Жақсының жарығы

935
0
Бөлісу:

Қазақ баспасөзінің жанашыры, ақын, белгілі қаламгер Итен Қарымсақұ­лының «Жақсының жарығы» кітабы жарыққа шықты.

Тоқсаныншы жылдардан бе­рі баспасөзбен біте қайна­сып ке­ле жатқан қаламгердің жаңа туын­дысында өлеңдері мен сұх­бат­та­ры, мақалалары топтас­ты­рылған. Автор жазба­лары арқы­лы қоғамдағы өзекті мәселелерді көтереді. Әлеу­меттік, ай­мақтық проблема­лар­дың оң шеші­мін табудың тиімді жолдарын нұс­қайды. Туған жердің топыра­ғы­ның қа­дір-қасиетін, туған өлке­ні түлету­дің сан тарауын қамти­ды. Мерзімді баспасөзде жа­рық көрген өлеңде­рінде қо­ғам­дағы күр­меуі қиын мәсе­ле­лерді сы­най­ды. Сынай оты­рып, мінді тү­зеуге үн қосады.
Ел үшін еңбек етіп жүрген тұл­ға­лардың жан сарайына те­рең үңілетін автордың әр сұх­баты ерекше. Қыран­дар биікке самғайды деп халық үшін тер төгіп жүрген атпал азаматтардың өмі­рінен сыр шертеді. Сыр елі­нің да­муы­на айрықша үлес қосқан Қы­зы­л­ор­да облысының әкімі Қырымбек Көшербаевпен сұхба­тында аймақтағы әлеу­меттік мәселе­лермен шектел­мей­ді. Елдік, ерлік мәселесін, ел ертеңі жас­­­тар­дың бола­шағын тілге тиек етеді.
Өмірге жолдаманы Жүрге­нов­тен алған аймақтағы та­рихи басылым «Сыр бойы­ның» бас ре­дакторы бол­ған Зейнолла Жар­қынбаевтың өне­гелі өмірі көп­ке үлгі. Автордың ай­туын­ша, жарты ғасырдан астам уа­қыт еліне қызмет еткен Зейнолла Көш­тайұлы саналы ғұмырын бас­пасөзге арнаған.
Бар өмірін халқына арна­ған қа­зыналы қарт Сейілбек Шау­ха­ма­нов­тың еселі еңбегін елі аңыз қылып ай­та­ды. «Қоғамда «Қазыналы қарт­тар қайдасың?» де­ген тосын сауал туындар бол­са, біз соларды таба ал­май жүр­ген жоқпыз, іздеуге мойны­мыз жар бермей келе жатқанын ұмытпағаны­мыз жөн деген ой туады. Шын­туайтына келсек, Абай­дың қара сөз­дерінен, ақын-жыраулардың өсие­­ті­нен, аңыз-әңгімелер мен бүгін­гі­нің саясатына дейін сан түрлі сөз қозғай алатын, терең қазып, ұла­ғатты ой айтудан жалық­пай­тын, бір жаңылмайтын Сейілбек мырзаның мық­ты­лығы осында жатса керек» деп абыз ақсақал­дың даналығын дәріп­тейді. Па­расатты тұл­ғаның әрбір ісі ке­лер ұрпаққа өнеге. Жазу­шы­ның айтуынша, өнегелі қарттың әр­бір даналық сөзін жадымыз­дан шығар­маған абзал. «Секең: «Бі­реу­лер баяндаманы оқып келе жатып, өз ойын қосып, то­лық­тырамын деп далаға кетіп, ойды шашыратып алып жа­тады. Баян­даманы өзің жазып, соны әде­мілеп, оқып берсең әлгіндей кем­шіліктерге жол бермес едің әрі сөзің таза, нық, өтімді шы­ғады» де­ген өсиеті ат үстіндегі әрбір ше­неу­нік ескере жүрер жайт.
Қазақстанның Құрметті жур­налисі, Қазақстан Жазу­шы­лар ода­ғы­ның мүшесі, Қазақ­стан Журна­листер одағы сый­лы­ғының лауреаты, Білім және ғылым министрлігі Ы.Алтын­сарин төсбелгісінің иегері, Қы­зылорда қаласының Құрметті азаматы Итен Қа­рымсақұлының еселі еңбегі болашақта да жал­ғасын та­бады. Автордың бұған дейін «Тегін білген тексіз бол­май­ды», «Қоңыр қалам», «Адам­дар. Жылдар. Тағ­дырлар», «Жү­рек жазбалары» жарық көрген бо­латын.
Жазушы Нұрдәулет Ақыш­тың «Кітаптың құндылығын таңдап алған кейіпкерлерінің «сегіз қырлы, бір сырлылығы» да арттырып тұр. Ав­тор­дың өзі де өмір ортасынан ойып алған таңдаулы кейіпкерлерін қо­ғамдық, мемлекеттік, ұлттық дең­гейде ой толғайтын рухани биікке көтере отырып сом­дайды» дегені шындық.

Майра ЖАНЫСБАЙ

Бөлісу: