Astana телеарнасына жаңа басшы келді

Белгілі тележурналист Бибігүл Жексенбай Astana телеарнасының бас директоры болып тағайындалды. Жаңа басшыны телеарна ұжымына Nur Otan партиясы Төрағасының Бірінші орынбасары Мәулен Әшімбаев таныстырды.

Сөз басында Мәулен Әшімбаев Astana-ның бүгінде еліміздегі ең үздік телеарналардың бірі екеніне назар аударды.
– Қазір Astana – еліміздегі рейтингі жоғары телеарналардың бірі. Бұл осыған дейін арна басшысы болған Ләззат Мұрат­қызы мен ұжымның ерен еңбе­гінің нәтижесі екені сөзсіз, – деді партия Төрағасының Бірінші орынбасары.
Сондай-ақ ол телеарнаға басшы болып тағайындалған Бибігүл Жексенбайдың білікті маман екенін айтып, оның жетек­шілігімен Astana арнасы бұдан да биік белестерді бағындыратынына сенім білдірді.
– Мұндай шешім Елбасының келісімімен қабылданып отыр. Сондықтан жауапкершілік жүгі еселене түсетіні анық. Десек те, Бибігүл Нұрғалиқызы – отандық ақпарат айдынында аты қалып­тасқан кәсіби журналист. Көп­теген тележобалар мен деректі фильмдердің авторы және «Бас редакторлар клубының» прези­денті ретінде де өзінің жоғары ұйымдастырушылық қабілетін көрсетті. Қандай қызметте болса да тек талантты журналист, мықты медиа-менеджер, кәсіби маман және білікті басшы ретінде ғана танылды. Сондықтан Бибігүл Нұрғалиқызы жаңа қызметте де белсенділік танытып, Astana телеарнасының одан ары дамуына тың серпін береді деп сенеміз, – деді Мәулен Әшімбаев.
Сонымен қатар ол қазір елі­міздің аса маңызды тарихи әрі саяси кезеңді бастан өткеріп жатқанын тілге тиек етіп, алдағы Президент сайлауында ақпарат құралдарының белсенді әрекет ету керегіне көңіл бөлді.
Өз кезегінде Бибігүл Жексен­бай жүктелген сенімді абыроймен ақтау үшін бар күш-жігерін жұмсауға дайын екенін айтты.
– Елбасының партия алдына қойған мақсат-міндеттері Astana телеарнасына да тікелей қатысты. Сондықтан алдағы уақытта осы міндеттерді мүлтіксіз орындап, телеарнаның қазіргі абырой-беделін одан ары арттыру үшін жұмыс істейміз. Осы жолда бар­ша ұжым жұдырықтай жұмылып, көздеген мақсаттарға бірлесіп қол жеткіземіз деп сенемін, – деді Бибігүл Жексенбай.
Бибігүл Жексенбай әл-Фараби атындағы Қазақ ұлттық университетінің Журналистика факультетін бітірген. Еңбек жолын «Спорт» республикалық апталығының корреспонденті ретінде бастаған ол әр жылдарда «Жас Алаш», «Атамұра» газет­терінде жұмыс істеді. Сондай-ақ ұзақ жылдар отандық телевизия саласында нәтижелі еңбек етті. Соның ішінде «Хабар» агенттігі мен Qazaqstan ұлттық теле­арнасында жауапты қызметтер атқарған. Одан бөлек, «Жетінші арна» телеком­паниясының бас директоры, кейін Директорлар кеңесінің төрағасы болды. Қазақстан Республикасы Пар­ламенті Сенаты Төрағасының кеңесшісі қызметінде де жауап­керші­лігімен таныла білді.
Айта кетейік, Astana Nur Otan партиясына қарасты «НҰР-Медиа» холдингінің құрамындағы телеарна. Бұдан басқа, аталған холдингке қарасты ақпарат құралдарының қатарында AIQYN, Литер, Túrkistan, «Қазақстан теміржолшысы» га­зеттері мен NS, Orda FM радио­лары бар. Осы аптада еліміздегі ең ірі медиа холдинг болып са­налатын бұл мекемеге белгілі журналист, отандық ақпарат саласындағы топ-менеджер­лердің бірі Әлия Буриева бас директор болып тағайындалды.

Е.МАҚСАТҰЛЫ