«تۇران» انسامبلىمەن كەزدەسۋ وتتى

628
0
بولىسۋ:

الماتىدا ابىلحان قاستەەۆ اتىنداعى ونەر مۋزەيىندە «تۇران» ەتنو-فولكورلىق انسامبلىنىڭ  جىلدىق مەرەيتويىنا ارنالعان كەزدەسۋ وتتى. كەشتى ۇيىمداستىرۋعا قر تۇڭعىش پرەزيدەنتى – ەلباسى قورى قولداۋ بىلدىرگەن.

بيىل شىعارماشىلىعى الەمدىك دەڭگەيدە تانىلعان «تۇران» انسامبلىنە  10 جىل. اتالعان ەرەكشە توپتىڭ تاريحى 2008 جىلى باستاۋ الدى. توپ قۇرامى سەرىك نۇرمولداەۆ, باۋىرجان بەكمۇحانبەت, ماقسات مەدەۋبەك, ابزال ارىقباەۆ جانە ەرجىگىت اليەۆ سايدىڭ تاسىنداي ىرىكتەلگەن ونەرلى جىگىتتەردەن جاساقتالعان. ونەرپازدار انسامبل شىعارماشىلىعىنان بولەك, قۇرمانعازى اتىنداعى قازاق ۇلتتىق كونسەرۆاتوريياسى مەن ت.جۇرگەنوۆ اتىنداعى قازاق ۇلتتىق ونەر اكادەميياسىندا ۇستازدىق ەتىپ جۇر. قازاق ونەرىندە توپ تا, تۇرلى ونەر ۇجىمدارى دا كوپ. الايدا «تۇراندى» وزگەلەردەن ەرەكشەلەپ تۇراتىن ستيلى – سىبىزعى, سازسىرناي, دومبىرا, قوبىز, جەتىگەن, شىڭكىلدەك سيياقتى ساز اسپاپتارىن جانە كومەيمەن ان ايتۋ مانەرىن وزارا ۇندەستىرە بىلۋىندە. وسىلايشا, انسامبل قازاقتىڭ كونە زاماننان كەلە جاتقان ەسكى دە سازدى سارىنىن زاماناۋي ونەر الەمىنە بەيىمدەي بىلدى. انسامبل مۇشەسى باۋىرجان سوناۋ 2008 جىلى قۇرىلعان شىعارماشىلىق ۇجىمنىڭ وتكەنى مەن بۇگىنى ھام كەلەشەگى جايلى پىكىر بىلدىردى.

– وز ونەرىمىز ارقىلى قازاعىمىزدىڭ اسپاپتارىن دارىپتەپ كەلەمىز. قازىرگى تاڭدا وز وتانداستارىمىزبەن قاتار شەتەلدىك تىڭدارماندار بۋىنى دا قالىپتاستى. 10 جىلدىق مەرەيتويىمىز استانا مەن الماتى قالالارىندا ۇلكەن كونتسەرت دەڭگەيىندە تويلانادى. ارينە, بۇل دەڭگەيگە ا دەگەننەن وڭاي جەتپەگەنىمىز انىق. ون جىل ىشىندە قانشاما بەل-بەلەستەردى باسىپ وتتىك. العاش قۇرىلعان كەزىمىزدە ارى كونسەرۆاتورييادا وقيمىز ارى «سازگەن سازى» انسامبلىندە جۇمىس ىستەيتىن ەدىك. باس قوسىپ, ستيلىمىزدى ايقىنداپ, ات قويعاننان كەيىن تۇڭعىش رەت 1 ناۋرىز كۇنى قازۇۋ-دا فيلولوگييا فاكۋلتەتىندە تۇساۋىمىز كەسىلگەن ەدى. جەتەلەپ ساحناعا شىعارعان العاشقى ۇستازىمىز – زامزاگۇل ىزمۇراتوۆا بولدى. وسىدان كەيىن بىرتىندەپ جۇمىسىمىز جۇرىپ, ونەر الەمىندەگى جورىعىمىز باستالىپ كەتتى, – دەيدى باۋىرجان بەكمۇحانبەت.

انسامبل وسى ۋاقىتقا دەيىن الەمنىڭ 70-تەن استام مەملەكەتىنە ساپارلاپ بارىپ, وز ونەرلەرىن پاش ەتكەن. اتاپ ايتار بولساق, «كارنەگي حولل» (نيۋ-يورك, اقش), «كەننەدي تسەنتر» (ۆاشينگتون, اقش), «كونتسەرت حاۋس» (بەرلين, گەرمانييا), «كرەمل سارايى» (ماسكەۋ, رەسەي), «كونگرەسس جانە فەستيۆال سارايى» (كانن, فرانتسييا), «ساللە كورتو» (پاريج, فرانتسييا) زالدارىندا 600-گە جۋىق جەكە كونتسەرتتەرىن بەرىپ, ەۋروپالىق تىڭدارمانداردى تانتى ەتتى. ال بيىلعى 10 جىلدىق مەرەيتوي قارساڭىندا انسامبل بەلارۋس, نورۆەگييا, رەسەي, ازىربايجان, ۆەنگرييا, تاتارستان, تۇركييا ەلدەرىنە الەمدىك تۋرنە جاسادى.

مۋزەيدە وتكەن شىعارماشىلىق كەزدەسۋ بارىسىندا انسامبل مۇشەلەرى جەكە ومىرلەرى, ونەرى, كونتسەرتتىك ساپاردان العان اسەرلەرى جايىندا كەڭىنەن اڭگىمەلەپ بەردى. الداعى ۋاقىتتا ولار ناۋرىز مەرەكەسىنە وراي ارنايى كونتسەرتتىك باعدارلامالارىن دايىنداپ جاتىر.

 

اباي قازبەكۇلى

بولىسۋ: