قازاقستان تەمىر جولدارى ۆەتنام مەن ەۋروپانى بايلانىستىردى

1485
0
بولىسۋ:

قازاقستاننىڭ ۆەتنامداعى ەلشىلىگى «قازاقستان تەمىر جولى» ۇك» اق-مەن (قتج) ۆەتنام-قىتاي-قازاقستان-ەۋروپا باعىتى بويىنشا العاشقى تەمىر جول ترانزيتتىك-كولىكتىك دالىزىنىڭ جۇمىسىن ىسكە قوسقان كولىكتىك-لوگيستيكالىق جوبانى جۇزەگە اسىردى.

2018 جىلدى قورىتىندىلاي كەلە, العاش رەت ۆەتنام استاناسى حانويدان (يەنۆەن ستانتسيياسى) ۆەتنامدىق شەكارا ماڭىنداعى دونگدانگ تەمىر جول تەرمينالى ارقىلى, ەۋروپاعا بىرلەسكەن كونتەينەرلىك قۇرامدار قۇرىلاتىن قحر اۋماعى بويىنشا, ودان ارى قازاقستان ارقىلى ترانزيتپەن دۋيسبۋرگكە (گفر) كولەمى 9,1 مىڭ نەمەسە 1686 جفە (جيىرما فۋتتىق ەكۆيۆالەنت) جۇك تاسىمالى جۇزەگە اسىرىلدى دەپ ايتۋعا بولادى.

جۇك 22 كۇندە جەتكىزىلدى

وسىلايشا, حانويدان نەمىس دۋيسبۋرگىنە «LG» مەن «Samsung» كومپانييالارىنىڭ جۇكتەرىن تاسىمالداۋ مەرزىمى 22 كۇندى قۇرادى, ونىڭ 2 كۇنى تاۋاردى ۆەتنامنان قحر-عا تاسىمالداۋعا قاجەت بولدى. بۇدان ارى اتالمىش جۇكتىڭ دۋيسبۋرگكە دەيىنگى جەتكىزىلىمى 20 كۇن الدى. كەيىن ۆەتنامنان ەۋروپاعا دەيىنگى جۇك تاسىمالداۋىنىڭ جالپى ۋاقىتىن 19 ساعاتقا دەيىن قىسقارتۋ جوسپارلانىپ وتىر. «ۆەتنام تەمىر جولدارىنىڭ» پىكىرى بويىنشا, كولەمدەر بيىلعى جىلدا-اق ايتارلىقتاي ارتادى.

اتالعان تەمىر جول باعىتىنىڭ ىسكە قوسىلۋى مەملەكەت باسشىسى نۇرسۇلتان نازارباەۆتىڭ قازاقستاننىڭ كولىكتىك ينفراقۇرىلىمىن حالىقارالىق كولىكتىك جۇيەگە ينتەگراتسييالاۋ جانە «نۇرلى جول» باعدارلاماسى اياسىندا, «بەلدەۋ مەن جول» قىتايلىق باستاماسىمەن ۇشتاساتىن ەلىمىزدىڭ كولىكتىك الەۋەتىن جۇزەگە اسىرۋ بويىنشا ستراتەگييالىق تاپسىرماسىن جۇزەگە اسىرۋدىڭ تاجىريبەلىك ناتيجەسىنە اينالدى.

جوبا كىمگە تيىمدى?

قازاقستان مەن ۆەتنام اراسىنداعى قىتاي اۋماعى ارقىلى ترانزيتپەن كولىكتىك-لوگيستيكالىق قاتىناسىن قۇرۋ جانە ىسكە قوسۋ جۇمىسىنا ۆەتنامداعى قازاقستاننىڭ ەلشىلىگى مەن قتج 2016 جىلى باستاماشىلىق ەتتى. بۇل تاپسىرمانى 2016-2017 جىلدارى جۇزەگە اسىرۋ ۇشىن «قتج» ۇك» اق وكىلدەرىنىڭ ۆەتنامعا ساپارى ۇيىمداستىرىلدى, سولاردىڭ بارىسىندا ۆەتنامنىڭ كولىك مينيسترلىگىنىڭ جانە «ۆەتنام تەمىر جولدارىنىڭ» جەتەكشىلەرىمەن كەزدەسۋلەر ۇيىمداستىرىلدى, سونداي-اق, 100 استام ىرى الەمدىك جانە ۆەتنامدىق كولىكتىك-لوگيستيكالىق كومپانييالاردىڭ قاتىسۋىمەن ەكى بيزنەس-فورۋم وتكىزىلدى.

بۇدان بولەك, قتج ماماندارى قىتايمەن شەكتەسەتىن دونگدانگ جانە لاوكاي تەمىر جول وتكەلدەرىندە بولىپ, ولاردىڭ اتالمىش تەمىر جول باعىتىن قۇرۋداعى مان-ماڭىزى مەن الەۋەتىن ايقىندادى.

2017 جىلدىڭ اقپانىندا حانويدا «قتج» مەن «ۆەتنام تەمىر جولدارى» اراسىندا ىنتىماقتاستىق جونىندەگى مەموراندۋمعا قول قويىلىپ, ول ەكى ەل اراسىنداعى كولىكتىك-لوگيستيكالىق باعىتتاعى وزارا ارەكەتتەستىكتىڭ جاندانا تۇسۋىنە ىقپال ەتتى.

قازاقستاندىق ديپلوماتتاردىڭ قولداۋى جانە قتج وكىلدەرىنىڭ بەلسەندى قاتىسۋىمەن 2017 جىلدىڭ ناۋرىزى مەن شىلدەسىندە الماتى مەن حانويدا قازاقستان, ۆەتنام جانە قىتايدىڭ تەمىر جول اكىمشىلىكتەرىنىڭ العاشقى ۇشجاقتى كەلىسسوزدەرى جۇرگىزىلدى. ناتيجەسىندە, تاراپتار تاسىمال كولەمدەرى, باعىتتار جانە لوگيستيكالىق وپەراتورلار جونىندە كەلىستى. اتالمىش فورماتتاعى كەلىسسوزدەردىڭ كەلەسى راۋندتارعا رەسەي مەن موڭعولييانىڭ سەرىكتەستەرى قوسىلدى.

2018 جىلدىڭ ساۋىرىندە قازاقستان مەن ۆەتنامنىڭ تەمىر جول اكىمشىلىكتەرىنىڭ اراسىندا كولىك بويىنشا جۇمىس توبى قۇرىلىپ, ساتتى قىزمەت ەتىپ كەلەدى.

بارشا تاراپقا تيىمدى دالىز

جالپى, قازاقستان مەن ۆەتنامدى ەكى كولىكتىك باعىت بايلانىستىرادى: ۆەتنامعا قازاقستاندىق بيداي تاسىمالى وتەتىن ليانيۋنگان (كحر) كەمەجايىنداعى قازاقستاندىق لوگيستيكالىق تەرمينال, سونداي-اق, ۆەتنامدىق دونگدانگ تەمىر جول تەرمينالى ارقىلى وتەتىن باعىت.

بەلگىلى بولعانداي, ۆەتنام ەۋرازييالىق ەكونوميكالىق وداق (ەاەو) ەلدەرىمەن ەركىن ساۋدا تۋرالى كەلىسىمگە قول قويعان تۇڭعىش ەل بولدى. قازاقستان-قحر-ۆەتنام ترانزيتتىك باعىتى بىزدىڭ ەلىمىز بەن وزگە دە ەاەو ەلدەرىنە ۆەتنامدىق نارىققا اۋىل شارۋاشىلىق تاۋارلارىن, ونىڭ ىشىندە, ەت-سۇت ونىمدەرى مەن وزگە دە تەز تاسىمالداۋدى قاجەت ەتەتىن تاۋارلاردىڭ جەتكىزىلىمىن جاساۋعا مۇمكىندىك بەرەدى. يرانعا بيداي جەتكىزىلىمى بويىنشا قازاقستان مەن رەسەي اراسىنداعى بىرلەسكەن جوبالار ۇلگى بولا الادى. وز كەزەگىندە, ۆەتنام اتالمىش دالىزدىڭ مۇمكىندىكتەرىن پايدالانا وتىرىپ, تەڭىز ونىمدەرى مەن تروپيكالىق جەمىستەردى قازاقستانعا ەكسپورتتاۋ مۇمكىندىكتەرىن الادى.

قازىرگى ۋاقىتتا ۆەتنام ەۋروپالىق كەڭەسپەن, ۆەتنام-قحر-قازاقستان-ەۋروپا باعىتى بويىنشا ترانزيتتىك-كولىكتىك دالىزدى ارتاراپتاندىرۋعا, ۆەتنام مەن اسەان ەلدەرىنەن ەۋروپاعا جۇك تاسىمالىن قىسقارتۋعا مۇمكىندىك بەرەتىن, جالپى, تەڭىز تاسىمالىنىڭ بالاماسى بولاتىن ۇقساس كەلىسىم جاساۋ بويىنشا جۇمىستاردى اياقتاۋدا.

ۆەتنام-قحر-قازاقستان-ەۋروپا ترانزيتتىك-كولىكتىك دالىزىنىڭ قوس تاراپقا دا تولىق ماسشتابتى قىزمەت ەتۋى كەلەشەكتە قازاقستاننىڭ وز كولىكتىك-ترانزيتتىك الەۋەتىن ايتارلىقتاي نىعايتۋعا جانە ەۋروپا مەن وڭتۇستىك-شىعىس ازييا ەلدەرى اراسىنداعى تيىمدى كوپىرگە اينالۋعا مۇمكىندىك بەرەدى

2018 جىلدىڭ قورىتىندىسى بويىنشا, قازاقستان مەن ۆەتنام اراسىنداعى تاۋار اينالىمى 467,2 ملن اقش دوللارعا جەتتى. ۆەتنام-قحر-قازاقستان-ەۋروپا تەمىر جول دالىزىنىڭ ىسكە قوسىلۋىمەن ەكى ەل اراسىنداعى تاۋار اينالىمى ايتارلىقتاي ارتادى دەپ كۇتىلۋدە.

«ايقىن» اقپارات

بولىسۋ: