وزەكتى سالالارعا وزگەرىس قاجەت

2
0
بولىسۋ:

قازاقستان پرەزيدەنتى قاسىم-جومارت توقاەۆ بىلىم جانە عىلىم مينيسترى كۇلاش شامشيدينوۆانى قابىلدادى. مەملەكەت باسشىسىنا بىلىم بەرۋدى جانە عىلىمدى دامىتۋ مەملە­كەتتىك باعدارلاماسىنىڭ جۇزەگە اسىرىلۋ بارىسى باياندالدى.

قاسىم-جومارت توقاەۆ ۇش اۋىسىمدا وقىتۋدى جويۋ, جاڭا مەكتەپتەر سالۋ جانە ۇش تىلدە بىلىم بەرۋگە بىرتىندەپ وتۋ جۇمىستارىن جالعاستىرۋ ماڭىزدى مىندەت ەكەنىن ايتتى.
ك.شامشيدينوۆا تەحنيكالىق جانە كاسىبي بىلىم بەرۋ ىسىنىڭ جاعدايى جانە بيزنەس پەن وقۋ ورىندارىنىڭ اراسىنداعى وزارا ىس-قيمىلداردى جولعا قويۋ شارا­لارى جونىندە ەسەپ بەردى. كەزدەسۋ بارىسىندا جوعارى بىلىمنىڭ ساپاسىن ارتتىرۋعا جانە جوو تۇلەكتەرىنىڭ ەڭبەك نارىعىنداعى سۇرانىسقا ساي بولۋىنا ەرەكشە نازار اۋدارىلدى.
مەملەكەت باسشىسى مەكتەپ مۇعالىم­دەرى مەن جوو وقىتۋشىلارىن ارتىق ەسەپ بەرۋلەردەن ارىلتىپ, پەداگوگتاردىڭ مار­تەبەسىن كوتەرۋگە, عالىمداردى مەملەكەت تاراپىنان قولداۋعا, بىرىنشى كەزەكتە مەملەكەتتىك تىلدە زەرتتەۋلەر جۇرگىزەتىن گۋمانيتارلىق باعىتتاعى عالىمدارعا باسىمدىق بەرۋگە باعىتتالعان ناقتى شارالار قابىلداۋدى تاپسىردى.
مۇنىڭ الدىندا قازاقستان پرەزيدەنتى قاسىم-جومارت توقاەۆ ەڭبەك جانە حالىقتى الەۋمەتتىك قورعاۋ مينيسترى بەردىبەك ساپارباەۆتى قابىلدادى. مەملەكەت باسشىسىنا ەلىمىزدەگى «ەڭبەك» مەملەكەتتىك باعدارلاماسىنىڭ جۇزەگە اسىرىلۋ بارىسى, از قامتىلعان كوپبالالى وتباسىلارعا كورسەتىلىپ جاتقان كومەكتەر بويىنشا جانە جاڭا جۇمىس ورىندارىن اشۋ ارقىلى جۇمىسسىزدىقپەن كۇرەس تۋرالى باياندالدى.
مينيستر كاسىپ اشۋعا گرانتتار, شاعىن نەسيەلەر بەرىلەتىنىن, ماماندىعى جوق ازاماتتاردى قايتا وقىتىپ, جاستار پراكتيكاسى مەن قوعامدىق جۇمىستارعا تارتۋ ارقىلى جىلىنا ورتا ەسەپپەن 370 مىڭ جاڭا جۇمىس ورنىن اشۋ جوس­پار­لانعانى تۋرالى مالىمەت بەردى. قاسىم-جومارت توقاەۆ حالىقتى الەۋمەتتىك قورعاۋعا باعىتتالعان مەملەكەتتىك باعدار­­لامانىڭ ساپالى جۇزەگە اسىرىلۋى ماڭىزدى ەكەنىنە توقتالىپ, اسىرەسە از قامتىلعان كوپبالالى وتباسىلاردىڭ الەۋمەتتىك جاعدايىن جاقسارتىپ, جۇمىس­سىزدىق دەڭگەيىن 4,5%-تەن اسىرماۋ قا­جەتىن تاپسىردى. سونىمەن قاتار ەلى­مىزدەگى مۇمكىندىگى شەكتەۋلى ازاماتتاردى قول­داۋدىڭ ماڭىزىن ايتتى.

بولىسۋ: