بيۋدجەت قاراجاتى – ۇنەمى باقىلاۋدا

318
0
بولىسۋ:

قازاقستان پرەزيدەنتى نۇرسۇلتان نازارباەۆ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ تورايىمى ناتاليا گودۋنوۆانى قابىلدادى. كەزدەسۋ بارىسىندا مەملەكەت باسشىسىنا ەسەپ كوميتەتىنىڭ 2018 جىلى اتقارعان جۇمىستارىنىڭ قورىتىندىسى تۋرالى باياندالدى.

نۇرسۇلتان نازارباەۆ ەسەپ كو­ميتە­تىنىڭ تاراپىنان بيۋدجەت قارا­جاتىنا ۇنەمى باقىلاۋ جۇرگىزۋدىڭ جانە ونىڭ تيىمدى يگەرىلۋىنە مۇقييات تالداۋ جاساۋ­دىڭ ماڭىزدىلىعىن اتاپ وتتى.
– ەسەپ كوميتەتىنىڭ نەگىزگى مىندەتى – مەملەكەتتىك بيۋدجەتتىڭ تيىمدى جۇمسا­لۋىن قاداعالاۋ. سىزدەردىڭ الدارىڭىزدا باقى­لاۋ ىسىنەن اۋديتكە كوشۋگە بايلا­نىستى جاڭا مىندەتتەر تۇر, – دەدى ەلباسى.
ەسەپ كوميتەتىنىڭ تورايىمى رەسپۋب­ليكالىق بيۋدجەتتىڭ تيىمدى جۇمسالۋىنا اۋديت جۇرگىزۋ بارىسى جانە وسى سالاداعى الەمدىك تاجىريبەنى زەرتتەۋ ناتيجەلەرى جونىندە مالىمدەدى.
– تيىمدىلىك اۋديتىنە كوشۋ جۇمىس­تارىن جالعاستىرا بەرەمىز. بىلتىر جالپى سوماسى 430 ميلليارد تەڭگە قارا­جاتقا بايلانىستى تارتىپ بۇزۋشىلىق انىقتالدى. ەگەر بۋحگالتەرلىك ەسەپسىز ناقتى قارجىلىق تارتىپ بۇزۋشىلىقتى الساق, ونىڭ مولشەرى 16 ميلليارد تەڭ­گە­نى قۇراپ وتىر. بۇل كورسەتكىش 2017 جى­لى 70 ميلليارد تەڭگە بولعان ەدى. وسى­لايشا, قارجىلىق تارتىپتىڭ جاقسارا تۇسكەنى بايقالادى, – دەدى ن.گودۋنوۆا.
ەسەپ كوميتەتىنىڭ تورايىمى مەملە­كەت­تىك جانە سالالىق باعدارلامالار بيۋدجەتىنىڭ تيىمدىلىگىنە جۇرگىزىلگەن باعالاۋ ناتيجەلەرى جونىندە مالىمەت بەردى. سونداي-اق جالپى ەكونوميكالىق جانە قارجىلىق جوسپارلاۋ ساپاسىن ارتتىرۋ ۇشىن ۇكىمەتپەن بىرلەسىپ قابىل­داعان شارالار تۋرالى باياندادى.
كەزدەسۋ سوڭىندا مەملەكەت باس­شىسى ەسەپ كوميتەتىنە Nur Otan پار­تييا­سىنىڭ XVIII سەزىندە مالىمدەلگەن الەۋمەتتىك باعدارلامالار مەن باستا­مالاردىڭ جۇزەگە اسىرىلۋىنا تيىستى باقىلاۋ جاساۋدى تاپسىردى.

بولىسۋ: