ەركەبۇلان سەيداحمەت جاقىن كۇندەرى قازاقستاندىق كلۋبتىڭ جيىنىنا قوسىلادى

1073
0
بولىسۋ:

فۋتبولدان قازاقستان قۇراماسى مەن رەسەيلىك «ۋفا» كلۋبىنىڭ شابۋىلشىسى 19 جاستاعى ەركەبۇلان سەيداحمەت جۋىردا الماتىلىق «قايراتتىڭ» وقۋ-جاتتىعۋ جيىنىنا كەلمەك. بۇل تۋرالى سەنىمدى دەرەك كوزى حابارلاپ وتىر.

قازىر «قايرات» فۋتبولشىلارى الماتىداعى بازادا جاتتىعۋ جۇمىستارىن جۇرگىزىپ جاتىر. ال 3 ناۋرىز كۇنى ورتالىق ستاديوندا قازاقستان سۋپەركۋبوگى ۇشىن «استانامەن» كەزدەسەدى. ويىن 15:00-دە باستالادى.

بۇعان دەيىن «قايراتتىڭ» باقىلاۋشىلار كەڭەسىنىڭ توراعاسى قايرات بورانباەۆ «ۋفانىڭ» كيپردەگى وقۋ-جاتتىعۋ جيىنىنا بارىپ, كلۋب پرەزيدەنتى شاميل عازيزوۆپەن كەزدەسكەن. وسى ۋاقىتتا ەركەبۇلاننىڭ الماتىلىق كلۋب ساپىنا اۋىساتىنى تۋرالى اقپارات تاراعان.

ەسكە سالساق, ەركەبۇلان ماۋسىم ارالىق ۇزىلىس كەزىندە جاراقاتىنان ايىعىپ كومانداسىنىڭ جاتتىعۋ جۇمىستارىنا كىرىسكەن. الايدا جولداستىق كەزدەسۋلەردىڭ وزىندە نەگىزگى قۇرامنان ورىن تابا المادى.

كوپتەگەن رەسەيلىك ويىنشىلارمەن بىرگە جۇمىس ىستەيتىن تانىمال اگەنت الەكسەي سافونوۆتىڭ ايتۋىنشا, «ۋفاداعى» باسەكەلەستىك ەركەبۇلاننىڭ ەركىن ويناۋىنا مۇمكىندىك بەرمەگەن.

«مۇمكىن وعان كومانداداعى قىسىم اسەر ەتكەن بولار. ەركوش – تالانتتى ويىنشى, بىراق الى بالا. باسەكەگە توتەپ بەرە الماۋ كەز كەلگەن ورتادا بولادى. باۋىرجان يسلامحان دا «كۋبان» قاتارىندا وسىنداي جاعدايعا ۇشىراعان. «ۋفا» سيياقتى ۇجىمداردا باسەكەنىڭ جوعارى بولاتىنى تۇسىنىكتى. بىراق ەركەبۇلان ولاردىڭ دەڭگەيىنە ساي كەلمەيدى دەگەن سوز ەمەس. اركىمنىڭ وز جولى بار. ول قازاقستان قۇراماسىنىڭ دا نەگىزگى ويىنشىسى. سوندىقتان ەركەبۇلانعا تۇراقتى ويىن تاجىريبەسى كەرەك.

ەگەر ول وسى ويىنىنان جاڭىلماسا كەلەشەكتە تىپتى يسپانييادا ويناي الادى. ونىڭ كارەراسى ەندى باستالدى. العاشقى شەتەلدىك كلۋبتاعى ويىندارىنان تاجىريبە جينادى. ەندى سودان تيىستى قورىتىندى شىعارۋى كەرەك. مەنىڭشە, ەركەبۇلان يسپانييادا ويناپ كەتە الادى. سەبەبى, لا ليگا چەمپيوناتى ونىڭ ستيلىنە ساي كەلەدى» دەيدى اگەنت.

ەركەبۇلان سەيداحمەتتىڭ قازاقستان چەمپيوناتىنا اۋىساتىنى حابارلاندى

اباي قازبەكۇلى

بولىسۋ: