گولوۆكين مەن روللس تۇڭعىش رەت باسپاسوز جيىنىن وتكىزىپ, كوز تۇيىستىردى (ۆيدەو)

463
0
بولىسۋ:

ورتا سالماقتاعى الەمنىڭ بۇرىنعى چەمپيونى قازاقستاندىق گەنناديي گولوۆكين مەن كانادالىق ستيۆ روللس جەكپە-جەك الدىندا كوز تۇيىستىرۋ راسىمىن جاسادى.

روللستىڭ ايتۋىنشا, بۇل كەزدەسۋدە ول وزىنىڭ اۋتسايدەر ەكەنىن جاقسى بىلەدى. دەگەنمەن الەمدى تاڭعالدىرۋعا دايىن ەكەنىن دە ايتتى.

«جاراتۋشىعا, GGG Promotions كومپانيياسىنا, ونىڭ كومانداسىنا جانە وزىمنىڭ پروموۋتەرىم دي بەللعا جانە وسىنداي مۇمكىندىك ۇسىنعان DAZN سەرۆيسىنە العىس ايتامىن. مەن اۋتسايدەرمىن, بىراق قاتەلەسپەڭىزدەر. بۇل جاي دەنە قىزدىرۋ ەمەس, مەن توبەلەسۋ ۇشىن بارامىن. قازىر مەنى ەشكىم بىلمەيدى. بىراق 8 ماۋسىمنان كەيىن سىزدەر مەنى ۇمىتا الماي قالاسىزدار. مەن گەنناديي گولوۆكيندى وتە قاتتى قۇرمەتتەيمىن. الايدا الەمدى تانتى ەتۋگە دايىنمىن» دەپتى روللس.

وز كەزەگىندە گولوۆكين دە الداعى جەكپە-جەكتەن نە كۇتەتىنىن جەتكىزدى.

«مەن باقىتتىمىن. Madison Square Garden-گە قايتا ورالعانىم ۇشىن قۋانامىن. بۇل مەن ۇشىن وتە قىزىقتى سات. بىرىنشىدەن, تەلەسەرىكتەسىم – DAZN كومپانيياسىنا العىسىم شەكسىز. بۇل بوكس ۇشىن, سپورت ۇشىن, ادامدار ۇشىن كەرەمەت ۋاقىت. سونداي-اق ەكىنشى ۇيىمە اينالىپ كەتكەن Madison Square Garden ارەناسىنا دا العىسىم زور.

بىزدىڭ قايتا ورالاتىنىمىز جانە كەرەمەت شوۋ جاسايتىنىمىز تۋرالى كوپ ايتىلدى. جانە سولاي بولادى دا. وسىنداي كەرەمەت كەشكە قاتىسۋعا كەلىسىم بەرگەن قارسىلاسىما دا راحمەت. قارسىلاسىما بىر عانا نارسەنى ايتقىم كەلەدى. مەيلى, مىنا جەردە نە تۇرلى اڭگىمە ايتساق تا رينگتە تەك ەكەۋمىز عانا بولامىز. ال جەڭىسكە تەك كۇشتى عانا جەتەدى. ەڭ باستىسى كىم جەڭسە دە ەكەۋمىز دە ۇيىمىزگە امان-ەسەن ورالايىق.

بىزدە كوپ ۋاقىت تا قالمادى. دەگەنمەن كوپشىلىككە عاجايىپ شوۋ سىيلاۋعا مۇمكىندىك بار. بارلىق بوكس جانە سپورت جانكۇيەرلەرىن 8 ماۋسىمدا بولاتىن ساتتى كورۋگە جانە قولداۋعا شاقىرامىن» دەدى گولوۆكين.

قازاقستاندىق بوكسشى قارسىلاسى تۋرالى ونشا بىلمەيتىنىن دە مويىندادى.

«شىنىمدى ايتسام, بۇل بوكسشى تۋرالى كوپ بىلمەيمىن. ول بىزگە نۇسقا رەتىندە ۇسىنىلدى. وزىن دامىتۋعا تىرىسىپ جۇرگەن كانادالىق بوكسشى ەكەن. مەن دايىنمىن» دەپتى بوكسشى.

ەسكە سالساق, گولوۆكين – روللس جەكپە-جەگى 8 ماۋسىم كۇنى نيۋ-يوركتەگى Madison Square Garden ارەناسىندا وتەدى.

اباي قازبەكۇلى

بولىسۋ: