دەموكراتييالىق كۇشتەردىڭ «قازاقستان-2050» جالپىۇلتتىق كواليتسيياسىنىڭ ۇندەۋى

642
0
بولىسۋ:

قۇرمەتتى قازاقستاندىقتار!

دال قازىر ەلىمىز ماڭىزدى تاريحي كەزەڭدى باستان وتكەرۋدە.

قازاقستاننىڭ تۇڭعىش پرەزيدەنتى, ەلباسى نۇرسۇلتان ابىشۇلى نازارباەۆ پرەزيدەنتتىك وكىلەتتىگىن توقتاتۋ تۋرالى شەشىم قابىلدادى.

قازاقستان رەسپۋبليكاسىنىڭ كونستيتۋتسيياسىنا سايكەس قاسىم-جومارت كەمەلۇلى توقاەۆ حالىققا انت بەرىپ, قازاقستان پرەزيدەنتى قىزمەتىنە كىرىستى.

پارلامەنتتىڭ كونستيتۋتسيياعا وزگەرىستەر ەنگىزۋ تۋرالى بىراۋىزدان قابىلداعان شەشىمىنە سايكەس قازاقستان رەسپۋبليكاسىنىڭ پرەزيدەنتى ق.ك.توقاەۆ استانانى نۇر-سۇلتان قالاسى دەپ قايتا اتاۋ تۋرالى تيىستى زاڭعا جانە جارلىققا قول قويدى.

بىز, قازاقستاننىڭ ميلليونداعان ازاماتتارىنىڭ مۇددەلەرىن بىلدىرەتىن دەموكراتييالىق كۇشتەردىڭ «قازاقستان-2050» جالپىۇلتتىق كواليتسيياسىنىڭ مۇشەلەرى, ەلىمىزدىڭ جەتەكشى ساياسي پارتييالارىنىڭ, قازاقستان حالقى اسسامبلەياسىنىڭ, ىرى قوعامدىق بىرلەستىكتەردىڭ, ۇكىمەتتىك ەمەس ۇيىمداردىڭ وكىلدەرى, قازىرگى تاڭدا بۇكىل الەمگە مويىندالعان, دۇنيە جۇزى قۇرمەتتەيتىن تاۋەلسىز قازاقستاننىڭ قالىپتاسۋىنداعى ەلىمىزدىڭ تۇڭعىش پرەزيدەنتىنىڭ اسا كورنەكتى رولىن مويىنداي وتىرىپ;

ەلباسىنىڭ باستى قۇندىلىقتارى ادام, ونىڭ قۇقىقتارى مەن بوستاندىقتارى بولىپ تابىلاتىن قازاقستاندى ەگەمەندى, دەموكراتييالىق, قۇقىقتىق جانە الەۋمەتتىك مەملەكەت رەتىندە دامىتۋعا ارنالعان ستراتەگييالىق باعىتىن قولداي وتىرىپ;

قازاقستان دامۋىنىڭ نەگىزىن قالاۋشى قاعيداتتار – قوعامدىق كەلىسىم مەن ساياسي تۇراقتىلىقتىڭ, ەتنوسارالىق جانە كونفەسسيياارالىق بەيبىتشىلىكتىڭ, بۇكىل حالىقتىڭ يگىلىگىنە باعىتتالعان ەكونوميكالىق وسۋدىڭ جانە قازاقستاندىق پاتريوتيزمنىڭ مىزعىماستىعىن قورعاي وتىرىپ;

ەل پرەزيدەنتىنىڭ بيلىك وكىلەتتىگىن بەرۋدىڭ دەموكراتييالىق جانە قۇقىقتىق سيپاتىن جوعارى باعالاي وتىرىپ;

ەلباسىنىڭ قازاقستاننىڭ جاڭا ەلورداسىن قۇرۋداعى ايرىقشا رولىن, ساياسي ەرىك-جىگەرىن جانە وراسان زور ەڭبەگىن اتاي وتىرىپ;

ەلدىڭ تۇڭعىش پرەزيدەنتىنە قازاقستان حالقىنا سىڭىرگەن ەڭبەگى ۇشىن زور قۇرمەت پەن العىس بىلدىرە وتىرىپ;

بولاشاق ۇرپاق الدىنداعى وز جاۋاپكەرشىلىگىمىزدى سەزىنە وتىرىپ, تاريحىمىزدىڭ وسى بىر ماڭىزدى كەزەڭىندە قازاقستان حالقىنا ۇندەۋىمىزدى جولدايمىز.

تاۋەلسىزدىكتىڭ بارلىق جەتىستىكتەرى – قازاقستاننىڭ تۇڭعىش پرەزيدەنتىنىڭ كوشباسشىلىعى مەن بارشا قازاقستاندىقتاردىڭ جالپىۇلتتىق بىرلىگى, قاجىرلى ەڭبەگى جانە ۇمتىلىسىنىڭ سالتاناتى.

نۇرسۇلتان ابىشۇلى نازارباەۆ قاشاندا بىزدىڭ ەلباسىمىز, تاۋەلسىز قازاقستاننىڭ نەگىزىن قالاۋشى تۇلعا, ەل ىشىندە جانە حالىقارالىق ارەنادا وراسان زور بەدەلگە يە الەمدىك دەڭگەيدەگى ساياساتكەر بولىپ قالا بەرەدى. ونىڭ ەرىك-جىگەرى مەن تاباندىلىعىنىڭ ارقاسىندا قازاقستان تاۋەلسىز مەملەكەت بولىپ قالىپتاستى.

سوندىقتان بىز, دەموكراتييالىق كۇشتەردىڭ «قازاقستان-2050» جالپىۇلتتىق كواليتسيياسىنىڭ مۇشەلەرى, استانا قالاسىن قازاقستان رەسپۋبليكاسىنىڭ استاناسى – نۇر-سۇلتان قالاسى دەپ قايتا اتاۋدى دۇرىس ارى ۋاقىتىلى شەشىم دەپ ەسەپتەيمىز جانە ونى قولدايمىز. بۇل شەشىمدى تاريحي ادىلەتتىلىك جانە ەلباسىنىڭ تاۋەلسىز قازاقستان مەن ەلوردامىزدىڭ قالىپتاسۋىنا سىڭىرگەن ەرەن ەڭبەگىنە دەگەن زور قۇرمەت رەتىندە قابىلدايمىز.

بىزدىڭ – بىر ەلباسىمىز, بىر ەلىمىز, بىر حالقىمىز, بىر تاعدىرىمىز بار!

بىز بارلىق قازاقستاندىقتاردى تاتۋلىق پەن بىرلىككە جانە باستى قۇندىلىقتارىمىزعا قۇرمەتپەن قاراۋعا شاقىرامىز. سەبەبى قازاقستاندىق جولدىڭ ساباقتاستىعى بىزدىڭ ارقايسىمىزعا تىكەلەي بايلانىستى.

بىز قازاقستاننىڭ تۇڭعىش پرەزيدەنتى ايقىنداعان ەلدىڭ ستراتەگييالىق باسىمدىقتارىنا سوزىمىزبەن دە, ىسىمىزبەن دە تولىق قولداۋ كورسەتۋگە جانە ەلباسىنىڭ تاۋەلسىزدىكتى كۇشەيتۋگە, ەلدى جۇيەلى جاڭعىرتۋعا جانە اربىر قازاقستاندىقتىڭ ال-اۋقاتىن ارتتىرۋعا باعىتتالعان ساياساتىن بىرلەسىپ جالعاستىرۋعا تيىسپىز.

بىز بەكەم بىرلىكتىڭ ارقاسىندا عانا الدىمىزدا تۇرعان بارلىق ماقساتتارعا قول جەتكىزىپ, ورتاق وتانىمىز – قازاقستان رەسپۋبليكاسىنىڭ يگىلىگى مەن وركەندەۋىن قامتاماسىز ەتە الامىز!

«Nur Otan» پارتيياسى, «اق جول» دەموكراتييالىق پارتيياسى, قازاقستان كوممۋنيستىك حالىقتىق پارتيياسى, «اۋىل» حالىقتىق-دەموكراتييالىق پاتريوتتىق پارتيياسى, «بىرلىك» ساياسي پارتيياسى, «قازاقستان رەسپۋبليكاسىنىڭ كاسىپوداقتار فەدەراتسيياسى» رەسپۋبليكالىق كاسىپوداقتار بىرلەستىگى, «ارداگەرلەر ۇيىمى» رەسپۋبليكالىق قوعامدىق بىرلەستىگى, قازاقستان رەسپۋبليكاسىنىڭ «اتامەكەن» ۇلتتىق كاسىپكەرلەر پالاتاسى, «قازاقستان كاسىپكەرلەرىنىڭ فورۋمى» زاڭدى تۇلعالار بىرلەستىگى, «G-Global-دىڭ حالىقارالىق حاتشىلىعى» قاۋىمداستىعى» زاڭدى تۇلعالار بىرلەستىگى, «جاسىل» ەكونوميكانى قولداۋ جانە G-Global-دى دامىتۋ كواليتسيياسى» زاڭدى تۇلعالار بىرلەستىگى, «قازاقستان ۋكرايندارىنىڭ راداسى» زاڭدى تۇلعالار بىرلەستىگى, «قازاقستاننىڭ داعدارىس ورتالىقتارى وداعى» زاڭدى تۇلعالار بىرلەستىگى, «قازاقستاننىڭ ازاماتتىق اليانسى» زاڭدى تۇلعالار بىرلەستىگى, «قازاقستان رەسپۋبليكاسىنىڭ ۇلتتىق عىلىم اكادەميياسى» رەسپۋبليكالىق قوعامدىق بىرلەستىگى, «قازاقستان رەسپۋبليكاسىنىڭ ۇلتتىق ينجەنەرلىك اكادەميياسى» رەسپۋبليكالىق قوعامدىق بىرلەستىگى, «جاڭارۋ» سىبايلاس جەمقورلىققا قارسى جالپىۇلتتىق قوزعالىسى» رەسپۋبليكالىق قوعامدىق بىرلەستىگى, «قازاقستاننىڭ ىسكەر ايەلدەرى قاۋىمداستىعى» رەسپۋبليكالىق قوعامدىق بىرلەستىگى, «قازاقستان مۇگەدەكتەرىنىڭ كونفەدەراتسيياسى» رەسپۋبليكالىق قوعامدىق بىرلەستىگى, «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگى, «رەسپۋبليكالىق ايەلدەر كەڭەسى» قوعامدىق بىرلەستىگى, «قازاقستاننىڭ كاسىپكەر ايەلدەرى وداعى» قوعامدىق بىرلەستىگى, «قازاقستان جازۋشىلار وداعى» قوعامدىق بىرلەستىگى, «Qazaqstan ardagerleri» قاۋىمداستىعى, «دوس» تاۋەلسىز ومىر ورتالىعى» مۇگەدەكتەر قوعامدىق بىرلەستىگى, «قازاقستان-2050» جالپىۇلتتىق قوزعالىسى, «جۇلدىز» بالالار قوعامدىق ۇيىمدارىنىڭ وداعى» قوعامدىق بىرلەستىگى, قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەنديياسى ستيپەندياتتارىنىڭ قاۋىمداستىعى.

2019 جىلعى 25 ناۋرىز,
نۇر-سۇلتان قالاسى

بولىسۋ: