بەردىبەك ساپارباەۆ: «التىن القالى» انالار جالپى باسپانا كەزەگىندە تۇرمايدى

888
0
بولىسۋ:

ەڭبەك جانە xالىقتى الەۋمەتتىك قورعاۋ مينيسترى بەردىبەك ساپارباەۆ كوپبالالى انالار ۇشىن بولەك باسپانا كەزەگىن تۇزۋ ماسەلەسى تۋرالى ايتتى.

«التىن القا» يەگەرلەرى جالپى تىزىمدە تۇرمايدى. قازىرگى كەزدە بىز كوپبالالى انالار ۇشىن بولەك بىر كەزەكتى قۇرۋ ماسەلەسىن پىسىقتاپ جاتىرمىز. بىراق ونى بىردەن جاساي المايمىز عوي. بارىن جان-جاقتى قاراۋ قاجەت. قانشا قارجى كەرەك? قانشا باسپانا سالۋ كەرەك? سونىڭ بارىن جان-جاقتى قاراستىرامىز», – دەدى بەردىبەك ساپارباەۆ. سونداي-اق جيىندا مينيستر كوپبالالى وتباسىلارعا بەرىلەتىن اتاۋلى الەۋمەتتىك كومەكتى دە ايتتى.

«اتاۋلى الەۋمەتتىك كومەككە كەلسەك, مەملەكەت باسشىسى ناقتى تاپسىرما بەردى, بۇرىن جانۇيانىڭ اربىر مۇشەسىنە تابىستى ەسەپتەگەندە (كۇنكورىستىڭ تومەنگى مولشەرىرەد.) 50 پايىزدىڭ دەڭگەيىندە بولسا, ەندى ونى 70 پايىزعا كوبەيتەدى. ەگەر بۇرىن 14 849 تەڭگە بولسا, 1 ساۋىردەن باستاپ ونىڭ كولەمى 20 789 تەڭگەگە كوتەرىلەدى. ال ەندى استانا قالاسىندا باسقا وڭىرلەرمەن سالىستىرعاندا ورتاشا جالاقى جوعارى. سوندىقتان 21 698 تەڭگەگە دەيىن كوتەرىلەدى. بىزدىڭ بولجامىمىز بويىنشا وسى شارامەن, كەم دەگەندە, 830 مىڭ ادام قامتىلادى. ال استانا قالاسىندا, كەم دەگەندە, 6 700-گە جۋىق», – دەيدى مينيستر.

ونىڭ ايتۋىنشا, كوپبالالى وتباسىنىڭ مۇشەسى جوعارى وقۋ ورنىندا وقىسا, 21 مىڭ تەڭگەنىڭ جاردەماقىسى 23 جاسقا دەيىن تولەنەدى.

«وسىلايشا, وسى ۋاقىتقا دەيىن جانۇيانىڭ اربىر مۇشەسىنە 4 834 تەڭگە تولەنىپ كەلسە, 1 ساۋىردەن باستاپ وتباسىنىڭ اربىر مۇشەسىنە 20 789 تەڭگە تولەنەتىن بولادى. ال استانا قالاسىندا – 21 698 تەڭگە. ال وتباسىداعى ەر كىسىگە جانە ايەل كىسىگە بۇرىنعىداي 10 500 تەڭگە قوسىمشا تولەنەدى», – دەدى بەردىبەك ساپارباەۆ.

«ايقىن» اقپارات

بولىسۋ: