ҰЖЫМДА БАҚЫТТЫСЫЗ БА?

241
0
Бөлісу:

Ұжым ортасында өзіңізді бақытты сезінесіз бе? Таңертең жұмыс орныңызға жетуге асығасыз ба? Кәсіби білігіңізді шыңдауға қаншалықты мән бересіз? Бұл сауалды босқа қойып отырғанымыз жоқ. Ұжымдағы атмосфера адамның көңіл күйімен қатар, өндіріс орнының еңбек өнімділігіне де әсер етеді. Сол секілді әрбір адамның көңіл күйі ұжымдағы аураны қалыптастырады. Жұмыста бақытты ұйымдастыру – еңбек өнімділігін көтеру мен табыстың басты кілті.

«Самұрық-Қазына» ұлттық әл-ауқат қорының жылда дәс­түр­лі түрде өтетін HR-конференция­сының биылғы та­қырыбы – «Ба­қыт ұйымдастыру». Кешелі бері халықаралық және отандық HR-сарапшылар қызметкерлерді бас­қару ісіндегі соңғы трендтерді талқылап, отандық жұмыс беру­шілерге ұсыныс жасап жатыр.
«Самұрық-Қазына» ұлттық әл-ауқат қорының басқарма төра­ғасы Ахметжан Есімов жыл сайын өтетін HR-конфе­рен­ция­дан кейін сарап­шылар ұсынған идеяларды ескерусіз қал­дырмай, жүзеге асырудың нәти­жесінде, компания же­місті жұмыс істеп, табысқа кенеліп жатқанын айтады.
«Өткен жылғы конференция­дан соң басшылық қызметке үміткер­лерді ірік­теуді айқын етуді қолға ал­дық. Бұл ретте қордың корпо­ра­тивтік университетіне портфельді компаниялар же­текшілері үшін көшбасшылық бағдарламасын жасап, енгізуді тапсырдым. Нәти­же­­сін­де, өткен жылдың қорытын­ды­сы бо­йын­ша, қорға жүктелген міндеттердің барлығын жүзеге асы­руға қол жеткізілді. Бақытты қыз­мет­кер­лердің еңбек өнім­ділігі – басқа кадрларға қарағанда 12 па­йызға, тиімділігі – 31 пайызға, шығармашылық шешім табудағы бел­сен­­ді­лігі 3 есе жоғары болатыны, аз сырқат­та­на­­тыны дәлелденген. Бүгіндері компаниямызда 320 мың адам еңбек етеді. Елі­­міздегі же­текші салалардың дамуы осы адамдарға тікелей байланысты. Сон­дық­тан осы кадрлардың бақытты болуы үшін барлық жағ­дай­ды қарастыра­мыз. Себебі, қордың ең негізгі капиталы – кадры», – деді қордың бас­қар­ма төрағасы.
Оның айтуынша, қор 2024 жыл­­ға қа­рай Орталық Азияда №1 жұ­мыс беру­ші, ал 2028 жыл­ға қа­рай кеңес­тік кеңіс­тіктегі үздік жұмыс беруші отыз ел­дің қатарына кіруді көздеп отыр.
Тұңғыш ғарышкер, ұшқыш-сынақ­шы Тоқтар Әубәкіров ұжымдағы бақытты ұйым­дас­ты­рудың, жалпы бақытты болудың құпиясымен бөлісті.
«Бақытты ұйымдастыру үшін алды­ңызға мақсат қойыңыз. Мақ­сатты орын­дау үшін көп оқу керек. Оқу-тоқусыз үлкен бақыт­қа жету мүмкін емес. Кәрі де, жас та бақытты болғысы келеді. Бірақ сол бақытты ұйымдастыру оңай емес. Бақыт – ақылың мен біліміңді, қажыр-қайратыңды кәсіби маман болуға жұм­сау, ол үшін айналаңыз­дағы жақсы адамдар­дың қасиетін бойға сіңіріңіз, көптен үйрен, көршіңнен үйрен, әйтеуір оқу-тоқу­ды тоқтатпаңыз. Себебі, бүгінгі әлем – жоғары тех­нологиялар заманы. Өз өмірімнен мысал келті­рейін. Мен жұ­мыс істеп жүрге­нім­де, жек­сен­біде дүй­сенбіні асыға күтетін­мін. Себебі, дүй­сенбіде сүйікті ұшағы­ма отырып, жұ­мы­сымды атқар­ғым келетін. Сынақшы ұш­қыштың жұмысы өте ауыр бо­лады. Менің әріп­тес жолдастарымның көбі аспан­­нан оралмады. Менің ба­қытым – әр ұшқан сайын оралып отырдым. Бұған менің өмір бойы оқу-тоқумен жүргенім ықпал етті деп ойлай­мын. Ұшуды тоқтатсам да оқуды үзбедім, кандидаттық, доктор­лық жұмыста­рым­ды жа­зып, қорға­дым. Себебі, мен осы жасымда да бақытты болғым ке­леді. Нағыз ба­қыт­­ты қаласаңыздар, оқыңыз­дар, ба­қытты болу – өз қолыңыз­да», – деді ғарышкер.
Ал Новосибирск мемлекеттік уни­верситетінің Ақпараттық тех­но­­логиялар факультетінің деканы Михаил Лаврен­тьев ұжымдағы ба­қытты ұйымдас­ты­рудың «Лав­рен­тьев үшбұрышымен» таныс­тырды.
«Ұжымда сенің бір нәрсе жа­сауға деген өзіндік сұранысың, соны жасау мүм­кіндігіңнің болуы және жасаған дү­ниеңе жұмысыңда сұра­ныс­тың болуы, яғни сенің сұраныс­та­ғы кадр болуың – осы үш компо­нен­тті біріктірсе, адам ба­қытты бо­ла­ды. Бұл нәтиже береді», – дейді. Ал сіз ұжымыңызда бақыт­тысыз ба?

Айдана БЕГІМ

Бөлісу: