«قايراتتىڭ» ۋكراينالىق شابۋىلشىسى: اگرەسسور ەلدىڭ (رەسەي) چەمپيوناتىندا وينامايمىن (ۆيدەو)

504
0
بولىسۋ:

الماتىلىق «قايراتتىڭ» شابۋىلشىسى ادەرينسولا ەسەولا وزىنىڭ كومانداداعى جاعدايى, رەسەيگە قاتىستى كوزقاراسى جانە اندرەي ارشاۆينمەن قارىم-قاتىناسى جايلى ايتىپ بەردى.

فۋتبولشى Sport24.ru سايتىنا بەرگەن سۇحباتىندا كوپ نارسەنى اعىنان جارىلىپ بايان ەتكەن.

– ارشاۆين – ۇلى ويىنشى جانە ۇلكەن ادام. ناعىز فۋتبول مامانى. مەن ودان كوپ نارسەنى ۇيرەندىم. بىرىنشىدەن, ول قانداي جاعدايعا قاراماستان وتە مۇقييات جاتتىعۋ جاسايدى. ول كەيدە ايعايلاسا دا تۇسىنىستىكپەن قارايمىن. ونىڭ ايعايى مەنى مىقتى ەتە تۇسەتىن. بارى فۋتبول ۇشىن.

«زەنيتتىڭ» قۇپييالارىن اشتى ما?

– كوپ نارسەنى ايتاتىن. ۇجىمنىڭ جاقسى ەكەنىن ايتتى. سوسىن «ارسەنالدا» جۇرگەندە نيكلاس بەندتنەردى قالاي ورمان ىشىندە جوعالتىپ العان ەكەن. ارسەن ۆەنگەن تابيعات اياسىنا, اسىرەسە ورمان ىشىنە ساياحات جاساعاندى ۇناتقان. سونداي كۇندەردىڭ بىرىندە بەندتنەر اداسىپ كەتكەن. كۇنى بويى ىزدەپ تابا الماي قويىپتى.

2014 جىلى مايدان كەزىندە سەن كيەۆتە بولدىڭ با?

– ادامداردى سنايپەرمەن اتقاننان كەيىن بىردەن ۇشىپ كەتتىم. بىرنەشە كۇننەن سوڭ. ەلدە نە بولىپ جاتقانىن ەشكىم تۇسىنگەن جوق. سول كەزدە ەلگە ۇلكەن وزگەرىستەر كەرەك ەكەنىن تۇسىندىم. سوعىس بولىپ, ادامداردىڭ اجال قۇشىپ جاتقانى وكىنىشتى. مەن سوعىسقا قارسى اداممىن.

قالىپتى ومىردە ورىستارمەن ارا-قاتىناسىڭ وزگەردى مە?

– ارينە, وزگەردى. بارى وسى تاقىرىپتا اڭگىمە ايتادى. ۇنەمى. بۇل تاقىرىپتان اينالىپ وتە المايمىز. بىراق ارشاۆينمەن بۇل جايىندا تەرەڭ سويلەستىك دەي المايمىن. بىرقالىپتى پىكىرلەستىك, بىراق رەنىشكە بارمادىق. ونىڭ ۇستىنە بۇل كەلىسپەۋشىلىككە دال بىزدىڭ قاتىسىمىز جوق. سوندىقتان ارامىزدا بارى بەيبىت شەشىلدى.

ەگەر رەسەيدەن ۇسىنىس كەلسە نە ىستەيسىڭ?

– رەسەي – اگرەسسور ەل. مەن ول چەمپيوناتقا بارماس ەدىم.

ۋكرايناداعى پرەزيدەنت سايلاۋىندا داۋىس بەردىڭ بە?

– جوق, ونداي مۇمكىندىك بولمادى. بىراق بۇل ازاماتتىق مىندەتىمدى ورىنداۋدى قالايمىن. ىشتەي داۋىس بەردىم. سول ادام جەڭەدى دەپ سەنەمىن.

قانە تاۋىپ كورەيىن. بۇل ادام ەكىنشى تۋرعا شىقتى, بىراق الى پرەزيدەنت بولعان جوق?

– دال تۇستىڭىز! (سوز ۆلاديمير زەلەنسكيي تۋرالى بولىپ وتىر)

بالالىق شاعىڭ قالاي وتتى?

– بالالىق شاعىم وزگە بالالار سەكىلدى وتتى. كوپقاباتتى ۇيدىڭ اۋلاسىندا وستىم. وزگەلەرگە ۇقساماعاندىقتان وزىمدى ەرەكشە سەزىنگەن كەزدەرىم دە بار. قىزدار قىزىعا قارايتىن.

فۋتبولعا دەيىن جەڭىل اتلەتيكامەن اينالىسىپسىڭ. جىلدامدىق اكەدەن بەرىلگەن قاسيەت پە?

– مەن بيولوگ ەمەسپىن. بىراق فيزيكالىق قابىلەتتەرىم – افريكالىق تەگىمنەن دارىعان سيياقتى. اكەمنەن, اتامنان. يا, مەن فۋتبولعا بىردەن بارمادىم. مەكتەپ ارالىق جارىس كەزىندە جۇگىرۋدەن الدىڭعى ورىن الاتىنمىن. سويتىپ, جەڭىل اتلەتيكاعا بارعانمىن. كەيىن مەنى اكەم فۋتبولمەن اينالىسۋعا كوندىردى.

«دينامودان» نەگە كەتىپ قالدىڭ?

– ول جاقتا مەن, بادر ال-كاددۋري جانە تاعى بىر ويىنشى مىقتى بولدى. بىراق باپكەر ۆلاديمي مۋنتيانمەن تىل تابىسا المادىم. داۋلاسىپ, ويناماي قويدىم. سول جەردە قالىپ, وز-وزىمدى دالەلدەۋدىڭ ورنىنا اقىماقتىق جاساپ كەتىپ قالدىم. ال مۋنتياندى از ۋاقىتتان سوڭ ورنىنان الىپ تاستادى.

سوسىن يتاليياعا كەتتىڭ?

– يتاليياعا اتتانۋ – مۇلدە دۇرىس قادام بولمادى. جاستىق شاقتاعى ماكسيماليزم اسەرىمەن ىستەگەن ىس. كەيىن ول جاقتا ويناۋدىڭ تىپتى مۇمكىن ەمەس ەكەنىن تۇسىندىم. سەبەبى, ول جەردە ليميت وتە قاتاڭ. ەكى-اق ورىن. ونىڭ وزىن توپ-فۋتبولشىلار يەمدەنەدى. دەڭگەيى تومەن كوماندالاردىڭ وزىندە قاتاڭ تارتىپ ورناعان. يتالييادان كەلگەن سوڭ بىر جىلداي كومانداسىز جۇردىم. موتوجارىسقا قاتىستىم.

كيەۆ چەمپيوناتىندا ويناپ جۇرگەنىڭدە اقشا تاپتىڭ با?

– جىگىتتەر مەنى فۋتبولعا ورالۋىمدى وتىندى. ولار كيەۆتىك «ارسەنالدى» قالپىنا كەلتىردى. مەنىڭ دە ۇمىتىم وياندى. جاعدايدى دا جاسادى. وسىلايشا بىرىنشى ليگاعا ورالدىم. يزرايلگە بارىپ حايفالىق «ماككابيدىڭ» قارالىمىنان وتتىم. ول جاقتاعى ستاديون, اتموسفەرانى اۋىزبەن ايتىپ جەتكىزۋ قيىن.

پرەمەر-ليگا دەڭگەيىنە جەتكەندە وزىڭدى قالاي سەزىندىڭ?

– «الەكساندرييامەن» العاشقى ويىنعا شىققانىمدا وزىمدى ليدەر سەزىنە المادىم. بىرتۇرلى جايسىزدىقتى بايقادىم.

قازاقستانعا قالاي تاپ بولدىڭ?

– ول وزى بىر قىزىق وقيعا: «ارسەنالدان» مەنى ساتىپ الىپ, ەكى رەت قايتارىپ بەردى. بىراق ول كوماندامەن قارجىلىق جاعدايعا بايلانىستى كەلىسە المادىق. تاڭداۋدا قازاقستان مەن شۆەتسييا تۇردى. «اقجايىقتى» جاتتىقتىراتىن ۋكراينالىق مامان ۆلاديمير مازيار مەنى جاقسى تانيتىن. ناتيجەسىندە اگەنت پانكوۆ بىرەر مينۋت ىشىندە-اق كەلىسىپ بەردى. كۇتپەگەن جاعداي!

«اقجايىقتا» جۇرىپ 13 ماتچتا 8 گول سوقتىڭ. سوسىن ىلە-شالا «قايراتقا» اۋىستىڭ. ەۋروپا ليگاسى اياسىندا «از»-عا قارسى وتكىزگەن كەزدەسۋدى كارەراڭداعى ەڭ ۇزدىك ويىن دەپ باعالاۋعا بولا ما?

– ارينە, بۇل سوڭعىسى ەمەس دەپ ۇمىتتەنەمىن. سول كەزدە وزىمدى شابۋىلشى سەزىندىم. ومىردە بىر نارسەنىڭ قولىمنان كەلەتىنىنە سەنە باستادىم. قۋانىش, ەيفورييا قاتتى سەزىلدى. وسى قارقىندى جالعاستىرعىم كەلەدى.

اۋدارعان اباي قازبەكۇلى

بولىسۋ: