«Boeing 737 Max» ۇشاقتارىنا سەنىم جوعالا باستادى

681
0
بولىسۋ:

جەكسەنبىنىڭ تاڭىندا نايروبيدەگى بولە اۋەجايىنان ۇشقان «Boeing 737 Max» ۇشاعى اپاتقا ۇشىرادى.

نۇرسۇلتان نازارباەۆ ەفيوپييا فەدەراتيۆتىك دەموكراتييالىق رەسپۋبليكاسىنىڭ پرەزيدەنتى ساحلە-ۆورك زەۋدەگە كوڭىل ايتۋ جەدەلحاتىن جولدادى.
مەملەكەت باسشىسى ۇشاق اپاتى سالدارىنان كوپتەگەن ادامنىڭ قازا بولعانى تۋرالى حاباردى زور كۇيزەلىسپەن قابىلدادى.
«وسى قارالى ساتتە قازاقستان حالقىنىڭ جانە جەكە وزىمنىڭ اتىمنان قايعىعا ورتاقتاسىپ, قازا بولعانداردىڭ تۋعان-تۋىستارى مەن جاقىندارىنا, سونداي-اق بارشا ەفيوپييا حالقىنا كوڭىل ايتامىن», – دەلىنگەن جەدەلحاتتا.

ۇشاق بورتىندا 149 ادام جانە 8 ەكيپاج مۇشەسى بولعان. بارلىعى دا وقيعا ورنىندا كوز جۇمدى. ۇشاق «Ethiopian Airlines» اۋەكومپانيياسىنا تيەسىلى.
«Boeing 737 Max» – جاڭا مودەلدى ۇشاق. قولدانىسقا بەرىلگەننەن باستاپ اتالعان ماركالى ۇشاقتىڭ وسىمەن ەكىنشىسى اپاتقا ۇشىرادى. بۇعان دەيىن يندونەزييادا «Lion Air» اۋكومپانيياسىنا تيەسىلى «Boeing 737 Max» ۇشاعى دىتتەگەن جەرىنە جەتە المادى. وسىلاي ەكى اپاتتىڭ سالدارىنان 346 ادام قازا بولدى. الەمنىڭ بىرنەشە جەتەكشى اۋەكومپانييالارى اتالعان ماركالى ۇشاقتى ۋاقىتشا پايدالانۋدى دوعارتتى. ساراپشىلاردىڭ ايتۋىنشا اقش-تىڭ الپاۋىت كومپانيياسى سەنىمنەن ايىرىلىپ, قارجىلىق قيىندىقتارعا تاپ بولۋى مۇمكىن.
ايتا كەتەيىك, قازاقستاندا «Boeing 737 Max» ۇشاعى SCAT اۋەكومپانيياسىندا بار جانە اتالعان ۇشاقپەن بۇعان دەيىن ەشقانداي كەلەڭسىز جاعدايلار ورىن المادى.

اسقار بەك.

بولىسۋ: