ماسكەۋدە باسپاگەرلەردىڭ حالىقارالىق كونفەرەنتسيياسى وتتى

16
0
بولىسۋ:

ماسكەۋ قالاسىنداعى «گيلدييا كنيجنيكوۆ» كوممەرتسييالىق ەمەس سەرىكتەستىگىندە باسپاسوز جانە بۇقارالىق كوممۋنيكاتسييالار بويىنشا فەدەرالدى اگەنتتىكتىڭ قولداۋىمەن «رەسەي مەن ەۋرازييالىق ەكونوميكالىق وداققا قاتىسۋشى ەلدەردىڭ باسپا يندۋستريياسىنداعى اقپاراتتىق-كوممۋنيكاتسييالىق وزارا ىس-قيمىلى» اتتى حالىقارالىق كونفەرەنتسييا وتتى.

كونفەرەنتسيياعا رەسەي كىتاپ پالاتاسى مەن ەاەو قاتىسۋشى ەلدەردىڭ ۇلتتىق كىتاپ پالاتالارىنىڭ, باسپالاردىڭ, كىتاپ ساۋداسى ۇيىمدارىنىڭ باسشىلارى, اقپاراتتىق تەحنولوگييالار, اۆتورلىق قۇقىق جانە زيياتكەرلىك مەنشىك سالاسىنداعى ماماندار, مينيسترلىكتەردىڭ, قوعامدىق ۇيىمدار مەن قورلاردىڭ, كىتاپحانالار, بىلىم بەرۋ جانە عىلىمي قوعامداستىقتاردىڭ, سالالىق باسپاسوزدىڭ وكىلدەرى قاتىستى.

كونفەرەنتسييا رەسەي مەن ەۋرازييالىق ەكونوميكالىق وداققا قاتىسۋشى ەلدەردەگى كىتاپ باسپالارىن دامىتۋعا, باسپا جانە ەلەكتروندى ونىمدەردى تاراتۋعا ارنالعان. حالىقارالىق ەلەكتروندى فورماتتار مەن دەرەكتەر الماسۋ ستاندارتتارى نەگىزىندە كورپوراتيۆتىك ىنتىماقتاستىق جۇيەسىن قۇرۋداعى بىرىڭعاي تاسىلدەردى قالىپتاستىرۋعا, رەسەي كىتاپ پالاتاسى مەن ەۋرازييالىق ەكونوميكالىق وداققا قاتىسۋشى ەلدەردىڭ ۇلتتىق كىتاپ پالاتالارى بازاسىندا اۆتورلىق شىعارمالار مەن باسپا ونىمدەرىنىڭ بىرىڭعاي اقپاراتتىق الاڭىن قالىپتاستىرۋعا, سونداي-اق اۆتورلىق قۇقىقتى ساقتاۋ جانە زيياتكەرلىك مەنشىكتى قورعاۋ ماسەلەلەرىنە ەرەكشە نازار اۋدارىلدى.

كونفەرەنتسيياعا بىزدىڭ تاراپىمىزدان قازاقستان رەسپۋبليكاسى مادەنيەت جانە سپورت مينيسترلىگى تىل ساياساتى كوميتەتى توراعاسىنىڭ مىندەتىن اتقارۋشى عالىمجان مەلدەشوۆ قاتىسىپ, كىتاپ شىعارۋدىڭ رەسپۋبليكامىزداعى احۋالى تۋرالى بايانداما جاسادى.

عالىمجان مەلدەشوۆ كىتاپ شىعارۋ سالاسىنداعى مەملەكەتتىك قولداۋ تۇرلەرىنە, اتاپ ايتقاندا, مەملەكەتتىك تاپسىرىس بويىنشا شىعارىلاتىن كىتاپتاردىڭ رەسپۋبليكالىق كىتاپحانالارعا تەگىن تاراتىلاتىندىعىنا,  اۆتورلاردىڭ قالاماقىسىن  رەسپۋبليكالىق بيۋدجەتتەن تولەۋ ارقىلى ولارعا قولداۋ كورسەتىلەتىندىگىنە توقتالدى. مۇنداي شارالار تاۋەلسىز قازاقستاننىڭ زاماناۋي شىنايى كەلبەتىن  جارييا ەتەتىن, وز حالقىنىڭ تاريحي وتكەنىنە دەگەن ىقىلاستىق پەن قۇرمەت كورسەتۋ ارقىلى وتانىنىڭ كەلەشەگىنە دەگەن جاڭا كوزقاراستى قالىپتاستىرىپ, جاستارعا پاتريوتتىق تاربيە بەرۋدىڭ جاڭا يمپۋلسى بولعان جوعارى ساپالى كوركەم ادەبي شىعارمالاردى جاساۋعا ىقپال ەتەتىندىگىن مالىمدەدى.

سونداي-اق عالىمجان سارسەنبايۇلى ەلىمىزدەگى كىتاپحانالاردىڭ بىرىڭعاي اقپاراتتىق جەلىگە بىرىكتىرىلگەنىن جانە كىتاپحانالاردىڭ بىرىڭعاي كاتالوگى ۇيىمداستىرىلعانىن, قىتاي, تۇركييا, رەسەي, فينلياندييا, كورەيا, مالايزييا جانە باسقا دا ەلدەردە قازاقستاندىق ادەبيەت ورتالىقتارىن اشۋ ىسىن, كىتاپحانا قورىنا مەموريالدىق كوللەكتسييالاردى, قولجازبالاردى, قازاقستاندىق عالىمداردىڭ, قوعام قايراتكەرلەرىنىڭ بىرەگەي باسىلىمدارى مەن الەمنىڭ كوپتەگەن تىلدەرىندەگى الەمدىك ادەبيەتتىڭ سيرەك باسىلىمدارىن سىيعا بەرۋ بويىنشا جۇرگىزىلگەن بىرەگەي اكتسييانى اتاپ وتتى.ە

«ايقىن» اقپارات

بولىسۋ: