«زەنيتتىڭ» وتىزىنشى «پەرزەنتى»

653
0
بولىسۋ:

«ورال «زەنيت» زاۋىتى» اق-تىڭ كونۆەيەرىنەن شىققان سۋ جاڭا «نۇر-سۇلتان» كەمەسى شاعان وزەنىنە تۇسىرىلدى. وندىرىس وشاعى وسىمەن وتىزىنشى كەمەنى جاساپ شىعار­دى. 

بۇل جولعى كەمە ۇلتتىق قاۋىپ­سىزدىك كوميتەتىنە قاراستى شە­كارا قىزمەتىنىڭ تاپسىرما­سىمەن جاسالدى. مامانداردىڭ ايتۋىن­شا, جاڭا كەمەنىڭ باسقارۋ جۇيەسى, ورنىقتىلىعى, جۇزۋ جىل­­­­دامدىعى بۇرىنعى «باۋىر­لا­رى­­نا» قارا­عان­دا الدەقايدا جە­تىل­­دىرىلگەن. سونى­مەن قاتار «نۇر-سۇلتانعا» قارۋ-جاراقتىڭ دا وزىق تۇرى ورناتىلعان ەكەن. سۋ جاڭا كەمەنى سۋعا تۇسىرۋگە ارنال­عان سالتاناتتى شاراعا باتىس قا­زاقستان وبلىسىنىڭ اكىمى ال­تاي كولگىنوۆ, ۇقك شەكارا قىز­مەتىنىڭ ديرەكتورى – ۇقك تورا­عاسىنىڭ ورىنباسارى, گەنە­رال-مايور دارحان دىلمانوۆ, «جاعا­لاۋ كۇزەتى» وڭىرلىك باسقار­ماسى مەن «باتىس» وڭىرلىك قولباس­شى­لىعى, «قازاقستان ينجينيرينگ» اق وكىلدەرى جانە قازاقستان قا­رۋلى كۇشتەرىنىڭ ارداگەرلەرى قاتىس­تى.
– ىنتىماق مەيرامى قارسا­ڭىن­دا وڭىرىمىزدىڭ ماقتانىشىنا اينالعان «زەنيت» زاۋىتى ەلىمىز­دىڭ كاسپيي تەڭىزىندەگى شەبىن كۇزەتەتىن تاعى بىر كەمەنى جاساپ شى­­عاردى. اسكەري كەمە شىعارۋ – وتاندىق ونەركاسىپتىڭ وركەن­دەي تۇسكەنىنىڭ ايشىقتى كورى­نى­سى. ەلباسىمىز ن.نازارباەۆتىڭ باس­تاماسىمەن جۇزە­گە اسىپ جات­قان يندۋستريال­دى-يننوۆاتسييا­لىق باعدارلامانىڭ تالابىنا سايكەس, حالىقارالىق ستاندارت­تار­­عا ساي جابدىقتالىپ, جاڭعىر­تى­­لىپ وتىراتىن «زەنيت» زاۋى­تى­نىڭ ۇجىمى جالپىعا ورتاق ەڭبەك قوعامىن قالىپتاستىرۋعا دا ايتۋلى ۇلەس قوسىپ كەلەدى. وسى ۇيىمشىل ۇجىمنىڭ تاعى بىر جاڭا ونىمى – «نۇر-سۇلتان» كە­مە­سى اشىق اسپان اياسىندا وتانى­مىزدىڭ كاسپيي تەڭىزىن­دە­گى شە­بىن قورعاۋعا مىنسىز قىزمەت ەتۋىنە تىلەكشىمىز, – دەدى وبلىس اكىمى التاي كولگىنوۆ.
دارحان دىلمانوۆ «زەنيتتىڭ» كونۆەيىرىنەن شىققان اسكەري كەمەلەر مەن كاتەرلەردىڭ ساپاسى مىقتى ەكەنىن, تىپتى بىزدىڭ كەمە-كاتەر­لەردىڭ تەحنيكالىق مۇمكىن­دىك­تەرىنە يران, ازىربايجان جانە رەسەي سەكىلدى كورشىلەس مەم­لەكەتتەردىڭ وكىلدەرى جوعارى باعا بەرگەنىن تىلگە تيەك ەتتى.
سالتاناتتى شارا بارىسىندا ۇقك توراعاسىنىڭ 2019 جىلعى 23 ساۋىردەگى بۇيرىعىنا وراي «ورال «زەنيت» زاۋىتى» اق-تىڭ باس ديرەكتورى ۆياچەسلاۆ ۆاليەۆ «شەكارانى ۇزدىك كۇزەتكەنى ۇشىن» مەدالىمەن, زاۋىتتىڭ باس تەحنولوگى تيمۋر ترايسوۆ جانە وسى كاسىپورىننىڭ №6 تسەح باس­تى­­عىنىڭ ورىنباسارى نيكو­لاي حامكو ىى دارەجەلى «شەكارا قىز­مە­تىنىڭ ۇزدىگى» مەدالىمەن ماراپاتتالدى.
2006 جىلى وندىرىسكە ەنگىزىل­گەن 0030 «بارىس» جوباسى بويىن­شا شىعارىلعان شەكارالىق «نۇر-سۇلتان» كەمەسى ەندى بىرەر كۇن­دە شاعان وزەنى ارقىلى جا­يىق­ق­ا جەتىپ, سوسىن كاسپيي تەڭى­زى­نە باعىت ۇستايدى. سوسىن ونىڭ ەكيپاجىنا ەلىمىزدىڭ تەڭىزدەگى شەپ-شەكاراسىن كۇزەتۋ, سونداي-اق كونتراباندالىق ارەكەتتەرگە, قاراقشىلىق پەن زاڭسىز بالىق اۋلاۋعا توسقاۋىل بولۋ ارى سۋاستى ديۆەرسانتتارىمەن كۇرەسۋ مىندە­تى جۇكتەلەتىن بولادى.
تاۋلىگىنە 4 توننا سۋدى تۇششى­تۋ­عا قاۋقارلى قوندىرعىمەن جاب­­­دىقتالعان «نۇر-سۇلتان» كە­­مە­سىنىڭ ۇزىندىعى – 42, ال ەنى – 7,8 مەتر. بۇل اسكەري كەمە بيىك­­تىگى 3-5 مەترگە جەتەتىن 7 بال­دىق تولقىن كەزىندە دە تەڭىز بەتىن­دە ەر­كىن جۇزە الادى. بۇعان قوسا بەس بالدىق تولقىندا بارلىق تاپ­سىر­مانى قالتقىسىز ورىنداۋ­عا شاماسى جەتەدى. «نۇر-سۇلتان­نىڭ» ەكيپاجى 27 اسكەري مامان­نان جاساقتالماق, ال مەدي­تسي­نا­لىق كايۋتا ەكى مامانعا ارنال­عان.

باۋىرجان عۇبايدۋللين,

باتىس قازاقستان وبلىسى

بولىسۋ: