ۋكرايناداعى سايلاۋ: كانديداتتار داۋىس بەرە باستادى (فوتو, ۆيدەو)

513
0
بولىسۋ:

تاڭعى 8-دەن باستاپ ۋكرايناداعى بارلىق سايلاۋ ۋچاستكەلەرى اشىلىپ, جۇمىستارىن باستادى. العاشقىلاردىڭ بىرى بولىپ داۋىس بەرگەندەردىڭ قاتارىندا – كيەۆ مەرى ۆيتاليي كليچكو دا بار.

ول تاڭعى ساعات 8:15-تە سپورتتىق كوستيۋمدى كيىپ كەلىپ داۋىس بەرگەن.

پرەزيدەنتتىككە كانديداتتاردىڭ بىرى يۋريي بويكو دا تاڭعى 8:34-تە يۆانكوۆيچي اۋىلىنداعى سايلاۋ ۋچاستكەسىنە كەلىپ داۋىس بەرگەن.

ساعات 9:22-دە راديكالدى پارتييانىڭ ليدەرى, پرەزيدەنتتىككە ۇمىتكەر ولەگ لياشكو زايىبىمەن بىرگە داۋىس بەرۋگە كەلدى.

ساعات 10:16-دا №100 ليتسەيدە (كيەۆ) ورنالاسقان سايلاۋ ۋچاستكەسىنە پرەزيدەنتتىككە كانديدات, «باتكيۆششينا» پارتيياسىنىڭ ليدەرى يۋلييا تيموشەنكو كۇيەۋىمەن بىرگە كەلىپ داۋىس بەردى. ونى كوپتەگەن جۋرناليستەر كۇتىپ الدى.

«قادىرلى دوستار! بۇگىن مەن وز كومانداممەن بىرگە ۋكراينا ۇشىن داۋىس بەرۋگە كەلدىم. مەن بىزدىڭ مىقتى, دامىعان, ەۋروپالىق ۋكرايناعا اينالارىمىزعا سەنەمىن. بۇگىننەن باستاپ بىزدىڭ ەلىمىزدىڭ تابىس پەن وركەندەۋگە تولى جاڭا تاريحي كەزەڭى باستالادى. جاساسىن ۋكراينا!» دەدى تيموشەنكو داۋىس بەرۋ راسىمىنەن كەيىن وز جاقتاستارىنىڭ الدىندا.

سونداي-اق پرەزيدەنتتىككە كانديداتتاردىڭ بىرى الەكساندر ۆيلكۋل دا داۋىس بەرۋگە كەلدى.

ۇلتتىق پوليتسييا قىزمەتىنىڭ مالىمەتىنشە, سايلاۋعا قاتىستى 25 تۇرلى زاڭ بۇزۋشىلىق بولعانى جايلى اقپار كەلىپ تۇسكەن. ولاردىڭ ىشىندە – زاڭسىز ۇگىت جۇرگىزۋ, بيۋللەتەندى سۋرەتكە تۇسىرىپ الۋ, سايلاۋشىلاردى ساتىپ الۋ جانە بيۋللەتەندەردى سايلاۋ ۋچاستكەسىنەن تىسقارى الىپ شىعۋ ارەكەتتەرى بار.

ەلدەگى سايلاۋ ۋچاستكەلەرى تاڭعى 8:00-دەن كەشكى 20:00-گە دەيىن ۇزىلىسسىز جۇمىس ىستەيدى.

بيىل رەسەي تەرريتوريياسىندا داۋىس بەرۋ مۇمكىن ەمەس. سونداي-اق وسى جولى رەسەي ەلىنەن باقىلاۋشىلار دا قاتىستىرىلمايدى. سەبەبى, اگرەسسور مەملەكەتتىڭ وكىلدەرى ەلدەگى سايلاۋعا اسەرىن تيگىزبەۋى تيىس دەپ ەسەپتەيدى ۋكراينا. ال جالپى, ورتالىق سايلاۋ كوميسسيياسى (وسك) ەل بويىنشا 199 سايلاۋ وكرۋگىن قۇرىپ, 29 888 سايلاۋ ۋچاستكەسىن جابدىقتاعان. شەتەلدەردەگى سايلاۋ بەكەتتەرىنىڭ سانى – 101.

وقي وتىرىڭىز – ۋكرايناداعى سايلاۋ: كانديداتتار اراسىنداعى داۋ

وسك 2 مىڭ 344 شەتەلدىك جانە حالىقارالىق ۇيىمداردان كەلگەن وكىلدەردى تىركەگەن. سايلاۋ كۇنى قاۋىپسىزدىكتى قامتاماسىز ەتۋ ماقساتىندا 135 مىڭنان استام قۇقىق قورعاۋشى جۇمىس ىستەيدى.

جالپى, ۋكراينا پرەزيدەنتىن تاڭداۋعا الەمنىڭ 72 ەلىندەگى ۋكرايندىقتار قاتىسا الادى. بىراق ار مەملەكەتتەگى مۇمكىندىك ارتۇرلى. ماسەلەن, اۆسترالييادا بىر ەلگە بىر عانا سايلاۋ ۋچاستكەسى قاراستىرىلسا, اقش-تا تورت سايلاۋ بەكەتى بەلگىلەنگەن.

سوعىس قيمىلدارى جۇرىپ جاتقان ايماقتاردا اسكەريلەر 79 ارنايى سايلاۋ ۋچاستكەسىن قۇرعان. ولار سول جەردە داۋىس بەرە الادى (ەگەر مۇمكىندىك بولسا).

وقي وتىرىڭىز – ۆلاديمير زەلەنسكيي: ەگەر بىز جەڭەتىن بولساق – بۇل قىرىمدى قايتارىپ الۋعا دەگەن العاشقى قادام بولماق

وسى جولعى بيۋللەتەن كولەمى تاۋەلسىز ۋكراينا تاريحىنداعى رەكوردتىق ولشەمگە يە. ونىڭ ۇزىندىعى – 80 سانتيمەتر.

سايلاۋدىڭ العاشقى ناتيجەلەرى ورتالىق سايلاۋ كوميسسيياسىنىڭ سايتىندا 1 ساۋىرگە قاراعان تۇنى پايدا بولا باستايدى. بىراق بۇل تولىققاندى ەمەس, نەبارى الدىن الا مالىمەتتەر عانا. داۋىس بەرۋدىڭ تولىق ناتيجەسى 10 ساۋىرگە دەيىن جارييالانۋى تيىس.

ۇلتتىق ەكزيتپول 19:45-تە باسپاسوز ماسليحاتىن وتكىزەدى. تۋرا 18:00-دەگى داۋىس بەرۋ ناتيجەلەرىن كەشكى ساعات 20:00-دەن كەيىن حابارلايدى. ال 20:00-دەگى جاعدايدى حالىق 23:00-دەن كەيىن بىلە الادى.

ەگەر كانديداتتاردىڭ ەشقايسىسى 50 پايىز +1 داۋىس سحەماسىنا قول جەتكىزە الماسا, وندا ەكىنشى تۋر بولادى. ەكىنشى تۋرعا ەڭ كوپ داۋىس جيناعان ەكى كانديدات وتەدى. ەكىنشى تۋر 21 ساۋىر كۇنى وتۋى تيىس. ال جاڭا پرەزيدەنتتىڭ ەسىمى 1 مامىر كۇنى انىقتالادى. جاڭا مەملەكەت باسشىسىن ۇلىقتاۋ راسىمى 31 مامىرعا دەيىن وتۋى تيىس.

فوتو: Reuters © Vasily Fedosenko

فوتو: Unian.net Reuters

اباي قازبەكۇلى

بولىسۋ: