پوروشەنكو مەن زەلەنسكيي تىكەلەي ەفيردە سوزگە كەلىپ قالدى (ۆيدەو)

763
0
بولىسۋ:

ۋكرايناداعى پرەزيدەنت سايلاۋىنىڭ ەكىنشى تۋرى قارساڭىندا كانديداتتار پەتر پوروشەنكو مەن ۆلاديمير زەلەنسكيي 1+1 تەلەارناسىنىڭ ەفيرىندە بىر-بىرىمەن سوزگە كەلىپ قالدى.

پەتر پوروشەنكو تەلەارنا ۇسىنىسىن قابىل الىپ ستۋديياعا كەلگەن. الايدا ونىڭ قارسىلاسى ۆلاديمير زەلەنسكيي بۇل جولى توبە كورسەتكەن جوق. جۋرناليستەر زەلەنسكييگە تەلەفون ارقىلى حابارلاسىپ, سويلەسۋ مۇمكىندىگىنە يە بولعان. سويلەسۋ بارىسىندا شوۋمەن وزىنىڭ قازىر فرانتسييادا جۇرگەنىن ايتادى.

جۋرناليستەن كەيىن سوز العان پوروشەنكو قارسىلاسىمەن تەلەدەبات جايىندا سوز قوزعاپ, ونى 14 ساۋىر كۇنىنە كەزدەسۋگە شاقىرعان. الايدا زەلەنسكيي پوروشەنكونى 14-ى ەمەس, 19 ساۋىر كۇنى «وليمپييسكيي» ستاديونىندا كۇتەتىنىن ايتقان. پوروشەنكو وز دەگەنىنەن قايتپاي زەلەنسكييگە تالاپ قويا باستايدى.

«ۆلاديمير الەكساندروۆيچ, مەن بۇگىن سىزدى دەباتقا شاقىردىم. ەگەر سىز قازىر كيەۆتەن تىسقارى جەردە بولساڭىز مەن ونى تۇسىنىستىكپەن قابىلدايمىن. جانە سىزدىڭ كومانداڭىزعا 14 ساۋىر كۇنى ستاديوندا كەزدەسۋ تۋرالى ايتىلعان. ەرتەڭ سىزدىڭ كيەۆكە ورالۋىڭىزعا مۇمكىندىك بار» دەيدى پوروشەنكو.

«پرەزيدەنت پەتر الەكسەەۆيچ پوروشەنكو مىرزا مەنىڭ دال قازىر پاريجدە ەكەنىمدى جاقسى بىلەدى. ويتكەنى ۋكراينا قاۋىپسىزدىك قىزمەتىنىڭ اۆتوموبيلدەرى مەنى اۋەجايعا شىعارىپ سالدى. بۇل اقپارات سىزگە مالىم. ەرتەڭ ساعات 15:00-گە فرانتسييا پرەزيدەنتىمەن كەزدەسۋ بەلگىلەنگەن. سوندىقتان ستۋديياعا كەلۋدىڭ ەش ىڭعايى جوق. دەباتقا كەلەتىن بولساق, مەن پوروشەنكو مىرزانى 19 ساۋىر كۇنى «وليمپييسكيي» ستاديونىنا شاقىرعان بولاتىنمىن. ول «ستاديون بولسا ستاديون بولسىن» دەپ كەلىستى جانە بۇل شارتتى قابىل الدى. دەمەك, 19 ساۋىر كۇنى مەن سىزدى «وليمپييسكيي» ستاديونىندا كۇتەمىن. نۇكتە. ساۋ بولىڭىز» دەپ تۇتقانى تاستاي سالعان.

ەسكە سالساق, ۋكرايناداعى پرەزيدەنت سايلاۋىنىڭ ەكىنشى تۋرى 21 ساۋىردە وتەدى. بىرىنشى تۋردىڭ قورىتىندىسى بويىنشا زەلەنسكيي سايلاۋشىلاردىڭ 30,24 پايىز داۋىسىن جيناسا, پوروشەنكو 15,95 پايىز داۋىس جيناپ, ەكىنشى ورىن الدى. ەندى مەملەكەت باسشىسىنىڭ كىم بولاتىنى ەكىنشى تۋردان كەيىن انىقتالماق.

اباي قازبەكۇلى 

بولىسۋ: