وزارا بايلانىس – وزەكتى

441
0
بولىسۋ:

قازاقستان پرەزيدەنتى قاسىم-جومارت توقاەۆ قازاقستاننىڭ وزبەكستانداعى جىلى ەكىجاقتى قارىم-قاتىناستار ۇشىن دە, بۇكىل ورتالىق ازيياداعى وزارا تۇسىنىستىك پەن سەنىم احۋالىن قالىپتاستىرۋ ۇشىن دە ەرەكشە ماڭىزى بار وقيعا ەكەنىن اتاپ وتتى. «بۇكىل الەمدىك مادەنيەتتىڭ يگىلىگى بولىپ تابىلاتىن  ەلدەرىمىزدىڭ باستى رۋحاني جانە تاريحي ورتالىقتارىن وزارا بايلانىستىرۋدى ۇسىنامىن. جەدەل تۇردە تۇركىستان, سامارقان, بۇقارانى بىر باعىتتا قوساتىن تۋريستىك كلاستەر اشىلادى», – دەدى. 

قازاقستانداعى تۋريزم يندۋس­تريياسى – كەنجە قالىپ تۇرعان سالا. جىل سايىن قىرۋار قاراجات سالساق تا, دال وزبەكستان تۋريزمى سەكىلدى دامي الماي جاتىرمىز. ەلىمىزدە تۋريستىك سالانى دامىتۋ مەن 2019-2025 جىلدارعا ارنال­عان سالالىق مەملەكەتتىك باع­دارلامانى ەنگىزۋ ماسەلەسى قاراس­تىرىلىپ جاتىر.
وسى رەتتە مەملەكەت باسشى­سىنىڭ تۇركىستاندى سامارقان مەن بۇقارا باعىتىنا بايلانىس­تىرۋ قاجەتتىگى تۋرالى باستاما­سى – جاقسى باستاما. وزبەكستان تۋريزم جاعىنان بىزگە قاراعاندا الدەقايدا تارتىمدى, جىل سايىن بۇل ەلگە كەلۋشى تۋريستەر لەگى تولاستار ەمەس. وندا شاعىن جانە ورتا بيزنەس پەن قىزمەت كورسەتۋ سالاسى تولىققاندى قانات جايعان.
بىزدە بىر تۇسىنىك بار: ەلگە تۋ­ريستەردى كوپتەپ تارتۋ ۇشىن قو­لايلى ينفراقۇرىلىم جاساۋ قاجەت – جولدار, قىمبات قو­ناق­ۇي­لەر سالىنىپ, سەرۆيستىك قىز­مەتتى جاقسارتۋىمىز كەرەك دەي­مىز. جولى جەتىسىپ تۇرماعان موڭعوليياعا دا جۇرت اعىلىپ با­رىپ جاتىر. ماسەلە تەك سەرۆيستە تۇرسا, بارى باياعىدا وزدىگىنەن شەشىلەر ەدى.
تۋريزم نىسانىنا اينالۋ ۇشىن قازاقستاندى تارتىمدى ەل ەتىپ كورسەتۋ ماڭىزدى. قۇدايعا شۇكىر, تاريحي ورىندار, كونە عيماراتتار بار. الەۋەتتى تۋريس­تەر ەلگە نە ۇشىن كەلەدى? باسقا جاقتا جوق نارسەنى, ەرەكشە تا­ريحي ورىن مەن تۇلعاعا قاتىستى جادىگەرلەردى كورگەندى قالايدى. وسى تۇرعىدان العاندا, وزبەكتەر اقساق تەمىردى جاقسى پايدالانىپ وتىر. بىز شە? بىز قايتەمىز?
شىڭعىسحان – تاريحي تۇلعا. وسى شىڭعىسحاننىڭ قازاق تاريحىنا قاتىستى عۇمىربايانىن دۇرىس پايدالانۋعا نە كەدەرگى? شىڭعىسحاننىڭ وزى بىزدەن الىس­تاۋ شىعار دەگەن پايىمدى ىسى­رىپ قويعان كۇننىڭ وزىندە, ونىڭ ۇلكەن ۇلى جوشى حان, ونىڭ قۇر­عان ورداسى قازاق تاريحىمەن قابىسىپ جاتقان جوق پا? وسىنى نەگە تيىمدى پايدالانباسقا?
بىزگە جىل سايىن كەلەتىن تۋ­ريستەر سانى 900 000-نان اسپايدى ەكەن. ولارعا bed tax سيياقتى – قوناقۇيدە ورنالاستىرۋ سالىعىن ەنگىزبەك نيەت بار. بىرىككەن اراب امىرلىكتەرى دۋبايعا كەلگەن تۋريست سانى 12 ميلليوننان اسقاننان كەيىن عانا, وندا دا 2014 جىلى جاڭاعى الىمدى ەنگىزگەن كورىنەدى.
تۇركىستان – ۇلى جىبەك جولىنىڭ بويىندا تۇر. وزبەك­ستانعا اعىلىپ جاتقان تۋريستەر ەندى تۇركىستانعا كەلەتىن بولسا, جاڭا وبلىستا تۋريزم قارقىن الادى.

نۇرتورە جۇسىپ

بولىسۋ: