جاستارعا بولىنگەن 24,6 ملرد تەڭگە قايدا جۇمسالادى?..

764
0
بولىسۋ:

ۇكىمەت وتىرىسىندا جاستار جىلىن وتكىزۋ جونىندەگى جول كارتاسىنا ارنالعان تولىقتىرۋلار ماقۇلداندى. بۇل قۇجات جاستاردىڭ تابىستى الەۋمەتتەنۋى ۇشىن جاعدايلار جاساۋعا جانە ونىڭ الەۋەتىن ەلدىڭ ودان ارى دامۋىنا باعىتتاۋعا ىقپالىن تيگىزەدى. سونىمەن…

بىرىنشى. بىلىم جانە عىلىم مينيسترلىگىمەن بىرلەسىپ, جاس قازاقستاندىقتاردىڭ كاسىپتىك باعدارىن انىقتاۋعا باعىتتالعان «وزىڭدى تاپ» جوباسىن ىسكە قوسۋ. ياعني جاستارعا وزى قىزىعاتىن دۇرىس ماماندىق تاڭداۋىنا باعىت بەرۋ كەرەك.

ەكىنشى. ەلىمىزدىڭ ايماقتارىندا بۇركىتشىلەر ورتالىعىن اشۋ جانە دامىتۋ شارالارىن قابىلداۋ. جاتتىعۋ ورتالىقتارىن اشىپ, تۇرلى دەڭگەيدەگى جارىستار وتكىزىپ قانا قويماي, مادەنيەت جانە سپورت مينيسترلىگىمەن بىرىگىپ بۇل كونە ونەردى قازاقستانداعى ەتنوتۋريزمنىڭ ماڭىزدى ەلەمەنتىنە اينالدىرۋ جوسپارلانعان.

ۇشىنشى. وزىن-وزى قورعاۋ بويىنشا تەگىن شەبەرلىك-سىنىپتارىن وتكىزۋدى قاراستىرۋمەن جاستارعا ارنالعان سپورتتىق كلۋبتاردى دامىتۋ بويىنشا تيىستى شارالار قابىلداۋ.

تورتىنشى. ەلىمىزدەگى جوو-لارمەن جانە كوللەدجدەرمەن بىرىگىپ «ستۋدەنتتىك باستاما» دەپ اتالاتىن جالپىرەسپۋبليكالىق ۆولونتەرلەر قوزعالىسىن جانە جاس ۆولونتەرلەر بازاسىن قۇرۋ. وسىلايشا, مۇمكىندىگى شەكتەۋلى جاندارعا, قارتتارعا, جەتىمدەر مەن جالعىزباستى, ۇيسىز-كۇيسىز ادامدارعا كومەك كورسەتۋ.

بەسىنشى. مەديا سالانىڭ كەلەشەگىنەن ۇمىت كۇتتىرەتىن جاس وكىلدەرىن تارتا وتىرىپ, قازاقستان ۇلتتىق برەندىن العا جىلجىتۋعا باعىتتالعان جاڭا قۇرالدار جاساۋ.

وسىلايشا, بۇگىنگى تاڭدا جول كارتاسىنىڭ جوباسى 89 تارماقتان تۇرادى جانە بەس باعىتى بار.

بىرىنشى باعىت – ەڭبەك ەتىپ جۇرگەن جاستاردى باسپانامەن قامتاماسىز ەتۋ. نۇر-سۇلتان, الماتى مەن شىمكەنت قالالارىندا جىل سايىن جاس ماماندارعا ارنالعان مىڭعا جۋىق جالعا بەرىلەتىن تۇرعىن ۇي تۇرعىزۋ جوسپارلانعان. ول باسپانالار كاسىپورىنداردا, اۋىل شارۋاشىلىعى مەن بيۋدجەتتىك مەكەمەلەردە, عىلىم سالاسىندا جۇمىس ىستەيتىن جاس ماماندارعا, جاڭا ىس باستاعان كاسىپكەرلەرگە ارنالىپ سالىنادى. وتباسىنداعى بالا سانى, ارنايى كۇتىمدى قاجەت ەتەتىن بالا تاربيەلەپ وتىرعاندار, تولىق ەمەس وتباسىلار جانە تاعى باسقا فاكتورلار دا ەسكەرىلەتىن بولادى.

ەكىنشى باعىت – جاستاردى ەڭبەكپەن قامتۋ. «جاس كاسىپكەر» باعدارلاماسىن جۇزەگە اسىرۋ قاراستىرىلعان. ۇش جىلدىڭ ىشىندە 60 مىڭنان استام جاس كاسىپكەرلىك نەگىزدەرى بويىنشا وقىتىلادى. اۋىلداعى جاستارعا 15 مىڭ شاعىن نەسيە بەرۋ جوسپارلانعان. ال جاڭا بيزنەس-يدەيالاردى جۇزەگە اسىرۋ ۇشىن 30 مىڭنان اسا مەملەكەتتىك گرانت بولىنەدى.

ۇشىنشى باعىت – بىلىم بەرۋ مەن ۆولونتەرلەر ۇيىمدارىن دامىتۋ. قازىر «جاس مامان» دەپ اتالاتىن باعدارلاما ازىرلەنىپ جاتىر. وسى باعدارلاما ارقىلى سۇرانىسقا يە 100 يندۋستريالدى جانە سەرۆيستىك كاسىپ بويىنشا ماماندار دايىندالادى. بۇل باعىتتاعى جۇمىستار 3 جىل بويى ەلىمىزدەگى 20 الدىڭعى قاتارلى جوو مەن 180 كوللەدجدىڭ بازاسىندا, ەلىمىزدىڭ بارلىق وڭىرلەرىنەن 200 مىڭ جاستى قامتۋمەن جۇزەگە اسادى.
«اشىق ۋنيۆەرسيتەت» جوباسىنا بارلىق جوعارى وقۋ ورىندارى مەن كوللەدجدەردى قوسۋ دا جوسپارلانعان. سونىمەن قاتار ىرگەلى ارى قولدانبالى زەرتتەۋلەردى گرانتتىق قارجىلاندىرۋ جىلىنا 3 ميلليارد تەڭگەگە ۇلعايتىلاتىن بولادى. ۆولونتەرلىق شارالارعا بەلسەنە قاتىسىپ جۇرگەن ستۋدەنتتەردىڭ شاكىرتاقىسى 30%-عا كوبەيتىلەدى.

تورتىنشى باعىت – جاستاردىڭ الەۋمەتتىك بەلسەندىلىگىن دامىتۋ. «جاسىل ەل» قوزعالىسىنىڭ نەگىزىندە «جاسىل قالا – جاسىل اۋىل» جالپىۇلتتىق جوباسىن جۇزەگە اسىرۋ قاراستىرىلىپ وتىر. قۇرىلىس كومپانييالارىندا ستۋدەنتتىك قۇرىلىس وتريادتارى ۇشىن كۆوتا بولىنەدى. 2025 جىلعا دەيىنگى اسكەري-پاتريوتتىق تاربيەلەۋ باعدارلاماسى جانە تاعى باسقالارى ازىرلەنەدى.

بەسىنشى باعىت – بۇل جاس وتباسىلاردى, دەنساۋلىق پەن الەۋمەتتىك ينكليۋزيۆتىلىكتى قولداۋ بويىنشا شارالار كەشەنى. مىسالى, ايماقتىق جاستار چەمپيوناتى مەن ستۋدەنتتەر ۋنيۆەرسيادالارىن جاپپاي وتكىزۋ تاجىريبەسىن جاڭارتۋ جوسپارلانعان. جوسپاردىڭ اياسىندا بىرقاتار كەشەندى جوبالاردى جۇزەگە اسىرۋ قاراستىرىلعان. ولاردىڭ ىشىندە تۇرلى جاستار ساناتىن الەۋمەتتەندىرۋ, سۋيتسيدتىڭ الدىن-الۋ, وتباسى ينستيتۋتىن نىعايتۋ جانە وتباسىلىق قۇندىلىقتاردى العا جىلجىتۋ, دارىندى جاستاردى قولداۋ جانە تاعى باسقا باعىتتار بار.

 

قر پرەمەر-مينيسترىنىڭ ورىنباسارى گ. ابدىقالىقوۆا پارلامەنت سەناتىندا قارالىپ جاتقان رەسپۋبليكالىق بيۋدجەتكە وزگەرىستەردە جاستار جىلىن وتكىزۋگە 24,6 ملرد تەڭگە قاراستىرىلعانىن اتاپ وتتى جانە بارلىق مينيسترلىكتەردى جۇرگىزىلىپ جاتقان جۇمىستارعا بەلسەنە اتسالىسۋعا شاقىردى. بۇل ورايدا نەگىزگى ماسەلەلەر جاستاردى جۇمىس ورىندارىمەن قامتۋ, وز ىسىن اشۋعا گرانت ۇسىنۋ, جاستار ىس-تاجىريبەسى ماسەلەسىنە ەرەكشە كوڭىل بولۋ. سوندىقتان بۇل الەۋمەتتىك بلوك مينيسترلىكتەرىنە عانا ەمەس, باسقالارىنا دا قاتىستى.

بولىسۋ: