الەكسەي پولتورانين دوپينگ داۋىنىڭ مان-جايىن تۇسىندىرىپ بەردى

1050
0
بولىسۋ:

قازاقستاندىق شاڭعىشى الەكسەي پولتورانين وزىنىڭ دوپينگ داۋىنا تاپ بولۋىنا بايلانىستى تۇسىنىكتەمە بەردى.

بۇل تۋرالى وتاندىق bnews.kz سايتى جازادى. سپورتشىنىڭ ايتۋىنشا, ول ەشقاشان تىيىم سالىنعان پرەپاراتتار قابىلداماعان.

«قازىر وتباسىممەن بىرگەمىن. جاقىن كۇندەرى وتانىما بارامىن» دەيدى سپورتشى.

ونىڭ ايتۋىنشا, 27 اقپان كۇنى اۆسترييا پوليتسيياسى ونى جاتتىعۋدان قايتىپ ورالعاننان كەيىن ۇستاعان.

«مەنى قان قۇيۋ ۇستىندە ۇستادى دەگەن جالعان اقپارات. مەن قۇيدىرعان ەمەسپىن. پوليتسييا مەنى اكەتكەننەن كەيىن كۇتىمى ناشار, سالقىن جەرتولەدەگى بىر ادامدىق كامەرادا ۇستادى. مەن سول كەزدە بوستاندىققا شىعۋ ۇشىن بارىنە دە دايىن ەدىم. قازىر تۇرمەدە العان پسيحولوگييالىق جاراقاتتان ايىعۋ پروتسەسىن وتكەرىپ جاتىرمىن. مەن تاپسىرعان بارلىق اناليزدەر مەنىڭ دوپينگ قولدانباعانىمدى ايعاقتايدى. مەن تىيىم سالىنعان پرەپاراتتار تۋرالى ويلادىم, بىراق قابىلدامادىم. مەنى دەر ۋاقىتىندا توقتاتتى. بۇل ۇشىن وكىنەمىن جانە كەشىرىم سۇرايمىن» دەيدى سپورتشى.

سونداي-اق پولتورانين دەر كەزىندە تيىستى كومەك كورسەتكەن قر سىرتقى ىستەر مينيسترلىگىنە العىس بىلدىرەدى. ايتۋىنشا, سىم وكىلدەرى ونى اۋەجايعا شىعارىپ سالىپ, بيلەت الۋىنا كومەكتەسكەن. سەرىك ساپيەۆ حابارلاسىپ, قولداۋ بىلدىردى. بۇل مەن ۇشىن وتە ماڭىزدى. قازاقستاندىق جانكۇيەرلەرگە دە قولداۋى ۇشىن العىس ايتامىن. كوپ جىلدار بويى ەڭبەكتەنىپ, جاتتىعىپ, قازاقستاننىڭ تۋىن بيىكتەن جەلبىرەتۋ ۇشىن بارىمدى سالدىم» دەدى شاڭعىشى.

بۇعان دەيىن ەلىمىزدىڭ سىرتقى ىستەر مينيسترلىگى سپورتشىنىڭ گەرمانييانىڭ ميۋنحەن قالاسىنان ماسكەۋگە ۇشىپ كەتكەنىن ايتقان بولاتىن. كەيىنىرەك سپورتشىنىڭ وزى بايلانىسقا شىقتى. 

ەسكە سالساق, پولتورانين 27 اقپان كۇنى 15 شاقىرىمعا قاشىقتىققا جارىسۋ سىنىنا شىققان جوق. كەيىننەن قازاقستاندىق سپورتشىنى دوپينگكە قارسى ەرەجەنى بۇزعانى ۇشىن اۆسترييا پوليتسيياسىنىڭ ۇستاعانى انىقتالدى. پولتورانينمەن قاتار دومينيك بالداۋف پەن ماكس حاۋكە (اۆسترييا), اندرەاس ۆەەرپالۋ مەنكارەل تامميارۆتار دا (ەستونييا) ۇستالعان.

ال كەشە سپورتشىنى 11 جاسىنان بەرى تانيتىن باپكەرى حالىققا ۇندەۋ جولداپ, شاكىرتىنىڭ قىلىعى ۇشىن كەشىرىم سۇراعان ەدى.

اباي قازبەكۇلى

بولىسۋ: