ۋكرايناداعى سايلاۋ: ەكزيت-پولدىڭ العاشقى ناتيجەسى جارييالاندى (فوتو)

952
0
بولىسۋ:

ۋكراينادا پرەزيدەنتتىك سايلاۋعا داۋىس بەرۋ تولىقتاي اياقتالدى. قازىر ەلدەگى بارلىق سايلاۋ ۋچاستكەلەرى جابىلعان.

ۇلتتىق ەكزيت-پول داۋىس بەرۋدىڭ العاشقى ناتيجەلەرىن دە جارييالادى. ونىڭ قورىتىندىسى بويىنشا, ۆلاديمير زەلەنسكيي 30,4 پايىزبەن كوش باستاپ كەلە جاتىر. ەكىنشى ورىندا 17,8 پايىزبەن پەتر پوروشەنكو. ال يۋلييا تيموشەنكودا 14,2 پايىز.

وزگە كانديداتتاردىڭ ناتيجەسى مىناداي:

يۋريي بويكو – 9,8%

اناتوليي گريتسەنكو – 7,1%

يگور سمەشكو – 6,4%

ولەگ لياشكو – 4,8%

الەكساندر ۆيلكۋل – 4%

رۋسلان كوشۋلينسكيي -1,8%.

«سوتسيس» ەكزيت-پول مالىمەتى بويىنشا زەلەنسكيي – 29,25 پايىز, پەتر پوروشەنكو 19,19 پايىز, ال يۋلييا تيموشەنكو 13,75 پايىز.

ۆلاديمير زەلەنسكيي ەكزيت-پول ناتيجەسىنە قاتىستى پىكىر بىلدىردى.

«بۇل ۇلكەن جەڭىسكە جاسالعان قادام. شىنايى داۋىس بەرگەن بارشا ۋكرايندىقتارعا العىس ايتامىن. ەكزيت-پول كوپ, جەڭىمپاز – بىرەۋ» دەدى ول.

«باتكيۆششينا» پارتيياسىنىڭ ليدەرى يۋلييا تيموشەنكو بولسا, ەكزيت-پول ناتيجەلەرىمەن كەلىسپەيتىنىن مالىمدەدى.

«ەكزيت-پولدا پەتر پوروشەنكونىڭ ەكىنشى ورىندا تۇرعانىنا اڭ-تاڭبىز. بىزدىڭ باعالاۋىمىز مىنا ناتيجەلەرگە سايكەس كەلمەيدى. بىزدىڭ كوماندا دا جالپى قامتىلعان ەكزيت-پول جۇرگىزدى» دەيدى تيموشەنكو.

ولاردىڭ باعالاۋىنشا ناتيجەلەر بىلاي تۇزىلۋى تيىس:

ۆلاديمير زەلەنسكيي – 27%

يۋلييا تيموشەنكو – 20,9%

پەتر پوروشەنكو -17,5%.

بريفينگ جاساعان پەتر پوروشەنكو سايلاۋدىڭ العاشقى ناتيجەلەرىنە بايلانىستى پىكىر بىلدىردى.

«39 كانديداتتى اجىراتا بىلىپ, ەكىنشى تۋردى كۇتپەي-اق قازىردىڭ وزىندە ۋكراينانىڭ ەۋروپالىق وداق پەن ناتو-عا مۇشە بولۋىن قولداعان جانە رف-دان بىرجولا تاۋەلسىزدىك الۋىمىزعا نيەتتەس سايلاۋشىلارعا العىس ايتامىن. ەكىنشى تۋردا ونداي ادامداردىڭ سانى ارتا تۇسەدى دەپ ۇمىتتەنەمىن.

بۇل الى جەڭىس ەمەس, بىراق جەڭىسكە جاسالعان ۇلكەن قادام.

ەشقانداي ەيفورييانى سەزىنبەيمىن. قوعامنىڭ بيلىككە بىلدىرىپ وتىرعان سيگنالىن تۇسىنەمىن. بۇل قاتەمەن جۇمىس ىستەۋگە بەرىلگەن مۇمكىندىك. بىراق ەشتەڭە ىستەمەگەن ادام عانا قاتەلەسپەيدى. مەن وز جۇمىسىمدا رەيتينگكە ارتىقشىلىق بەرگەن ەمەسپىن.

ەرتەڭگى كۇننەن باستاپ ەكىنشى تۋردا جەڭىسكە جەتۋ ۇشىن كۇرەستى باستايمىن» دەدى پوروشەنكو.

فوتو: Reuters

اباي قازبەكۇلى

بولىسۋ: