جاس كاسىپكەرلەرگە 1 ملن تەڭگەدەن كومەك بەرىلەدى

203
0
بولىسۋ:

قر بىلىم جانە عىلىم مينيسترلىگى دۇنيەجۇزىلىك بانكپەن بىرلەسىپ جاستار كورپۋسىن دامىتۋ جوباسىن جۇزەگە اسىرۋدا. جوبا بارىسىندا اقمولا, اتىراۋ, باتىس قازاقستان, ماڭعىستاۋ وبلىستارى مەن استانا, الماتى قالالارىنىڭ جاستارىنا 1 ملن تەڭگە كومەك كورسەتىلىپ, 1 100 الەۋمەتتىك-كاسىپكەرلىك جوبالارى قولداۋعا يە بولماق.

جوبانىڭ ماقساتى ‒ جاستاردى قوعام ومىرىنە تارتۋ, ياعني الەۋمەتتىڭ يگىلىگى جولىندا قوعامدىق پايدالى قىزمەت داعدىلارىنا وقىتۋ ارقىلى ومىرلىك ماڭىزى بار داعدىلاردى قالىپتاستىرۋ.
– جاستار كورپۋسىن دامىتۋ جوباسى ىسكە اسىرىلعان ەكى جىل ىشىندە 5508 جاس ازاماتتار 1616 الەۋمەتتىك جوبا جاسادى. 2019 جىلى جوبا اقمولا, اتىراۋ, باتىس قازاقستان, ماڭعىستاۋ جانە الماتى, استانا قالالارىندا ىسكە اسىرىلادى. اتالعان ايماقتاردا 3500 جاس تالاپكەرلەر مەن 1100-گە جۋىق الەۋمەتتىك-كاسىپكەرلىك جوبالار قارجىلاندىرىلادى دەپ جوسپارلانۋدا. اربىر گرانتقا 1 ملن تەڭگە بولىنەدى دەپ كوزدەلگەن, – دەدى قر بىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ ورتالىق كوممۋنيكاتسييالار قىزمەتىندە.
گرانتتىق كونكۋرسقا قاتىسۋ ۇشىن جاستار وز يدەيالارىن الەۋمەتتىك جوبا رەتىندە ۇسىنادى. الەۋمەتتىك جوبا دەپ وتىرعانىمىز جاستاردىڭ ۇسىنىپ وتىرعان جۇمىسى جەرگىلىكتى قوعامداستىققا پايداسىن تيگىزەتىن جوبالار. جاستار وز وتىنىمدەرىن 15 ناۋرىز بەن 15 ساۋىر ارالىعىندا zhasproject.kz سايتىنا تىركەي الادى. 3 كەزەڭدىك ىرىكتەۋدەن وتكەن سوڭ, 1 ميلليون تەڭگە گرانتقا يە بولۋ مۇمكىندىكتەرى بار. جوباعا 14-29 جاس ارالىعىنداعى قازاقستاندىقتار قاتىسا الادى. ال گرانتقا يە بولعان جاستار 6 اي بويى جەرگىلىكتى حالىققا تەگىن قىزمەت كورسەتەدى.
ۇيىمداستىرۋشىلاردىڭ ايتۋىنشا, قاتىسۋشىلار وزدەرىنىڭ مۇمكىندىكتەرىن پايدالانۋعا, ومىرلىك جاڭا داعدىلاردى ۇيرەنۋگە, كوشباسشىلىق قابىلەتتەرىن دامىتۋعا, باستامالىق يدەيالار مەن الەۋمەتتىك جوبالاردى جۇزەگە اسىرۋعا قىزىعۋشىلىعى بولۋى كەرەك.
– مىسالى, جاستار 3-5 ادامنان بىرىگىپ, جوبالارىن جۇزەگە اسىرادى. ناتيجيەسىندە 6 اي بويى جاساعان جۇمىستارىن تەگىن اتقارادى. شاعىن تىگىن شەبەرحاناسىن اشىپ, 6 اي بويى جاساعان زاتتارىنىڭ بارلىعىن جەرگىلىكتى قاۋىمداستىققا تەگىن تاراتادى. اعىلشىن تىلىن ۇيرەتۋ كۋرستارى بولسا, 6 اي بويى اعىلشىن تىلىنەن تەگىن ۇيرەتەدى, – دەدى جوبالاردى باسقارۋ توبىنىڭ جەتەكشىسى گۇلميرا ەسكەندىروۆا.
سونداي-اق, 6 ايدان كەيىن ولار جوباعا العان بارلىق قاجەتتى زاتتارى مەن قۇرالدارىن وز مەنشىكتەرىنە قالدىرىپ, كەيىن وز كاسىپتەرىن اشۋعا مۇمكىندىكتەرى مول ەكەنىن دە اتاپ وتتى.
جوبادا جۇمىس ىستەمەيتىن, وقىمايتىن نەمەسە تابىسى تومەن قاتىسۋشىلارعا ەرەكشە باسىمدىق بەرىلمەك.
ۇيىمداستىرۋشىلاردىڭ ايتۋىنشا, جوباعا قاتىسۋ بارىسىندا جاستار ومىرلىك داعدىلار مەن جوبالاردى باسقارۋ تاسىلدەرىن ۇيرەنەدى, سونداي-اق تالىمگەرلەردەن قولداۋ الادى.
سونىمەن قاتار, بايقاۋدان سۇرىنبەي وتكەن جاستارعا وز الەۋمەتتىك جوبالارى ۇشىن جوعارى بىلىمى بار جاستارعا 60 مىڭ جانە ورتا بىلىمى بار نەمەسە كوللەدج تامامداعاندارعا 40 مىڭ تەڭگە كولەمىندە شاكىرتاقى بەرىلمەك.
ايتا كەتسەك, بۇل ‒ جاستار كورپۋسىن دامىتۋ جوباسىنىڭ ۇشىنشى كەزەڭى. جوبا 2017 جىلدان باستاپ, بىلىم جانە عىلىم مينيسترلىگى مەن دۇنيەجۇزىلىك بانكپەن بىرلەسىپ ىسكە اسىرىلىپ جاتىر. قازىرگى ۋاقىتتا جوبا 2020 جىلعا دەيىن ىسكە اسىرىلادى جانە ونىڭ اياسىندا 8500 قازاقستاندىق جاستار قامتىلادى دەپ بولجانىپ وتىر.

بولىسۋ: