تۇركىستان قالاسىنا ارنايى ساپارمەن كەلىپ, قۇرىلىسى قارقىندى جۇرىپ جاتقان نىساندارمەن تانىستى. 17 نىساندى ارالاعان قر پرەمەر-مينيستر قۇرىلىستاردى بەلگىگەنگەن مەرزىمدە اياقتاۋ ۇشىن تىپتەن تاۋلىك بويى اۋىسىممەن توقتاتپاي جالعاستىرۋدى مىندەتتەدى. ول وبلىس ورتالىعىن سۋلاندىرۋ جوباسىن قولداپ, جول قۇرىلىسىنىڭ قارقىنىن كوردى. سونداي-اق, ۇكىمەت باسشىسى تۇركىستان قالاسىنىڭ 2019–2020 جىلدارعا ارنالعان كەشەندى قۇرىلىس جانە دامىتۋ جوسپارىن ىسكە اسىرۋ ماسەلەلەرى جونىندە جيىن وتكىزدى.

قر پرەمەر-مينيسترى اسقار ماميننىڭ تۇركىستان وبلىسىنا جۇمىس ساپارىنىڭ باستى ماقساتى,  قر تۇڭعىش پرەزيدەنتى – ەلباسى نۇرسۇلتان نازارباەۆتىڭ تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندە بەرگەن تاپسىرمالارىنىڭ ورىندالۋ بارىسىن باقىلاۋ جانە بيىلعى 23 ناۋرىزدا وڭىرگە جۇمىس ساپارى اياسىندا كەلگەن قر پرەزيدەنتى قاسىم-جومارت توقاەۆتىڭ بەرگەن تاپسىرمالارىنا سايكەس قالا قۇرىلىسىن جالعاستىرۋدىڭ كەشەندى ماسەلەلەرىن قاراستىرۋ.

ۇكىمەت باسشىسى ساپار اياسىندا الدىمەن قالانىڭ اكىمشىلىك-ىسكەرلىك ورتالىعىندا وبلىس اكىمدىگى, باسقارمالار مەن دەپارتامەنتتەر عيماراتتارى, مەديا ورتالىق, كونگرەسس-حولل سالىناتىن قۇرىلىس الاڭدارىندا بولدى. قالا قۇرىلىسىنىڭ باسىم باعىتى – الەۋمەتتىك ماڭىزداعى نىسانداردى: ستاديون, وقۋشىلار سارايىن, حالىققا قىزمەت كورسەتۋ ورتالىعىن سالۋ. مۋزىكا مەكتەبىن, باسسەينى بار سپورت سارايىن, وبلىستىق عىلىمي-امبەباپ كىتاپحانا سالۋ جوبالارى دايىندىق ساتىسىندا تۇر. حالىقتىڭ قولايلى ومىر سۇرۋىن قامتاماسىز ەتۋ ماقساتىندا وڭىردى اباتتاندىرۋ نىساندارىن دايىنداۋ جۇمىستارى جۇرگىزىلۋدە, ولار: تۇڭعىش پرەزيدەنت پاركى, اتتراكتسيوندارى بار قالا ساياباعى, مۋزىكالىق فونتان, امفيتەاتر, اربات. بارلىق قۇرىلىس جۇمىستارى كەستەگە سايكەس جۇرگىزىلىپ جاتىر جانە بەلگىلەنگەن مەرزىمدە اياقتالادى.

قر پرەمەر-مينيسترى ا. مامين جۇمىس ساپارى اياسىندا وبلىس ورتالىعىنىڭ كىرۋ قاقپالارىمەن قالانى بايلانىستىراتىن ب. ساتتارحانوۆ داڭعىلىنىڭ ۋچاسكەسىن تەكسەردى, ونى رەكونسترۋكتسييالاۋ جۇمىستارى جۇرگىن بولىكتى 18 مەترگە دەيىن كەڭەيتۋگە مۇمكىندىك بەرەدى. قر ۇكىمەتىنىڭ باسشىسى تۇركىستان قالاسىنىڭ ماڭىندا «جاسىل بەلدەۋ» قۇرۋ, يرريگاتسييالىق جۇيەنى دامىتۋ بويىنشا جۇمىستاردى تەكسەردى. «ارىس – تۇركىستان» كانالىنىڭ رەكونسترۋكتسيياسىنىڭ جانە «ماشيننىي» كانالى قۇرىلىسىنىڭ جوسپارى قارالدى. جوبالاردى ىسكە اسىرۋ سۋاراتىن سۋ تاپشىلىعى ماسەلەسىن تولىق شەشىپ, اۋىل شارۋاشىلىعى ونىمدەرىن وندىرۋدىڭ جىل سايىنعى كولەمىن ارتتىرۋعا مۇمكىندىك بەرەدى. يندۋسترييالىق ايماق اۋماعىن كەڭەيتۋ جانە «TURKISTAN» اەا ىسكە قوسۋ جوبالارى تانىستىرىلدى. ينفراقۇرىلىمدى جولعا قويۋ جەكە ينۆەستيتسييالار اعىمىن تارتۋعا مۇمكىندىك بەرەدى دەپ بولجانعان.

قالانىڭ تاريحي-مادەني بولىگىن دامىتۋعا ەرەكشە نازار اۋدارىلدى. قر پرەمەر-مينيسترى ق. ا. ياسساۋي مۋزەيىنىڭ, تۋريستىك ۆيزيت-ورتالىقتىڭ, تاريحي ساۋلەت فورماسىنداعى شىعىس مونشاسىنىڭ قۇرىلىسى جۇرىپ جاتقان جەرلەردى ارالادى. وڭىر اكىمدىگى «ازىرەت سۇلتان» مۋزەي-قورىعىنىڭ اۋماعىن اباتتاندىرۋ جانە قالاشىقتىڭ تاريحي نىساندارىن رەستاۆراتسييالاۋ جۇمىستارىنىڭ جوسپارىمەن تانىستىردى.

نىسانداردى ارالاۋ قورىتىندىسى بويىنشا قر پرەمەر-مينيسترى اسقار مامين تۇركىستان قالاسىنىڭ 2019–2020 جىلدارعا ارنالعان كەشەندى قۇرىلىس جانە دامىتۋ جوسپارىن ىسكە اسىرۋ ماسەلەلەرى جونىندە جۇمىس كەڭەسىن وتكىزدى.

تۇركىستان وبلىسىنىڭ اكىمى و. شوكەەۆ قۇرىلىس, تاريحي-مادەني نىسانداردى رەكونسترۋكتسييالاۋ, تۇرعىن ۇي ماسەلەلەرىن شەشۋ, ينجەنەرلىك-كوممۋنيكاتسييالىق ينفراقۇرىلىم جۇرگىزۋ, جولداردىڭ ساپاسىن ارتتىرۋ, تۋريزم, اۋىل شارۋاشىلىعى سالالارىن, ارنايى ەكونوميكالىق ايماقتى دامىتۋ قارقىندارى تۋرالى باياندادى.

وسى جىلدىڭ سوڭىنا دەيىن تۇركىستان قالاسىنىڭ اكىمشىلىك-ىسكەرلىك ورتالىعىندا 52 كوپپاتەرلى تۇرعىن ۇي پايدالانۋعا بەرىلەدى, بۇل – 2300-دەن استام پاتەر, ولاردىڭ ىشىندە 1200 وتباسى, سونىڭ ىشىندە 270 از قامتىلعان كوپ بالالى وتباسى «نۇرلى جەر» باعدارلاماسى بويىنشا باسپانامەن قامتاماسىز ەتىلەدى. ۇزىندىعى 82,5 شاقىرىم بولاتىن 69 كوشەنى جوندەۋ, ۇزىندىعى 42,2 شاقىرىمدىق 47 كوشەنى اباتتاندىرۋ, سونداي-اق ۇزىندىعى 12,8 شاقىرىم بولاتىن ۆەلوسيپەد جولىن سالۋ جۇمىستارى باستالدى. وڭىردى گازداندىرۋ ۇشىن 31,1 كم ماگيسترالدىق گاز قۇبىرى سالىنادى, 2020 جىلعا قاراي قالانى تابيعي گازعا 100% قوسۋ كوزدەلگەن. جالپى العاندا, قۇرىلىس جۇمىستارىنا 400-دەن استام تەحنيكا جۇمىلدىرىلىپ, 3500 ادام جۇمىسقا تارتىلعان. جازعى كەزەڭدە قوسىمشا 2500 ادامدى جۇمىسپەن قامتۋ جوسپاردا بار.

تۇركىستان قالاسىنىڭ اۋماعىنداعى جەكەلەگەن نىسانداردىڭ الەمدىك ماڭىزىن ەسكەرە وتىرىپ, كەڭەسكە حالىقارالىق ساراپشىلار توبىنىڭ مۇشەلەرى: دۇنيەجۇزىلىك مۇرا وبەكتىلەرىن ساقتاۋدىڭ جاي-كۇيىن باعالاۋ بويىنشا ەسكەرتكىشتەر مەن وبەكتىلەر جونىندەگى حالىقارالىق كەڭەستىڭ (ICOMOS) اعا ساراپشىسى, پروفەسسور ميحاەل يانسەن (گەرمانييا), CIPA مۇرا قۇجاتتارى جونىندەگى عىلىمي كوميتەتىنىڭ ICOMOS ساراپشىسى, دوكتور ونا ۆيلەيكيس تامايو (كانادا) قاتىستى. قر مادەنيەت جانە سپورت مينيسترى ا. مۇحامەديۇلى ساراپشىلارمەن بىرلەسىپ, ق. ا. ياسساۋي ەسكەرتكىشىنىڭ جاعدايى, بەكىنىس قابىرعاسىن قايتا قالپىنا كەلتىرۋ جانە رەستاۆراتسييالاۋ جۇمىستارىنىڭ كەسەنەنىڭ كورنەكى قابىلدانۋىنا اسەرى زەردەلەنىپ جاتقانىن مالىمدەدى.

«كۇشەيتىلگەن جۇمىس رەجيمىن ەنگىزەمىز», – دەپ ۇكىمەت باسشىسى, «ەكى اپتا ىشىندە قۇرىلىس جۇمىستارىن تاۋلىك بويعى رەجيمگە كوشىرۋدى» تاپسىردى.

نىسانداردى ۋاقىتىلى پايدالانۋعا بەرۋ وڭىردىڭ الەۋمەتتىك-ەكونوميكالىق دامۋىن قامتاماسىز ەتۋگە, قالانىڭ تۇركى دۇنيەسىنىڭ اسا دامىعان مادەني-رۋحاني جانە تۋريستىك ورتالىعى رەتىندە قالىپتاسۋىنا جول اشادى.

تەلمان بەيسەنوۆ,
تۇركىستان وبلىسى

بولىسۋ: