گرۋزييا فۋتبولشىسى شۆەيتساريياعا قارسى ماتچتا قارسىلاس ويىنشىنى ولىمنەن امان الىپ قالدى (ۆيدەو)

1191
0
بولىسۋ:

23 ناۋرىز كۇنى ەۋرو-2020 ىرىكتەۋ كامپانيياسى اياسىندا تبيليسيدە گرۋزييا مەن شۆەيتسارييا قۇرامالارى كەزدەسىپ, قوناقتار 2:0 ەسەبىمەن باسىم تۇستى.

ەكى گول دا ەكىنشى تايمدا سوعىلدى. الدىمەن ستيۆەن تسۋبەر ەسەپ اشسا, كەيىن دەنيس زاكارييا ەسەپتى ەسەلەي تۇسكەن. بىراق كەزدەسۋدىڭ باستى وقيعاسى ۇزىلىسكە دەيىن بولدى.

گرۋزييا قۇراماسىنىڭ جارتىلاي قورعاۋشىسى دجانو انانيدزە شۆەيتسارييا قۇراماسىنىڭ ويىنشىسى فابيان شەردى ولىمنەن قۇتقارىپ قالدى. بۇرىشتامادان اسىرىلعان دوپقا تالاسۋ كەزىندە شەر گرۋزين قورعاۋشىسى دجەمال تابيدزەمەن قاقتىعىسىپ قالىپ, الاڭعا قۇلاپ, بىردەن ەسىنەن تانىپ قالادى. قاتتى سوققىدان ەسەڭگىرەگەن شەر تىلىن جۇتىپ قويۋعا شاق قالعان. الايدا 26 جاستاعى دجانو انانيدزە قارسىلاس ويىنشىنىڭ قاسىنا بىردەن جەتىپ, ونىڭ تىلىن ساۋساعىمەن وڭەشىنەن الىپ شىعىپ, جۇتىلۋدان ساقتاپ قالادى. سويتىپ, الاڭعا مەديتسينالىق بريگادا جەتەمىن دەگەنشە شەردىڭ تىنىس الۋىنا جاعداي جاسايدى.

شەرمەن سوقتىعىسىپ قالعان تابيدزە دە بىراز ۋاقىت قيمىلسىز جاتادى. ونىڭ اق جەيدەسى قانعا مالىنعان. الايدا وسىنداي اۋىر جاراقاتقا قاراماستان ەكى فۋتبولشى دا ويىندى جالعاستىرادى. تابيدزە 60 مينۋتتا الاڭنان كەتسە, شەر 90 مينۋتتى تۇگەل ويناپ شىقتى. 23 جاستاعى تابيدزە «گەنت» كلۋبىنان 2017 جىلى اقپاندا «ۋفاعا» اۋىسىپ كەلگەن. وسى ماۋسىمدا ول 12 ماتچقا قاتىسىپ, ەكى رەت ناتيجەلى پاس بەردى.

«بۇل وتە اۋىر بولدى. مەنىڭ ەسىمدە ەشتەڭە جوق. بىرنەشە سەكۋندقا ەسەڭگىرەپ جاتىپ قالدىم. باس سۇيەگىم الى قاقساپ اۋىرىپ تۇر» دەپتى «نيۋكاسل» قورعاۋشىسى.

گرۋزييا قۇراماسىنىڭ باس باپكەرى ۆلاديمير ۆايسستىڭ ايتۋىنشا, «ۋفا» ساپىندا وينايتىن تابيدزە 26 ناۋرىز كۇنى يرلانديياعا قارسى بولاتىن ماتچقا قاتىسا المايدى.

«يرلانديياعا قارسى كەزدەسۋدە ماجبۇرلى تۇردە قۇرامعا وزگەرىس ەنگىزەمىز. تابيدزەنىڭ ميى شايقالعان. ول بىزبەن بىرگە دۋبلينگە بارا المايدى. وسى ەسەپتەن قۇراما ويىنىنا تاكتيكالىق تا وزگەرىس ەنەدى» دەيدى سلوۆاكييالىق مامان.

ماتچ قاھارمانىنا اينالعان دجانو انانيدزە رەسەي چەمپيوناتىنداعى «كرىليا سوۆەتوۆ» كلۋبىندا وينايدى. بۇعان دەيىن رەسەيلىك «سپارتاك», «روستوۆ» كوماندالارىنىڭ نامىسىن قورعاعان.

ۇلتتىق قۇراما ساپىندا وسىعان دەيىن 36 ويىن وتكىزىپ, 6 گول سوققان.

ازىرگە D توبىندا شۆەيتسارييا 3 ۇپايمەن كوش باستاپ كەلە جاتىر. ودان كەيىن ەنشىسىندە بىر جەڭىس بار يرلاندييا قۇراماسى. دانييا, گيبرالتار جانە گرۋزييا قۇرامالارى الى ۇپاي ەنشىلەي المادى.

اباي قازبەكۇلى

بولىسۋ: