شىمكەنتتىك دارىگەرلەر بىلىكتىگىن ارتتىردى

856
0
بولىسۋ:

مەديتسينالىق قىزمەتكەرلەردىڭ ۇزدىكسىز بىلىكتىلىگىن ارتتىرۋ وتاندىق دەنساۋلىق ساقتاۋ سالاسىن دامىتۋدىڭ  باسىم باعىتتارىنىڭ بىرى.  ارا-تۇرا   مەديتسينالىق قىزمەتكەرلەردىڭ قاتەلىگىنەن ورىن الىپ جاتقان جاعدايلار  بۇل باعىتتا اتقارىلىپ جاتقان جۇمىستاردىڭ الى دە بولسا جەتكىلىكسىزدىگىن  بىلدىرەدى. وسى تۇستا مەديتسينالىق قىزمەتكەرلەردى قايتا دايارلاۋ مەن بىلىكتىلىگىن ارتتىرۋ  بويىنشا ۇيىمداستىرىلاتىن وقۋ كۋرستارىنا دەگەن  تالاپتىڭ جوعارلاۋى زاڭدىلىق.

ساۋىر  ايىندا  شىمكەنت تەمىر جول اۋرۋحاناسىنىڭ 70-تەن استام ماماندارى, ونىڭ ىشىندە دارىگەرلەر مەن ورتا بۋىن مەديتسينا قىزمەتكەرلەرى حالىقارالىق ستاندارتتارعا سايكەس BLS (بازالىق  رەانيماتسييالىق شارالار) جانە اسLS  (جۇرەكتىڭ توقتاۋى كەزىندە جانە جۇرەك-قانتامىر جۇيەسىنىڭ بۇزىلىستارىندا قارقىندى تەراپييا)  كۋرسىنا قاتىسىپ بىلىمدەرىن شىڭدادى.  سەمينار-ترەنينگ سيمۋلياتسييالىق تەحنولوگييالاردى پايدالانۋ ارقىلى ۇيىمداستىرىلدى.  ونىڭ ەرەكشەلىگى,  قاتىسۋشىلاردىڭ  «ناۋقاستى»  قۇتقارۋ ماقساتىندا جاسالعان اربىر ىس-قيمىلدارىنىڭ دۇرىس نە بۇرىستىعىن ارنايى مانەكەندەر ارقىلى باعالاپ, كەم-كەتىك تۇستارىنا  قاتىستى دارىستى تەرەڭدەتىپ وتكىزۋدە. ارنايى مەديتسينالىق مانەكەندەردى پايدالانۋ ارقىلى جۇرگىزىلەتىن سيمۋلياتسييالىق كۋرستاردىڭ ماڭىزدىلىعى وراسان زور, ترەنينگ بارىسىندا قاتىسۋشىلار وزىنىڭ كاسىبي بىلىكتىلىگىن جەتىلدىرىپ قانا قويماي پسيحولوگييالىق  دايىندىعىن دا بىر سارالاپ الادى.  بۇل شىن مانىندە شۇعىل جاعدايلار تۋىنداۋ كەزىندە كومەك كورسەتۋگە ارنالعان ەڭ تيىمدى دايىندىق تۇرى.

حالىقارالىق ستاندارتتارعا سايكەس جۇرگىزىلگەن كۋرستى «استانا» وقۋ-كلينيكالىق ورتالىعىنىڭ  ماماندارى  وتكىزدى. American Heart Association  (AHA) سەرتيفيكاتىن العان  جوعارى ساناتتى دارىگەر-نۇسقاۋشىلارى بار ورتالىق    بۇگىندە  ەلىمىز بويىنشا  مەديتسينادا سيمۋلياتسييالىق دارىس بەرۋ سالاسىنىڭ  كوشباسشىسى اتانعان. «استانا» وقۋ-كلينيكالىق ورتالىعىنان  دارىس العان ماماندار حالىقارالىق جەدەل-جاردەم بريگادالارىنىڭ سايىسىنىڭ جەڭىمپازدارى, اۋەدە ادام ومىرىنە اراشا بولىپ جۇرگەن بورتسەرىكتەر, ۋنيۆەرسيادا-2017, ەكسپو-2017 ەرىكتىلەرى,  ەلىمىزدىڭ جەتەكشى مەديتسينالىق مەكەمەلەرىنىڭ  ماماندارى. زامان تالابىنا ساي بىلىكتى  مامانداردى  دايىنداپ جۇرگەن ورتالىق  بۇگىندە وڭىرلەردە جۇرگىزىلەتىن وقۋ كۋرستارىنىڭ  ساپاسىنا  جوعارى مان بەرۋگە شاقىرادى. سەبەبى حالىقتىڭ سالۋلىعى, مەديتسينالىق مەكەمەدە كومەك كورسەتەتىن مامانداردىڭ بىلىم ساپاسىنا تىكەلەي بايلانىستى بولىپ كەلەدى. ساپالى بىلىم الماعان ماماندار كومەك كورسەتۋدىڭ ورنىنا كەرىسىنشە ناۋقاستىڭ جاعدايىن ودان  ارى ناشارلاتىپ جىبەرۋى  ىقتيمال.

ايگەرىم قوجاحمەت

بولىسۋ: