گولوۆكين ومىرى جەڭىلىپ كورمەگەن كانادالىق بوكسشىمەن جەكپە-جەككە شىقپاق

1103
0
بولىسۋ:

ومىرى جەڭىلىس دامىن تاتپاعان كانادالىق بىلعارى قولعاپ شەبەرى ستيۆ روللس ورتا سالماقتاعى الەمنىڭ بۇرىنعى چەمپيونى قازاقستاندىق گەنناديي گولوۆكينمەن جەكپە-جەككە شىعۋعا كەلىسكەن سىڭايلى. 

بۇل تۋرالى DAZN سەرۆيسىمەن بىرلەسە جۇمىس ىستەيتىن Sport Illustrated تىلشىسى كريس مەننيكس مالىمدەدى. ول بۇل جايلى تۆيتتەردەگى پاراقشاسىندا جازعان.

گولوۆكيننىڭ كەلەسى كەزدەسۋى 8 ماۋسىم كۇنى نيۋ-يوركتەگى Madison Square Garden ارەناسىندا وتپەك. بوكسشى DAZN سەرۆيسىمەن ۇش جىلدىق كەلىسىمشارتقا وتىرعانى بەلگىلى. ول بويىنشا بوكسشى جىلىنا ەكى جەكپە-جەكتەن وتكىزىپ وتىرۋى تيىس.

«گولوۆكين مەن روللس ماۋسىمداعى كەزدەسۋ كەلىسىمىن جاساپ جاتىر. بۇل تۋرالى كەلىسسوزگە جاقىن جۇرگەن دەرەك كوزى حابارلادى. ولاردىڭ ايتۋىنشا, روللس بارلىق شارتتارعا كەلىسكەن» دەپ جازدى مەننيكس.

35 جاستاعى روللس ەكىنشى ورتا سالماقتا جۇدىرىقتاسادى. جەكپە-جەكتەرىنىڭ باسىم بولىگىن كانادادا وتكىزىپ, اقش-تا التى رەت عانا شارشى الاڭعا شىعىپتى. كارەراسىندا 19 كەزدەسۋ وتكىزىپ, بارلىعىندا جەڭىسكە جەتكەن. بىراق ون راۋندتىق العاشقى كەزدەسۋىنە 2018 جىلى شىققان.

اباي قازبەكۇلى 

بولىسۋ: