БҮГІНГІ ҮЗДІК МАМАН – ЕРТЕҢГІ МЫҚТЫ МАМАН

Елімізде мұнай-газ компаниялары жыл сайын мамандарының білімі мен тәжірибесін жан-жақты саралап, бағалауға мүмкіндік беретін «Үздік маман» атты конкурс өткізеді. Бұл конкурстың негізгі мақсаты – отандық мамандардың өзге елдердің мамандарымен бәсекелес болып, тәжірибелі кәсібилігімен мұнай-газ саласының дамуына үлес қосуына жағдай жасау және жастарды осы салаға мамандандыру.

Осы үрдісті ұстанған «Қаз­ТрансОйл» АҚ «Үздік маман» кон­курсын Атырау қаласында өткізді. Биылғы байқау екі турды қосқанда қатысушылардың рекордтық са­нын жинады және олардың дені – жас мамандар. Конкурстың алғаш­қы турының қортындысымен 2-турға 75 маман өтті.
Конкурстың алғашқы күні «Үздік маман» байқауының екінші турына қатысушыларға жеңіс тілеген салтанатты жиында қатысушыларды «ҚазТрансОйл» АҚ бас директоры (Басқарма төра­ғасы) Димаш Досанов құттықтап, сәттілік тіледі.
«Үздік маман» байқауы – білім мен біліктілікті сынайтын, тәжі­рибе бөлісетін және ше­берлікті шыңдайтын сайыс алаңы. Сіздер өз істеріңізбен конкурстың екінші турына қатысуға лайық екенде­ріңізді дәлелдедіңіздер. Сіздердің араларыңызда осы конкурстың болашақ жеңім­паздары, халықа­ралық кон­курс­тың қатысушылары тұр. Ха­лықаралық дәрежедегі кон­курс осы Атырау жерінде тамыз айында өткізіледі. Сіздердің жо­ғары дең­гейде шеберлік үлгісін көрсе­те­тіндеріңізге сенім біл­ді­ремін», – деді Димаш Ғабитұлы қатысу­шы­ларға арнаған тілегінде.
«КазТрансОйл» АҚ бас дирек­торы, Басқарма төрағасының орынбасары, «Үздік маман» кон­курсының қазылар алқасының төрағасы Сәбит Арынов «Биылғы конкурс қатысушы санының көптігінен рекордтық деңгейге жетті. Қатысып отырған 308 ма­манның 40 пайызы – жас ма­ман­дар. Бұл олардың аға буынның ізбасарлары болып, осы саланы терең меңгеруге талпынып, ма­ман­дығының кәсіби білікті ма­маны болуды мақсатты түрде алға қойғандарын дәлелдеп отыр.
Бұл – қуанарлық жағдай» деп конкурсқа қатысушыларға сәттілік тіледі. Сондай-ақ салтанатты шарада осы салада қырық жыл еңбек еткен ардагер Күләш Уә­лиева да жастардың ынтасына, ма­мандыққа деген сүйспеншілігіне адал болуға, әрқашан кәсіби дең­гейде өсе берулеріне тілектестігін білдірді.
Салтанатты шара аясында компания басшысы Димаш Досанов мұнайқұбыршылардың болашақ буынына арнаған жол­дауын «Достық» футурологиялық капсуласына салып, қатысушы МАТН компанияларына аттан­дырды. Капсуланың қозғалыс бағыты серіктес компанияларды байланыстыратын мұнай құбыры желісімен сәйкес жүреді. Қазақ­станнан – Ресейге, ары қарай Украинаға, Белоруссияға, Сло­ва­кияға, Венгрияға және Чехияға жеткізіледі. Ал Қазақстаннан Қытайға капсуланы аттандыру бөлек бағыт бойынша жүреді. Капсула жолында жоғарыда атал­ған елдердегі мұнай тасымалдайтын компаниялардың бірінші бас­шыларының «Болашақтағы мұнай тасымалы технологиясы» тақы­рыбындағы 8 жолдауын жинайды.

«ҚАЗТРАНСОЙЛ» АҚ «ҮЗДІК МАМАН» БАЙҚАУЫ ЕКІНШІ ТУРЫНЫҢ ЖЕҢІМПАЗДАРЫ:

«Үздік мұнай айдау стансасының операторы»:
• Антон Артюшенко – Павлодар мұнай құбыры басқармасының МАС операторы;
«Үздік химиялық сараптау лаборанты»:
• Айман Сисекенова – Құлсары мұнай құбыры басқармасы «Прорва» МАС химиялық талдау зертханашысы;
«Үздік тауар операторы»:
• Өсер Дәрібай – Атырау мұнай құбыры басқармасы Т.Қасымов атындағы МАС тауар операторы;
«Үздік электргаздәнекерлеуші»:
• Рашид Бақтығалиев – Атырау мұнай құбыры басқармасы ӨҚКБ электргаздәнекерлеушісі;
«Үздік бақылау-өлшеу құралдары және және автоматика слесарі»:
• Айдар Аманғалиев – Атырау мұнай құбыры басқармасы БАЖ учаскесінің БӨА және автоматика слесарі;
«Үздік электромонтер»:
• Антон Ползяков – Атырау мұнай құбыры басқармасы ӨҚКБ электртехникалық жабдықты жөндеу және баптау учаскесінің электрмонтері;
«Үздік технологиялық құрылғыларды жөндеу слесарі»:
• Нұрмұханбетали Лұқпанов – Маңғыстау мұнай құбыры басқармасы ӨҚКБ технологиялық жабдықты жөндеу және баптау учаскесінің тех­нологиялық жабдықты жөндеу және қызмет көрсету жөніндегі слесарі;
«Үздік желілік мұнайқұбыршы»:
• Рүстембек Жылкелдиев – Құлсары мұнай құбыры басқармасы АҚКП желілік құбыршысы.

«ҚазТрансОйл»АҚ бас ди­ректорыныің орынбасары Орал Ыдырысов: «Достық» капсуласына мұнай тасымалдаушы компания­лардың басшылары өздерінің тасымалдау саласында, цифрлан­дыру, технология саласы бойынша мақсаттары мен алда күтілетін үміт­терін, күтілетін өзгерістерін жазып салады. Тамыз айында капсула Атырауға оралып, ха­лықаралық «Үздік маман» конкурсының ашылу салтанатында «Достық» стелласына қойылады. Бірінші басшылардың жолдауы 2023 жылы МАТН-ның 10 жыл­дығы шарасында ашылып, оқы­лады. Міне, сол кезде капсулаға салынған жолдаудағы мақсат­тар, талаптар, міндеттер мен үміттер қаншалықты орындалғаны мәлім болады» деп конкурсқа қатысу­шыларға жеңіс тіледі.
Конкурсқа қатысушы ма­мандар Атырау мұнай құбыры бас­қармасының өндірістік ны­сандары Т.Қасымов және Н.Шма­нов атындағы мұнай айдау стан­саларында сынақтан өтті. Олар «Үздік желілік мұнай құбыршы», «Үздік электргаз дәнекерлеушісі», «Үздік тауар операторы», «Үздік химиялық сараптау лаборанты», «Үздік технологиялық құрыл­ғы­ларды жөндеу слесарі», «Үздік бақылау-өлшеу құралдары және және автоматика слесарі», «Үздік электр жабдықтарын жөндеу және қызмет көрсету электромонтері» және «Үздік мұнай айдау станса­сының операторы» сынды 8 аталым бойынша бақ сынады.
Конкурсқа бағын сынап, тәжірибесін шындауға келген Шымкент мұнай құбыры бас­қармасының тауар операторы ­Бағ­жан Нарпаева – өзіне се­нім­ділік жеңіске жетелейтініне үмітті ма­ман.
– «ҚазТрансОйл» компания­сы – елімізде ғана емес, ТМД ел­деріндегі ең беделді, мақсаты ай­қын, қадамы нық компания. Мен қызмет ететін Шымкент мұнай құбыры басқармасы жылына ор­таша есеппен 5 млн тоннаға жуық мұнайды айдаумен айналысады. Заман талабына сай, жаңа әрі озық технологиялармен қамтылған мұнай құбыр басқармасы толықтай автоматтандырылған. «ҚазТранс Ойл» ұлттық компаниясында жұмыс істеу – мен үшін мәртебе. Ал осы компанияның ең үздіктерімен сынға түсу жетіс­тік­те­рімнің бастамасы деп білемін, – деген Бағжан Нарпаева «Үздік маман» конкурсы, әсіресе, жастар үшін мол тәжірибе жинауға мүм­кіндік беруімен талпындыратынын айтты.
«Үздік маман» конкурсында жеңімпаз болғандар тамыз айында өтетін халықаралық конкурстың сынынан өтуге дайындалады. Сондықтан олар үшін ендігі әрбір тәулік маман ретінде шыңдала беруді талап етеді. Себебі, оларға мұнай тасымалы саласында алатын орны ерекше еліміздің абыройын аспандату, мәртебесін биіктету жауапкершілігі тұр.
Халықаралық конкурс әлемдегі ең ірі мұнай тасымалдаушылар, Халықаралық мұнай тасы­малдау­шылар ассоциациасының (МАТН) құрамындағы ресейлік «Транс­нефть», белорустық «Гомель­­транс­нефть-Дружба», украиналық «Укртранснафта», словакиялық «Транс­петрол», венгрлік MOL және қытайлық CNPC компа­ния­ларының мамандары арасында Атыраудағы «ҚазТрансОйл» АҚ-ның өндірістік нысандарында өткізілмек. Айтарлығы кәсібінің үздік тәжірибелі мамандары бәсекелестікке түсетін халықа­ра­лық деңгейдегі конкурс Қазақ­стан­да тұңғыш рет өткізілгелі отыр.

Тұрсын ЖҰМАБЕКҚЫЗЫ,

Атырау облысы