«Ақ жол» үміткерін ұсынды

359
0
Бөлісу:

Елордада «Ақ жол» демократиялық партиясының кезектен тыс XV құрылтайы өтті. Онда бірнеше делегаттың 9 мау­сымға белгіленген кезектен тыс президенттік сайлауға қатысу туралы шешімі қабылданып, кандидатура ұсынылды. Сондай-ақ партия атынан сайлауға түсетін кандидаттың сайлауалды бағдарламасының жобасы бекітілді.

Ауызша пікірталас пен көпші­ліктің талқылауынан кейін шешуші дауысқа ие 190 деле­гаттар қатысқан құпия дауыс беру жүргізілді. Үміткерді анық­тау бойынша талқылау мен дауыс беруге үш сағаттан астам уақыт кетті.
Құрылтай барысында прези­денттік сайлауға кандидат­тыққа ұсынылған 6 үміткер тіркелді. Олар Өскемен қалалық мәсли­хатының депутаты Қуат Рахым­бер­дин, Тараз қалалық мәсли­хатының депутаты Асан Қош­мам­бетов, Атырау облыстық фи­лиалының өкілі Серік Еру­баев, СҚО филиалының төра­ғасы Евгений Кинцель, Мәжі­ліс депутаты Дания Еспаева және Қазақстан Құрылысшылар ода­ғының төрағасы Талғат Ерғалиев.
Дауыс беру нәтижесінде Дания Еспаева (49,5 пайыз) мен Қазақстан құрылысшылары одағының басшысы, бесінші шақырылымдағы Мәжіліс депу­таты Талғат Ерғалиев (31,6 па­йыз) көш бастады. Алайда 50 па­йыз дауыс жинаған ешкім бол­мады. Сондықтан президиум ақылдасып, үміткерді екінші турды өткізбей-ақ таңдау туралы шешім қабылдады.
Осыдан кейін залда отырған делегаттар таңдауын жасады. Дания Еспаеваны 173 адам қол­дап дауыс берді, ал 15-і қалыс қалды. Көпшіліктің дауысымен Қазақстан тарихында алғаш рет президент сайлауына әйел адам қатысатын болды. Депутат өз кезегінде ел тізгінін қолына ұс­тай қалса, Ұлттық қордағы ақша­ны оңды-солды шашуды тоқта­тып, көпбалалы отбасылар­дың мәселесін шешуге уәде берді.

Әбілмансұр ЖАСАН

Бөлісу: