زەلەنسكيي پرەزيدەنتتىك قىزمەتكە كىرىسكەننەن كەيىن ەڭ بىرىنشى نە ىستەيتىنىن مالىمدەدى

4048
0
بولىسۋ:

ۆلاديمير زەلەنسكيي ۋكراينانىڭ قازىرگى پرەزيدەنتى پەتر پوروشەنكودان قۇتتىقتاۋ العانىن جارييا ەتتى.

«ۋكراينا پرەزيدەنتى پەتر الەكسەەۆيچ پوروشەنكوعا ۇلكەن العىس ايتامىن – ول قازىر عانا قوڭىراۋ شالىپ مەنى جەڭىسىممەن قۇتتىقتادى. ول كەز كەلگەن ۋاقىتتا كومەك بەرۋگە دايىن ەكەنىن ايتتى. ول مەنىڭ جانە كوماندامنىڭ جەڭىسىن مويىندادى» دەدى زەلەنسكيي.

وز كەزەگىندە زەلەنسكيي دە پوروشەنكونىڭ كومەگىنە قاجەت بولعان جاعدايدا سۇيەنۋگە دايار. سونىمەن قاتار ونى قوعامنىڭ ىقىلاسىنا وراي قانداي دا بىر قىزمەتكە تاعايىنداۋعا دا قارسى ەمەس.

سونداي-اق ول پرەزيدەنت مىندەتىنە كىرىسكەننەن كەيىن بىرىنشى رەتتە قانداي جۇمىستاردى ىستەيتىنىن دە اتاپ وتتى. ونىڭ ايتۋىنشا, الدىمەن رەسەيدە تۇتقىندالعان ۋكراينالىق تەڭىزشىلەردى تۇتقىننان بوساتپاق.

ول سونداي-اق «بىز بارلىعىن ۋكراينا ۇشىن ىستەيمىز – ونى بىرىكتىرەمىز. بىز ۋكراين حالقى ۇشىن جۇمىس ىستەيتىن كوماندا جينادىق. مەن كونستيتۋتسييانىڭ كەپىلى بولامىن. بىز ەلىمىزدى قورعايمىز. دونباسستاعى سوعىس ورتى سونۋ ۇشىن قولدان كەلگەننىڭ بارىن جاسايمىز. جەمقورلىقپەن كۇرەس ۇشىن ارنايى زاڭ ازىرلەيمىز» دەدى.

ۋكراينانىڭ جاڭا پرەزيدەنتىن ۇلىقتاۋ راسىمى 2019 جىلدىڭ 3 ماۋسىمىنا دەيىن وتۋى تيىس. بۇعان دەيىن ۇلتتىق ەكزيت-پول سايلاۋدىڭ العاشقى ناتيجەلەرىن جارييا ەتكەن بولاتىن.

«بىز نەگىزىنەن نورماند فورماتى بويىنشا ارەكەت ەتەمىز. مينسك كەلىسىمىن دە جالعاستىرامىز. ونى قايتا جانداندىرۋ كەرەك. بىزدە كادرلىق اۋىس-تۇيىستەر دە بولادى دەپ ويلايمىن» دەدى زەلەنسكيي ەكزيت-پول ناتيجەسىنەن كەيىن وتكىزگەن باسپاسوز جيىنىندا.

فوتو: Sputnik / سترينگەر

اباي قازبەكۇلى

بولىسۋ: