تيمۋر قۇلىباەۆ: جەر تۋرالى اقپارات جاسىرىلسا – جەمقورلىق ورشيدى

841
0
بولىسۋ:

كاسىپكەرلەردىڭ سىبايلاس جەمقورلىققا قارسى ىس-قيمىل جونىندەگى ىىى رەسپۋبليكالىق فورۋمىندا «اتامەكەن» قر ۇكپ توراعاسى تيمۋر قۇلىباەۆ اكىمدىكتەرگە جەر تەلىمدەرى تۋرالى اقپارتتى جىلدىڭ سوڭىنا دەيىن تسيفرلاندىرۋدى ۇسىندى. 

«اتامەكەن» ۇلتتىق كاسىپكەرلەر پالاتاسىنىڭ باسشىسى بۇگىندە كاسىپكەرلەردىڭ تۇيتكىلدى ماسەلەلەرىن شەشۋگە ار وڭىردە قۇرىلعان كاسىپكەرلەردىڭ قۇقىعىن قورعاۋ جونىندەگى كەڭەستەردىڭ جۇمىسى كومەكتەسەتىنىڭ ايتتى. كەڭەستەردىڭ جيىندارى  مەملەكەتتىك قىزمەت ىستەرى جانە سىبايلاس جەمقورلىقا قارسى ىس-قيمىل جونىندەگى اگەنتتىگى قىزمەتكەرلەرىنىڭ قاتىسۋىمەن  وتۋدە. قر قارجى مينيسترلىگى جانىنان قۇرىلعان اپەللياتسييالىق كوميسسييا دا سالىقتىق داۋلاردى سوتقا جەتكىزبەي شەشۋگە كومەكتەسەتىن تيىمدى قۇرالداردىڭ بىرى. تيمۋر قۇلىباەۆتىڭ پىكىرىنشە, وسى وڭ تاجىريبەنى  ەكولوگييا, سانيتارييالىق-ەپيدەميولوگييالىق قىزمەت, مەملەكەتتىك ساتىپ الۋلار, جەر قاتىناستارى سالالارىندا دا, بارلىق باقىلاۋشى ورگاندار اراسىندا دا قولدانۋ كەرەك.

بيزنەستىڭ نەگىزگى پروبلەمالارىن, سونىڭ ىشىندە سىبايلاس جەمقورلىق بەلگىلەرىن انىقتاۋدا وڭىرلەردە جۇرگىزىلەتىن سكرينينگتىك زەرتتەۋدىڭ كومەگى زور.

– تۇركىستان وبلىسى, اقتوبە جانە اتىراۋدا پيلوتتىق تۇردە سكرينينگ جۇرگىزدىك. جىلدىڭ سوڭىنا دەيىن سكرينينگ بارلىق وڭىرلەردە جۇرگىزىلەتىن بولادى. وسىلايشا, اۋىلدا ينفراقۇرىلىمدى ارى قاراي دامىتۋ ۇشىن ار ەلدىمەكەندەگى تۇرعىندار مەن كاسىپكەرلەردىڭ تۇيتكىلدى ماسەلەلەرىنىڭ وزەكتى تىزىمى انىقتالاتىن بولادى, – دەدى تيمۋر قۇلىباەۆ.

توراعا سوڭعى جىلدارى بيزنەسكە ارنالعان رۇقساتتار سانى 70 پايىزعا قىسقارىپ, تالاپتار سانى 60 پايىزعا ازايعانىن اتاپ وتتى. بيزنەسكە باقىلاۋشى ورگاندار تاراپىنان قىسىم 20 پايىزعا تومەندەگەن, بيزنەستى تەكسەرۋ مەرزىمى ەكى ەسە قىسقارعان. قىلمىستىق زاڭنامانى ىزگىلەندىرۋ وڭ ناتيجە بەردى. ەكونوميكا سالاسىنداعى تىركەلگەن قىلمىستىق ىستەر 5 ەسەگە قىسقارعان.

وسى رەتتە تيمۋر قۇلىباەۆ بوس جەر تەلىمدەرى جايلى اقپاراتتىڭ اشىق جارييالانباۋى – سىبايلاس جەمقورلىقتىڭ تاعى بىر كوزى ەكەنىن ايتتى. اۋىل شارۋاشىلىعى مينيسترلىگىنىڭ دەرەكتەرى بويىنشا 2,3 ملن گەكتار جەردىڭ پايدالانىلماي جاتقانى انىقتالعان. مونيتورينگ جۇيەسى جەتىلدىرىلمەگەن, وكىلەتتى تۇلعالار جەكە پايدانى كوزدەپ, مالىمەتتەردى وزگەرتىپ, جەر تەلىمدەرىنە يەلىك قۇقىعىن بەرۋدەن نەگىزسىز باس تارتادى.

– ناتيجەسىندە جەرلەر يگەرىلمەي جاتىر, ەكونوميكالىق پروتسەستەر دامىماي, مەملەكەت بيۋدجەتىنە سالىق پەن تولەمدەر تۇسپەيدى. 2018 جىلى اكىمدىكتەردىڭ مالىمەتتەرىنە سايكەس, 1,1 مىڭ جەر تەلىمى ساتىلىمدار بويىنشا قولدانىسقا بەرىلگەن, بۇل جالپى كولەمنىڭ نەبارى 6 پايىزى عانا. بيىل اكىمدىكتەردى بوس جەرلەرگە قاتىستى اقپاراتتى تسيفرلاندىرۋ بويىنشا جۇمىستى اياقتاۋدى سۇرايمىز. سونداي-اق بۇل شارا  بيۋدجەتتىڭ كىرىس بولىگىن ارتتىرۋعا مۇمكىندىك بەرەدى. وسىنداي اقپاراتتىق بازانى بىرلەسىپ جاسايىق, بۇل اتقارىلعان جۇمىستىڭ ناقتى ينديكاتورى بولماق, – دەپ قورىتىندىلادى تيمۋر قۇلىباەۆ.

ا.احمەت

بولىسۋ: