جامبىل وبلىسىندا اۆتوبۋس اپاتقا ۇشىراپ, 11 ادام قازا تاپتى

975
0
بولىسۋ:

جامبىل وبلىسىندا كولىك اپاتىنان 11 ادام قازا تاۋىپ, وتىزدان استام ازامات جاراقات الدى. بۇل تۋرالى جامبىل وبلىسى اكىمىنىڭ باسپاسوز قىزمەتى حابارلادى.

20 ساۋىر كۇنى, شامامەن تاڭعى 5:00 شاماسىندا جامبىل وبلىسىنىڭ قورداي اۋدانىندا, الماتى-تاشكەنت تاسجولىنىڭ 181 شاقىرىمى تۇسىندا Toyota Camry جەڭىل اۆتوكولىگى Mersedes-Benz 814 جۇك كولىگىنە سوقتىعىستى.

دال وسى ۋاقىتتا شىمكەنتتەن الماتىنى بەتكە العان جولاۋشىلار اۆتوبۋسى اتالعان جول اپاتىنا بەتپە-بەت كەلىپ قالىپ, ودان قاشپاق بولىپ اۋدارىلادى.

وقيعا سالدارىنان اپات ورنىندا 8 ادام تىل قاتپاي مەرت بولادى, 32 ادام مەديتسينالىق مەكەمەلەرگە جەتكىزىلەدى. وندا تاعى ۇش ادام قايتىس بولدى.

اپات ورنىنا شۇعىل تۇردە جەدەل جاردەم مەن توتەنشە جاعداي قىزمەتى, قورداي اۋدانىنىڭ اكىمى جەتتى. زارداپ شەككەندەردى قورداي, وتار اۋرۋحانالارىنا جەتكىزدى.

جەدەل كومەك كورسەتۋ ۇشىن جامبىل وبلىستىق دەنساۋلىق ساقتاۋ باسقارماسىنىڭ باسشىسى م.جۇمانقۇلوۆتى 3 وتاشى-دارىگەرمەن بىرگە تىكۇشاقپەن قوردايعا جەتكىزدى.

ايتا كەتۋ كەرەك, ورىن العان وقيعاعا قاتىستى شۇعىل ارنايى كوميسسييا قۇرىلدى. ونىڭ قۇرامىندا وبلىس اكىمىنىڭ بىرىنشى ورىنباسارى ب.ورىنبەكوۆ, وبلىستىق پوليتسييا دەپارتامەنتىنىڭ باستىعى ا.ورازاليەۆ, باسقا دا تيىستى لاۋازىم يەلەرى بار. كوميسسييا  وقيعانىڭ ورنىنا بارىپ, جول-كولىك وقيعاسىنىڭ مان-جايىن انىقتاپ, زارداپ شەككەندەرگە ساپالى  كومەك كورسەتۋدى ۇيىمداستىرۋدا.

Nur Otan پارتيياسى توراعاسىنىڭ بىرىنشى ورىنباسارى ماۋلەن اشىمباەۆ وزىنىڭ فەيسبۋك پاراقشاسىندا جامبىل وبلىسىندا ورىن العان ىرى جول اپاتىندا كوز جۇمعان مارقۇمداردىڭ وتباسىنا كوڭىل ايتتى.

«ايقىن» اقپارات

 

بولىسۋ: