Жетпіс елдің депутаты жиналады

Елбасының еуразиялық баста­масы шетелдік парламентшілердің де қызығушылығын тудыруда.
Мәжілісте Нұрлан Нығматулиннің төрағалығымен биылғы 23-24 қыркүйекте елордамыз Нұр-Сұлтан қаласында ұйымдастырылатын Еуразия елдері парламенттері төрағаларының IV Кеңесін дайындау және өткізу жөніндегі Ұйымдастыру комитетінің бірінші кеңейтілген отырысы өтті.

Еуразиялық мемлекеттердің Парламент өкілдерінің алдағы кездесуі Қазақстанның Тұң­ғыш Президенті Нұрсұлтан На­зар­­баевтың еуразиялық идеясына 25 жыл толуына арналады және «Үлкен Еуразия: Диалог. Сенім. Серіктестік» тақырыбын арқау етеді.
Бүгінде Елбасының еура­зия­лық бас­тамасы әлемдік деңгейде өзінің тиімділігін және үлкен әле­уетін паш етіп отырғанын атап өткен Мәжіліс төрағасы ха­лықа­ралық парламенттік қоғамдастық Қазақстанның астанасында Еура­зиялық кеңістіктің тұ­рақ­ты дамуын қамтамасыз ету жолдарын және өзекті мәселелерін талқылау мүм­кін­дігіне ынта-ықылас білдіріп отырғанын жеткізді.
Іс-шараға шамамен 70-тей елден деле­гациялар қатысады деп күтілуде. Осыған байланысты Ұйымдастыру комитетінің мүше­лері ірі халықаралық саяси оқиғаға айналғалы тұрған алдағы парла­менттік форумға дайындық мәсе­лелерін қарады.

Айхан ШӘРІП