تۇركىستاندا العىس ايتۋ كۇنى تويلاندى

28
0
بولىسۋ:

تۇركىستان قالاسىندا العىس ايتۋ كۇنىنە وراي دەپورتاتسييا جىلدارى قازاقستانعا تاعدىر تالكەگىمەن قونىس اۋدارعان ەتنوستاردىڭ وتكەنى مەن بۇگىنى جايىندا ارنايى ۇيىمداستىرعان كورمە وتتى. شارادا ەتنومادەني ورتالىق وكىلدەرى دەپورتاتسييا جىلدارى قولداۋ كورسەتىپ, قورعان بولعان قازاق حالقىنا العىس ايتتى. سونىمەن قاتار, سول كۇنى ياساۋي كەسەنەسىنىڭ ىرگەسىندەگى «ارباتتا» ۇيىمداستىرىلعان «ۇلتتىق قولونەر – ۇلى مۇرا» اتتى قولونەر شەبەرلەرىنىڭ كورمەسى «ەسىمحان» الاڭىندا كونتسەرتتىك باعدارلامالارعا جالعاستى. مۇنداي شارالار اۋداندار مەن قالالاردا دا ۇيىمداستىرىلعان.

ەلىمىزگە دەپورتاتسييا جىلدارى كوشىپ كەلگەن تۇرلى ەتنوستاردىڭ قاتىسۋمەن وتكەن تاعىلىمدى شارالار بارىسىندا ق.ا.ياساۋي اتىنداعى حقتۋ مادەنيەت ورتالىعىنا جينالعان كوپشىلىك ار ۇلتتىڭ ۇلتتىق كيىمدەرىمەن جانە مادەني ومىرىمەن تانىستى.

ىس-شارا العىس ايتۋ كۇنىنە وراي ۇيىمداستىرىلعان دوڭگەلەك ۇستەلمەن جالعاستى.  وعان تۇركىستان وبلىسىنان سايلانعان قازاقستان حالقى اسسامبلەياسىنىڭ مۇشەلەرى, وبلىستىق ەتنومادەني بىرلەستىكتەر مەن ولاردىڭ جاستار قاناتى جەتەكشىلەرى, وبلىستىق قحا جانىنداعى قوعامدىق كەلىسىم, انالار كەڭەسى, عىلىمي-ساراپشىلىق توپ مۇشەلەرى مەن باق وكىلدەرى قاتىستى.

جيىندى اشقان تۇركىستان وبلىسى اكىمىنىڭ ورىنباسارى مالىك وتارباەۆ قاتىسۋشىلاردى مەرەكەمەن قۇتتىقتاپ, ماڭىزدىلىعىنا كەڭىنەن توقتالىپ وتتى.

– العىس ايتۋ كۇنىن تاريحقا تاعزىم ەتۋ كۇنى دەپ تۇسىنگەنىمىز جون – دەگەن مالىك نۇرجانۇلى تۇركىستان وبلىسىنان سايلانعان اسسامبلەيا مۇشەلەرىنە كۋالىكتەر تاپسىردى.

ەتنومادەني ورتالىق وكىلدەرى دەپورتاتسييا جىلدارى قولداۋ كورسەتىپ, قورعان بولعان قازاق حالقىنا العىس ايتتى.

وبلىستىق شەشەن-ينگۋش ەتنومادەني بىرلەستىگىنىڭ توراعاسى حاسان باتسيەۆ مەملەكەت پەن وڭىردىڭ دامۋى جولىندا ۇلەس قوساتىندىعىن جەتكىزسە, وبلىستىق تۇرىك ەتنومادەني بىرلەستىگى جانىنداعى انالار كەڭەسىنىڭ تورايىمى رەيحان الايبەكوۆا ەشۋاقىتتا قازاق حالقىنىڭ قامقورلىعى ۇمىتىلمايتىنىن ايتتى.

جيىن سوڭىندا دەپورتاتسييالىق ساياساتتىڭ سالدارى مەن كۇشتەپ قونىس اۋدارىلعان ازاماتتار تۋرالى ارنايى دايىندالعان بەينەروليك كورسەتىلدى. العىس ايتۋ كۇنىنە وراي ۇيىمداستىرىلعان شارالار بارىسىندا  ق.ا.ياساۋي اتىنداعى حقتۋ ستۋدەنتتەرىنىڭ اراسىندا  ەسسە جازۋ بايقاۋى, مەكتەپتەردە دەپورتاتسييا جىلدارى قازاقستانعا تاعدىر تالكەگىمەن قونىس اۋدارعان ەتنوس ۇرپاقتارىنىڭ قاتىسۋىمەن اشىق ساباقتار وتتى.

 

ۇلتتىق قولونەر – ۇلى مۇرا

ياساۋي كەسەنەسىنىڭ ىرگەسىندەگى «اربات» الاڭىندا «ۇلتتىق قولونەر – ۇلى مۇرا» اتتى قولونەر شەبەرلەرىنىڭ كورمەسى  وتتى. ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارى اياسىندا  ۇيىمداستىرىلعان ىس-شاراعا قاتىسۋشىلار «ۇلى دالانىڭ مۇراسى» اتتى قولونەر شەبەرلەرىنىڭ جارمەڭكەسىن تاماشالادى.

كورمەنىڭ باستى  ماقساتى –   ۇلتتىق قولونەردى دامىتۋ, قولونەر شەبەرلەرىنە قولداۋ كورسەتۋ, ولاردىڭ جاساعان بۇيىمدارىن حالىق اراسىندا كەڭىنەن ناسيحاتتاۋ, جاس ارى دارىندى  قولونەرشىلەردى انىقتاۋ. سونىمەن قاتار ايماقتا تۋريزمدى دامىتۋعا ىقپال ەتۋ. بابادان قالعان قولونەردى ۇرپاق ساناسىنا سىڭىرىپ, كاسىپ رەتىندە دامىتۋ.

مەرەكەنىڭ نەگىزگى بولىگى «ەسىمحان» الاڭىندا جالعاستى. وندا  «ۇلتتىق قولونەر» شەبەرلەرىنىڭ ەڭبەگىن سيپاتتايتىن بەينەروليك كوپشىلىك نازارىنا ۇسىنىلدى. ىس-شاراعا زييالى قاۋىم وكىلدەرى, ارداگەرلەر, باق وكىلدەرى, كورمە قوناقتارى مەن بارلىق اۋدان, قالادان  قولونەر شەبەرلەرى قاتىستى.

سالتاناتتى شارادا وبلىس اكىمىنىڭ ورىنباسارى ەربول سادىر جۇرتشىلىقتى العىس ايتۋ كۇنىمەن جانە قولونەر شەبەرلەرىنىڭ كورمەسىنىڭ اشىلۋىمەن قۇتتىقتادى

قولونەر كورمەسىندە زەرگەرلىك بۇيىمدار, كەراميكا, اعاش ويۋ, بىلعارىنى كوركەمدەپ وڭدەۋ, توقىما, كيىز باسۋ جانە وزگە دە سالالار بويىنشا ۇزدىك اتانعان شەبەرلەرگە ارنايى ديپلوم مەن  سىيلىقتار تاپسىرىلدى. كورمە سوڭى مەرەكەلىك كونتسەرتتىك باعدارلاماعا ۇلاستى.

تەلمان بەيسەنوۆ,
تۇركىستان وبلىسى

بولىسۋ: