ونەرباەۆ كوپ بالالى وتباسىعا ۇيدىڭ كىلتىن تابىستادى

2735
0
بولىسۋ:

پرەزيدەنت تاپسىرماسىنا وراي قازىر جەر-جەردە كوپ بالالى جانە الەۋمەتتىك جاعىنان از قامتىلعان وتباسىلارعا قامقورلىق كورسەتىلىپ جاتىر.

كەشە سونداي يگىلىكتى شارانىڭ بىرى تەكەلى قالاسىندا ورىن الدى. 37 جاستاعى «كۇمىس القا» يەگەرى نازگۇل قوجىكەەۆا وسى ۋاقىتقا دەيىن بالالارىن وزى وسىرىپ, وزى تاربيەلەپ كەلدى. ون جىلدان بەرى جالدامالى پاتەردە تۇرىپ كەلە جاتقان اناعا شاھار باسشىسى قامقورلىق كورسەتتى. قالا اكىمى باحتييار ونەرباەۆ جەرگىلىكتى كاسىپكەرلەردىڭ كومەگىمەن جالعىزباستى اناعا 4 بولمەلى ۇيدىڭ كىلتىن تابىس ەتتى. ايتا كەتەتىن بىر جايت, وتباسىنداعى ەڭ كىشكەنتاي سابي – سەگىز ايلىق. اتى – ينابات. كىشكەنتاي سابي بىر جاسقا تولعاندا اناسى نازگۇلگە «التىن القا»  بەلگىسى تاپسىرىلاتىن بولدى.

قازىرگى ۋاقىتتا وتباسى مەملەكەتتەن اتاۋلى الەۋمەتتىك كومەك الىپ,  بالالاردىڭ جاردەماقىسىمەن كۇنەلتىپ وتىر.  ەندى ولار 1 ساۋىردەن باستاپ كوپ بالالى انالارعا بەرىلەتىن مەملەكەتتىك 165997 تەڭگە جاردەماقى الادى.

– ون جىلدان بەرى پاتەر جالداپ تۇردىق. «وزىمىزدىڭ پاتەرىمىز قاشان بولادى?» دەپ ارماندادىق. قايىرىمدى جاندار قوعامدا بار ەكەن. ەڭ الدىمەن قالا اكىمى باحتييار ونەرباەۆقا جانە ۇيدى اپەرۋگە قولۇشىن سوزعان كاسىپكەر ازاماتتارعا مىڭ العىس. مەكتەپ تە – جانىمىزدا. بالالارىم الاڭسىز ۇيىقتايتىن بولدى. سوعان قۋانامىن, – دەيدى جالعىزباستى, كوپ بالالى انا.

ايتا كەتۋ كەرەك, قازىرگى ۋاقىتتا تەكەلى قالاسىندا 415 كوپ بالالى وتباسى تۇرادى. قالا اكىمى باحتييار ونەرباەۆتىڭ ايتۋىنشا, ولاردىڭ 170 وتباسىنا باسپانا كەرەك. ال رەسمي تۇردە كەزەكتە تۇرعانى – 55 وتباسى عانا.  قالا باسشىسى بۇل رەتتە كاسىپكەرلەر تاراپىنان جاسالىنىپ جاتقان يگى قادامداردىڭ جالعاساتىنىن اتاپ وتتى. ارنايى قۇرىلعان قايىرىمدىلىق قورىنان مامىر ايىندا تاعى دا كوپ بالالى بىر وتباسىعا باسپانا ساتىپ اپەرىلمەك.

–مەملەكەتتىك قولداۋدىڭ ارقاسىندا تەكەلى قالاسىنىڭ كاسىپكەرلەرى قايىرىمدىلىقتان سىرت قالا المادى. كاسىپكەر ۆيكتور سىچەۆ بىزدىڭ باستامامىزدى قولداپ, نازگۇل قوجىكەەۆاعا جەكە ۇي ساتىپ الۋعا قولداۋ كورسەتتى. الەۋمەتتىك جاعىنان از قامتىلعان وتباسىلارعا ارناپ, ارنايى قور اشتىق. قورداعى قارجى سونداي مۇقتاج جاندارعا جۇمسالادى. بۇل ورايدا قايىرىمدىلىق شارالارى جالعاسىن تاباتىن بولادى, – دەيدى تەكەلى قالاسىنىڭ اكىمى باحتييار ونەرباەۆ.

ا.احمەتقازى

بولىسۋ: