ەسكى مونەتالار اينالىمنان شىقپايدى

818
0
بولىسۋ:

بيىل ۇلتتىق بانك ديزاينى وزگەرتىلگەن نومينالدىق قۇنى 1, 2, 5, 10, 20, 50 جانە 100 تەڭگەلىك مونەتالاردى اينالىمعا شىعاردى. مونەتالاردىڭ ديزاينىن پرەزيدەنت قاسىم-جومارت توقاەۆ ماقۇلداعان.

ۇلتتىق بانكتىڭ مالىمەتىنشە, «2018 جىلعى 29 ماۋسىمداعى №162-VI قرز «قازاقستان رەسپۋبليكاسىنىڭ كەيبىر كونستيتۋتسييالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» قر كونستيتۋتسييالىق زاڭىنا سايكەس قازاقستان رەسپۋبليكاسىنىڭ مەملەكەتتىك ەلتاڭباسىنا وزگەرىس ەنگىزىلدى. وعان سايكەس, مەملەكەتتىك تىلدەگى «قازاقستان» دەگەن سوز لاتىن گرافيكاسىنىڭ نەگىزىندەگى الىپبي پايدالانىلا وتىرىپ «QAZAQSTAN» دەپ جازىلدى. «QAZAQSTAN» دەگەن جازۋى بار مەملەكەتتىك ەلتاڭبانى پايدالانۋ تۋرالى تالاپ 2018 جىلعى 1 قاراشادان باستاپ قولدانىسقا ەنگىزىلدى.  قر مەملەكەتتىك ەلتاڭباسى تەڭگە مونەتالارى ديزاينىنىڭ مىندەتتى ەلەمەنتى بولىپ تابىلاتىندىقتان, ۇلتتىق بانك 2019 جىلعى ۇلگىدەگى ديزاينى وزگەرتىلگەن مونەتالاردى اينالىسقا شىعارۋ تۋرالى شەشىم قابىلدادى. ولارداعى جازۋلار لاتىن گرافيكاسىنىڭ نەگىزىندەگى الىپبي پايدالانىلا وتىرىپ مەملەكەتتىك تىلدە ورىندالعان».

 

اينالىستاعى مونەتالاردىڭ سىرت جاعىندا (رەۆەرسىندە) «QAZAQSTAN» دەگەن سوزى بار مەملەكەتتىك ەلتاڭبا بەينەلەنگەن. «QAZAQSTAN RESPÝBLIKASY» دەگەن جازۋ بار. اينالىستاعى مونەتالاردىڭ بەت جاعىندا (اۆەرسىندە) مونەتالار نومينالىنىڭ تسيفرلىق بەينەلەنۋى, سونداي-اق ۇلتتىق ۆاليۋتانىڭ «TEŃGE» دەگەن اتاۋى مەن شىعارعان بانك اتاۋىنىڭ قىسقارتىلعان بەلگىسى «QUB» (Qazaqstan Ulttyq Banki) بار ماتىندىك جازۋلار ورنالاسقان. 2019 جىلعى ۇلگىدەگى ديزاينى وزگەرتىلگەن نومينالدىق قۇنى 100 تەڭگەلىك اينالىستاعى مونەتالاردىڭ قىرىندا (گۋرتىندا) «JÚZ TEŃGE» دەگەن جازۋ بار.

ۇلتتىق بانك «اينالىستاعى مونەتالاردىڭ تەحنيكالىق جانە زاتتاي ولشەمدەرى: ماسساسى, ديامەترى, قالىڭدىعى, مەتالل قۇيماسى وزگەرىسسىز ساقتالعان. تولەم تەرمينالدارىن جانە باسقا دا كاسسانى قوسىمشا قايتا تەڭشەۋ تالاپ ەتىلمەيدى. ەسكى جانە جاڭا ۇلگىدەگى اينالىستاعى مونەتالار زاڭدى تولەم قۇرالى بولىپ تابىلادى جانە بارلىق تولەم تۇرلەرى بويىنشا قابىلدانۋعا مىندەتتى» ەكەنىن دە اتاپ وتتى.

«ايقىن» اقپارات  

فوتو: ۇلتتىق بانكتىڭ سايتىنان الىندى

بولىسۋ: