ۋكرايناداعى سايلاۋ: كانديداتتار اراسىنداعى داۋ

652
0
بولىسۋ:

ۋكراينادا پرەزيدەنت بولۋعا كانديداتتار «وبششەستۆەننىي» تەلەارناسىنداعى «وبراتنىي وتسچەت» باعدارلاماسىنداعى ساياسي دەباتقا كەلمەي قويدى.

دەباتقا كەلۋدەن باس تارتقانداردىڭ ىشىندە باستى ۇمىتكەرلەر پەتر پوروشەنكو مەن ۆلاديمير زەلەنسكيي بار. ستۋديياعا كەلگەن ەكس-پرەمەر جانە «باتكيۆششينا» پارتيياسىنىڭ ليدەرى يۋلييا تيموشەنكو از ۋاقىتتان سوڭ كەتىپ قالعان.

«مەن شاقىرتۋدى قۇرمەتتەيمىن. مەن كەلدىم. بىز جەڭگەننەن كەيىن وسى ستۋديياعا كەلۋگە دايىنمىن. العىسىم زور. بىراق ماعان تۇسىنىستىكپەن قاراڭىزدار» دەگەن تيموشەنكو.

وقي وتىرىڭىز – ۆلاديمير زەلەنسكيي: ەگەر بىز جەڭەتىن بولساق – بۇل قىرىمدى قايتارىپ الۋعا دەگەن العاشقى قادام بولماق

سوڭعى دەرەكتەر بويىنشا پرەزيدەنتتىك سايلاۋدا ۆلاديمير زەلەنسكيي وزا شابۋى مۇمكىن. بۇل جاعدايدا پوروشەنكو باسقا ۇمىتكەر تيموشەنكومەن بىرگە ەكىنشى جانە ۇشىنشى ورىنداردى بولىسۋى ىقتيمال. «رەيتينگ» الەۋمەتتىك توبىنىڭ ساۋالناماسىنا سايكەس زەلەنسكيي ازىرگە 26,6 پايىزبەن بىرىنشى ورىندا تۇر. ال پوروشەنكو مەن تيموشەنكونىڭ ەنشىسىنە 17 پايىزدان تيگەن.

ەسكە سالساق, ۋكرايناداعى سايلاۋ ەرتەڭ, 31 ناۋرىز كۇنى وتكىزىلەدى. قاجەت بولعان جاعدايدا ەكىنشى تۋر 21 ساۋىرگە بەلگىلەنگەن. مەملەكەت باسشىسى قىزمەتىنە 39 كانديدات تالاس جۇرگىزەدى.

اباي قازبەكۇلى

بولىسۋ: