جاس عالىمدار عىلىمداعى ماسەلەلەردى تالقىلادى

767
0
بولىسۋ:

مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە جاس پەداگوگ-عالىمداردىڭ رەسپۋبليكالىق سلەتى وتتى. وقۋ ورنىنىڭ مەديا ورتالىعى تاراتقان اقپاراتىنا سۇيەنەر بولساق, ەكىنشى رەت ۇيىمداستىرىلىپ وتىرعان القالى جيىنعا قازاقستان رەسپۋبليكاسىنىڭ بىلىم جانە عىلىم مينيسترلىگى بىلىم جانە عىلىم سالاسىنداعى باقىلاۋ كوميتەتىنىڭ توراعاسى تالعات ەشەنقۇلوۆ, جوعارى وقۋ ورىندارىنىڭ رەكتورلارى مەن جاس پەداگوگ-عالىمدار قاۋىمداستىعىنىڭ مۇشەلەرى قاتىستى.

– قازاق ۇلتتىق قىزدار پەداگوگيكالىق ۋنيۆەرسيتەتىنەن باستاۋ العان سلەتتىڭ ەستافەتاسىن م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى العان بولاتىن. بۇگىنگى جيىن – مەملەكەت پەن قوعامنىڭ تۇتاستاي  دامۋىن قامتاماسىز ەتۋ ماقساتىندا, جاس عالىمداردىڭ عىلىمي زەرتتەۋلەرى مەن پراكتيكالىق جۇمىستاردىڭ ناتيجەلەرىن الماسۋعا مۇمكىندىك بەرەتىن ىرى الاڭ. تۇڭعىش پرەزيدەنتىمىز جاستار جىلىنىڭ سالتاناتتى اشىلۋىندا «تاۋەلسىزدىك رۋحىمەن وسىپ كەلە جاتقان بۇگىنگى جاس بۋىن – بىزدىڭ ەرتەڭگى ۇمىتىمىز, سەنىمدى تىرەگىمىز» دەگەن بولاتىن. بيىلعى جىلدىڭ جاستار جىلى بولىپ جارييالانۋى – بارلىق جاستىڭ ورتاق قۋانىشى, – دەدى اۋەزوۆ ۋنيۆەرسيتەتىنىڭ رەكتورى دارييا پەرنەشقىزى وز سوزىندە.

سونداي-اق ول وقۋ ورنىندا جاس عالىمداردى قولداپ-قۋاتتاۋ باعىتىندا اتقارىلىپ جاتقان ىلكىمدى ىستەرگە توقتالدى.

ال بىلىم جانە عىلىم سالاسىنداعى باقىلاۋ كوميتەتىنىڭ توراعاسى تالعات ەشەنقۇلوۆ ەلىمىزدەگى ىرگەلى وقۋ ورنىنىڭ بىرى – اۋەزوۆ ۋنيۆەرسيتەتىندەگى جيىن بىلىم مەن عىلىم سالاسىنداعى جاڭا ۇردىستەردىڭ ىشكى مانىن اشىپ, ولاردى دامىتۋ مەن ناسيحاتتاۋدىڭ جاڭا جولدارىن ۇسىناتىنىن العا تارتتى.

– جيىنعا جينالعان جاس عالىمدار وزدەرىنىڭ وزىق تاجىريبەلەرىمەن بولىسىپ, شەبەرلىك سىنىپتارىن وتكىزبەك, وزدەرى جاساعان وقىتۋدىڭ زاماناۋي تەحنولوگييالارىن كوپشىلىك نازارىنا ۇسىنباق ەكەن. سونىمەن قاتار وسى وڭىر مەن تۇتاستاي العاندا ەلدىڭ عىلىمى مەن تەحنيكاسى سالاسىنداعى جاڭاشىلدىقتى تاراتۋ جانە ەنگىزۋ ماسەلەسىن كوتەرىپ وتىر, – دەدى تالعات ەشەنقۇلوۆ. – وزدەرىڭىز سيياقتى كرەاتيۆتى جاس عالىمداردىڭ زەرتتەۋلەرىن قولداۋ جانە ىنتالاندىرۋ, ينتەللەكتۋالدى جاستارعا الەۋمەتتىك جانە ەكونوميكالىق قولداۋ كورسەتۋ, جاستاردىڭ عىلىمي ىنتىماقتاستىعى باعدارلامالارىن ازىرلەۋ جانە ستيپەندييالىق, گرانتتىق زەرتتەۋ جوبالارىنا تارتۋ ۇدەرىسى وسىنداي جيىنداردان كەيىن جاڭا سەرپىلىستەرگە يە بولۋى كەرەك.

باسقوسۋدا قازاقستان جاس پەداگوگ-عالىمدارى قاۋىمداستىعىنىڭ توراعاسى مولدىر ابدرايىموۆا ۇيىمنىڭ جۇمىس تۋرالى كەڭىرەك توقتالدى. ونىڭ ايتۋىنشا, بۇگىندە قاۋىمداستىققا ەلىمىزدىڭ 20 پەداگوگيكالىق جوعارى وقۋ ورنى مۇشە. ۇيىمنىڭ باستاماسىمەن قولعا الىنعان جوبالار قازاق ۇلتتىق قىزدار پەداگوگيكالىق ۋنيۆەرسيتەتى, مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى مەن «بولاشاق» ۋنيۆەرسيتەتىندە ىسكە اسىرىلۋدا. قازىرگى كۇندە وزبەكستان, تۇركييا جانە رەسەيدەگى جاستار وداقتارىمەن كەلىسسوز جۇرگىزىلۋدە.

سلەت قارساڭىندا اۋەزوۆ ۋنيۆەرسيتەتىنىڭ جانىنان جارىق كورگەن «Qazaqtaný» جانە «م. اۋەزوۆ اتىنداعى وقمۋ ماگيسترانتتارى, PhD دوكتورانتتارى مەن جاس ىزدەنۋشىلەردىڭ عىلىمي ەڭبەكتەرىنىڭ جيناعى» عىلىمي جۋرنالدارىنىڭ پرەزەنتاتسيياسى وتتى. بۇل باسىلىمدار وڭتۇستىك وڭىرىندەگى جاس عالىمداردىڭ عىلىمي جاڭالىقتارى مەن يدەيالارىن كوپشىلىككە كەڭىنەن تانىتۋ ماقساتىندا شىعىپ وتىر.

ەكى كۇنگە سوزىلعان سلەت سوڭىندا قازاقستان جاس پەداگوگ-عالىمدار قاۋىمداستىعىنىڭ جاڭا مۇشەلەرىنە كۋالىك تابىستالىپ, قاتىسۋشىلارعا سەرتيفيكات تابىستالدى.

«ايقىن» اقپارات

بولىسۋ: