شاكارىمنىڭ ەسكەرتكىشىن العىسى كەلگەندەردىڭ ارمانى ورىندالمادى

1970
0
بولىسۋ:

سەمەيدەگى قاراۋسىز قالعان جالعىز ورتالىق ساياباعى كوركەيەتىن بولدى. جوبالاۋشىلار مەن كافە يەلەرى, جەرگىلىكتى اتقارۋشى بيلىك پەن باق وكىلدەرى ورتالىق ساياباقتا باس قوسىپ, پروبلەمالىق دۇنيەلەردى تالقىعا سالدى. جيىنعا قالا اكىمى ەرماك سالىموۆ تە قاتىستى.

ساياباقتى جوندەۋ وز الدىنا, بۇدان ەكى جىل بۇرىن وسىندا تۇرعان شاكارىمنىڭ ەسكەرتكىشىن الىپ تاستاپ, ورنىنا لوندون قالاسىنداعىداي Big Ben سيياقتى بيىك ساعات مۇناراسىن ورناتامىز دەگەندەر شىققان بولاتىن. بۇعان نارازىلىق بىلدىرگەن سەمەيدىڭ زييالى قاۋىمى, ارداگەر-اقساقالدار وز پىكىرلەرىن ايتقان بولاتىن. ساياباقتى ارالاۋ بارىسىندا وسىنىڭ بارلىعى دا نازارعا الىندى.

 قالا اكىمىنىڭ ايتۋىنشا, شىرىگەن, ەسكىرگەن اعاشتار پاتولوگييالىق تەكسەرۋدەن وتكەن سوڭ عانا كەسىلىپ الىنادى. جوبالاۋشى مەكەمە وكىلدەرىنىڭ ايتۋىنشا, ساياباق 4 ايماققا بولىنبەك. بالالار جانە سپورت الاڭدارى, امفيتەاتر پايدا بولماق. ساياباقتىڭ اۋماعىندا زاماناۋي سۋبۇرقاقتار مەن ورىندىقتار قويىلماق. ەسكى ورىندىقتار الىنىپ تاستالادى. بۇرىندارى ورتالىق ساياباقتىڭ جارىقتاندىرۋى اقساپ جاتاتىن. ەندى جارىق ديودتى شامدار ورناتىلاتىن بولدى.

– ساياباقتا فۋتبول, باسكەتبول, ۆولەيبول الاڭدارى مەن سكەيت الاڭدار ورناتامىز, – دەدى جوبالاۋشى كومپانييا جەتەكشىسىنىڭ ورىنباسارى مارات جۇماعۇلوۆ. – بالالار وينايتىن الاڭداعى اتكەنشەكتەر اتاۋلى تابيعي ماتەريالدان جاسالادى. ەرەسەكتەۋ بالالار ۇشىن بي الاڭى مەن شاحمات تاقتايلارىن ورناتامىز.

بۇرىندارى كورىنگەن جەردە بەي-بەرەكەت ساتىلىپ تۇراتىن تاتتىلەر مەن بالمۇزداق دۇڭگىرشەكتەرى جوندى قالىپقا كەلتىرىلەتىن بولادى. دەسە دە, كافە, مەيرامحانا سيياقتى بارلىق كوڭىل كوتەرۋ ورىندارى وز ورىندارىندا قالاتىن بولدى. بىراق, ولار ساياباققا قاتىسسىز جەكە قورشاۋمەن قورشالىپ, ەسىگى باسقا جاقتان شىعارىلاتىن بولدى.

قالا اكىمىنىڭ شەشىمىمەن ساياباقتىڭ ورتاسىندا تۇرعان شاكارىم ەسكەرتكىشى الىنىپ تاستالمايتىن بولدى. شاكارىم قاجى ەسكەرتكىشى جاڭا جوبا بويىنشا بۇرىنعى ورنىندا قالادى. ساياباقتى كوركەيتۋ 3 ايعا سوزىلماق. جوندەۋ جۇمىستارى كەزىندە ساياباق جابىق بولادى.

راۋشان نۇعمانبەكوۆا,
سەمەي.

بولىسۋ: