جەمىستى ىنتىماقتاستىق جولى

1439
0
بولىسۋ:

قازاقستاننىڭ تۇڭعىش پرەزيدەنتى ن.نازارباەۆ كورەيا رەسپۋبليكا­سىنىڭ پرەزيدەنتى مۋن چجە ينمەن كەزدەستى. اڭگىمەلەسۋ بارىسىندا ەلباسى جوعارى مارتەبەلى قوناققا ىلتيپات بىلدىرىپ, ەكى مەملەكەت اراسىنداعى ەكونوميكالىق جانە ساياسي ىنتىماقتاستىقتىڭ تيىمدىلىگىن ايتتى.

– سىزبەن قازاقستاندا جۇزدەسكەنىمە قۋانىشتىمىن. تاۋەلسىزدىگىمىزدىڭ العاش­قى كۇنىنەن باستاپ وڭتۇستىك كورەيامەن جاقسى قارىم-قاتىناس ورناتتىق. بىز ەكونوميكالىق جانە ساياسي ىنتىماق­تاستىعىمىزدى جاڭادان قالىپتاستىردىق. سىزدەردىڭ جالپى قازاقستانعا جانە ورتالىق ازيياعا دەگەن ىقىلاستارىڭىزدى جوعارى باعالايمىز, – دەدى قازاقستاننىڭ تۇڭعىش پرەزيدەنتى.
ن.نازارباەۆ وڭتۇستىك كورەيا مەن كورەي حالىق دەموكراتييالىق رەسپۋبلي­كاسى اراسىندا قول جەتكىزىلگەن كورەيا­رالىق ۋاعدالاستىقتاردى جۇزەگە اسىرۋدىڭ ماڭىزىن اتاپ وتتى.
– سىزدەر كۇردەلى ماسەلەمەن – كورەي تۇبەگىندە بەيبىتشىلىك پەن وزارا سەنىم ورناتۋ ىسىمەن اينالىسىپ جاتىرسىزدار. بۇل وڭاي ەمەس, بىراق بۇل – يگىلىكتى ىس. سىزدەردىڭ كۇش-جىگەرلەرىڭىزگە جان-جاقتى قولداۋ كورسەتۋگە دايىنبىز, – دەدى ەلباسى نۇرسۇلتان نازارباەۆ.
وڭتۇستىك كورەيا پرەزيدەنتى قا­زاقستاننىڭ تۇڭعىش پرەزيدەنتىنە جۇزدەسكەنى ۇشىن ريزاشىلىق بىلدىرىپ, بۇل ساپاردىڭ ەكىجاقتى بايلانىستاردى دامىتۋ ۇشىن ماڭىزدى ەكەنىن ايتتى.
– بريۋسسەلدە وتكەن اسەم سامميتى اياسىندا كەزدەسكەنىمىز ەسىمدە. سول كەزدە مەنى قازاقستانعا ساپارمەن كەلۋگە شا­قىردىڭىز. بۇل ساپارعا باسا مان بەرەمىن. ويتكەنى بيىل ەكى ەل اراسىنداعى ستراتە­گييالىق سەرىكتەستىگىمىزدىڭ 10 جىل­دىعىن اتاپ وتەمىز, – دەدى مۋن چجە ين.
وڭتۇستىك كورەيا پرەزيدەنتى قا­زاقستان­نىڭ ەكونوميكالىق دامۋ تۇرعى­سىنان قول جەتكىزگەن جەتىستىكتەرىنىڭ بارى نۇرسۇلتان نازارباەۆتىڭ كورەگەن سايا­ساتىنىڭ ارقاسى ەكەنىن ەرەكشە اتاپ وتتى.
سونداي-اق مۋن چجە ين قازاقستان­نىڭ بەيبىتشىلىك پەن كەلىسىم باعىتىندا, سونىڭ ىشىندە يادرولىق قارۋسىزدانۋ مەن ونى تاراتپاۋ سالاسىندا جۇرگىزىپ جاتقان ساياساتىنا توقتالدى.
سونداي-اق ەلباسى ن.نازارباەۆ قىتاي حالىق رەسپۋبلي­كاسىنىڭ قا­زاقستانداعى توتەنشە جانە وكىلەتتى ەل­شىسى چجان سياومەن كەزدەستى. كەزدەسۋ با­رى­سىندا قازاقستاننىڭ تۇڭعىش پرەزي­دەنتى ەكى مەملەكەت اراسىندا ور­نىق­قان قارىم-قاتىناستىڭ جوعارى دەڭ­گەيدە ەكەنىن اتاپ وتىپ, ونى ارى قاراي دا­مىتۋدىڭ پەرسپەكتيۆالارىنا توق­تالدى.
– سىزبەن جۇزدەسكەنىمە قۋانىش­تىمىن. توراعا سي تسزينپيننىڭ بىر­لەسكەن جۇمىستارىمىزدىڭ نا­تي­جە­لەرى مەن پەرسپەكتيۆالارى تالقى­لاناتىن «بىر بەلدەۋ, بىر جول» اتتى فورۋمعا قاتىسۋعا شاقىرۋىن ريزاشىلىقپەن قابىل الدىم. سونىمەن قاتار بىز جەتى جىل بويى وزارا تۇسىنىستىك رۋحىندا بىرلەسە جۇمىس ىستەگەن قىتاي حالىق رەسپۋبليكاسىنىڭ تورا­عاسىمەن كەلىسسوز وتكىزۋ جوسپارلانىپ وتىر, – دەدى نۇرسۇلتان نازارباەۆ.
سونىمەن قاتار ەلباسى بارشا قىتاي حالقىن قىتاي حالىق رەسپۋبليكاسىنىڭ 70 جىلدىعىمەن قۇتتىقتاپ, زور تابىس جانە باق-بەرەكە تىلەدى.

بولىسۋ: