پوروشەنكو جەڭىلىسىن مويىنداپ زەلەنسكييدى جەڭىسىمەن قۇتتىقتادى (ۆيدەو)

3162
0
بولىسۋ:

بۇگىن ۋكراينا ەلىندە وتكەن پرەزيدەنت سايلاۋىنىڭ العاشقى ەكزيت-پول ناتيجەلەرى جارييا ەتىلدى.

ەكزيت-پول قورىتىندىسى بويىنشا كانديدات ۆلاديمير زەلەنسكيي 73,2 پايىز داۋىس جيناسا, پەتر پوروشەنكو 25,3 پايىز داۋىس العان.

زەلەنسكيي ۇشىن ەلدىڭ باتىس ايماعى 57,0, ورتالىعى 73,0, وڭتۇستىگى 85,4, ال شىعىسى 87,7 پايىز داۋىس بەرگەن.

كانديدات پوروشەنكو سايلاۋداعى وز جەڭىلىسىن مويىنداعان. دەگەنمەن ول الداعى ۋاقىتتا ساياساتتا قالۋدى جوسپارلاپ وتىر.

«كەلەسى ايدا مەن مەملەكەت باسشىسى مىندەتىمەن قوش ايتىسامىن. ۋكرايندىقتاردىڭ باسىم بولىگى سولاي شەشتى. مەن وفيستان كەتەمىن, بىراق ساياساتتان كەتپەيمىن. ساياساتتا قالامىن جانە ۋكراينا ۇشىن كۇرەسەمىن. ويتكەنى بىزدىڭ كوماندا بارىمىز بىرىگىپ قول جەتكىزگەن جەتىستىكتى قورعاۋى تيىس» دەپتى پوروشەنكو.

ونىڭ ايتۋىنشا, پوروشەنكونىڭ كومانداسى ەۋرووداق پەن ناتو-عا مۇشە بولۋدى, ۆيزاسىز رەجيمدى, ۋكراين تىلى مارتەبەسىن, ەلدىڭ قارجى-بانك جۇيەسىنىڭ تۇراقتىلىعىن قامتاماسىز ەتۋگە كۇرەستى جالعاستىرادى.

«2014 جىلى مەن ەل بيلىگىن قولىما الدىم. ول كەزدە پرەزيدەنت بولعىسى كەلگەندەر الدەقايدا از ەدى. سول كەزدە ەشقاشان بەرىلمە دەگەندى ەستىگەنمىن. قازىر ەكزيت-پول ناتيجەسىن بىلگەننەن كەيىندە ەشقاشان بەرىلمەۋ كەرەكتىگىن تۇسىنەمىن. دال قازىرگى ساتتە قارسىلاسىما قوڭىراۋ شالىپ, ونى قۇتتىقتاۋىما تۋرا كەلىپ تۇرعانىنا قاراماستان…» دەيدى پوروشەنكو.

ال ۆلاديمير زەلەنسكيي ەكزيت-پول ناتيجەسىنەن كەيىن مالىمدەمە جاسادى.

«بىز مۇنى بىرگە ىستەدىك. مەن تەك اتا-اناما «راحمەت» دەگەن سوزدى ايتقىم كەلەدى. ايەلىمە دە قولداۋى ۇشىن العىس بىلدىرەمىن. بالالارىما, وتباسىما دا العىسىم شەكسىز. كومانداما راحمەت! ادال قىزمەتى ۇشىن ۇلتتىق قاۋىپسىزدىك قىزمەتىنە, قۇقىق قورعاۋشىلارعا دا راحمەت! مەنى قولداپ, وز تاڭداۋلارىن جاساعان ۋكراين حالقىنا راحمەت!» دەدى زەلەنسكيي.

«مەن ازىرگە پرەزيدەنت ەمەسپىن. بىراق پوستكەڭەستىك وداق ەلدەرىنىڭ ازاماتتارىنا قاراتا «بىزگە قاراڭدار – بۇل مۇمكىن بولادى» دەپ ايتقىم كەلەدى» دەپ اتاپ وتتى زەلەنسكيي.

فوتو: ربك ۋكراينا

اباي قازبەكۇلى

بولىسۋ: