«БОГЕМА» ОПЕРАСЫ – ЖАҢА ФОРМАТТА

Дж.Пуччинидің шоқтығы биік «Богема» операсы «Астана Опера» сахнасында жаңа қырынан ұсынылды. Жас режиссер Андреа Бернардтың  мәңгілік махаббат хикаясына деген жаңа көзқарасы астаналық көрерменнің көңілінен шықты.  Премьера  Мәдениет және спорт министрлігінің қолдауымен өтті.

«Богема» оқиғасы Париждің Латын кварталында 1830 жылы өрбиді. Опера кейіпкерлерінің про­тотипі өмірде болған деседі. Дж.Пуччини Миланда оқып жүр­ген­де опера кейіпкерлері тәрізді кедейшілік көріп, үйшікте өмір сүрген, қарыз берушілерден жа­сы­рынып, жалға берушілермен жан­жалдасқан. Сондықтан бо­лар, ол өз кейіпкерлерінің бей­не­сін те­­рең жеткізе білген. Ақын Рудольф пен Мимидің махаббаты ар­қау болған опера әлем сахна­ла­рында сан түрлі форматта ұсы­­нылды. Ал «Астана Операда» шы­­­мыл­дығын түрген опера кө­рер­­мен танымына жақындай түс­кені байқалады. Қойылымға еліміздің үздік опера артистері мен шетел сахналарында өнер көр­­сетіп жүрген классикалық өнер мэтрлері тартылды. Мәсе­лен, маэстро Джузеппе Акуавива дирижер ретінде партитураның барлық нюансын музыканттар көкейіне жеткізе білген. Әлемдік деңгейдегі майталман, «Достық» орденінің кавалері, көрнекті сце­но­граф Эцио Фриджерио қойы­лымды заманауи тыңдар­ман­ға түсінікті әрі жанына жақын етіп ұсы­нуды мақсат еткен. Көп­дең­гей­лі декорациялар барлығын кө­ріністен-көрініске – бірде құ­быр­­­­­­лар қоршаған иесіз қалған зауыт­қа, енді бірде сән-салта­натты Париж жәрмеңкесінің көңіл-кү­йі­не бөлейтін жарқыра­ған алаңға, біресе қар жамылған темір­­жол бекетіне апарып, ерек­ше роман­ти­ка тудырды. Әртістер осы көрі­ніс­тердің әрбіріне боге­ма­лық жа­сам­паздар рухын сіңіре біл­ді. Солис­тер лирикалық және дра­ма­лық эпизодтарда керемет дуэт­тер шығарды. Мими рөлін­дегі – Ма­рия Мудряк пен Майра
Мұхам­едқызы, Рудольф – Медет Чота­баев пен Жан Тапин Пуччи­ниге тән вокал стилін тамаша алып шық­­­ты. Орындаушылардың ак­терлік ойыны да атап өтуге тұ­рар­лық. Олар өз кейіпкерлері­нің мі­нез-құлқын жете сезініп, олар­дың күйін­ішіне терең бой­лап, бар эмо­­циясын берді, сахнада солар бо­лып өмір сүрді. Салтанат Ахме­то­ва, Альфия Каримова (Мюзет­та), Сүндет Байғожин, Талғат Мұса­баев (Марсель) орындауын­да­­ғы әрі күлдіргі, әрі драмалық сах­­­­налық көріністер – көзге жас ұя­­латты.
Операның мерекелік көріні­сі­не кәсіби цирк әртістері қатыс­ты. «Оскар» сыйлығының иегері Франка Скуарчапино керемет костюм­дер жасаған. «Астана Опера» бас хормейстері Ержан Дәуітов жетекшілік еткен хор таңғаларлықтай мәнерлі естілді. Балалар хорының жетекшісі Ал­тын­­ғаным Ахметова және хор­мейс­­тер Айгерім Макибаева же­тек­шілік еткен Балалар студиясы жас әртістерінің жұмысын да жеке атап өткен жөн.

Айдана БЕГІМ