تامارا مەن دينارا مۋزەيدە گيد قىزمەتىن اتقاردى

1343
0
بولىسۋ:

قازاقستان رەسپۋبليكاسى ۇلتتىق مۋزەيىنىڭ 5 جىلدىعىنا جانە دۇنيەجۇزىلىك ەكسكۋرسييا جۇرگىزۋشىلەر كۇنىنە وراي «جۇلدىزدى گيد» شوۋ-باعدارلاماسى ۇيىمداستىرىلدى.

جوبانىڭ نەگىزگى ماقساتى – مۋزەي قوناقتارىنا مىڭجىلدىق تاريحىمىز بەن مادەنيەتىمىزدى ناسيحاتتاۋ. جۇلدىزدى توپتىڭ مۇشەلەرى مۋزەي زالدارىن وزارا بولىسىپ الىپ, كەلۋشىلەرگە حالقىمىزدىڭ كونە تاريحى مەن باي مۇراسى تۋرالى مالىمەت بەردى.
ۇلتتىق مۋزەيدىڭ 5 جىلدىق مەرەيتويىنا وراي ۇيىمداستىرىلعان بۇل جوباعا قازاقستان رەسپۋبليكاسىنىڭ ەڭبەك سىڭىرگەن قايراتكەرى لەيلا بەكنازار-حانينگا, تانىمال انشى تامارا اسار, «Astana opera» مەملەكەتتىك وپەرا جانە بالەت تەاترىنىڭ جەتەكشى سوليسى سۇندەت بايعوجين جانە بەلگىلى تەلەجۋرناليستەر ماييا بەكباەۆا مەن دينارا ساتجان قاتىستى.


بۇگىن – حالىقارالىق ەكسكۋرسييا جۇرگىزۋشىلەر كۇنى. قوعامنىڭ قاسيەتتى قازىناسى – مادەنيەت, ال مادەنيەتتىڭ مايەگى – مۋزەي. بۇگىن ۇلتتىق مۋزەي داستۇرلى قىزمەت كورسەتۋمەن شەكتەلمەي, مادەني-اعارتۋ, عىلىمي-ادىستەمەلىك جۇمىستاردىڭ قايناعان ورتاسىنا اينالدى. «جۇلدىزدى گيد» جوباسى ەكسكۋرسييا جۇرگىزۋشىلەر كۇنىنە ارنالعان. بۇل شارا مۋزەي تاريحىنداعى ەستە قالارلىقتاي ماڭىزدى جوبالاردىڭ بىرى.  بىز ۇشىن سان مىڭداعان جىلداردان تارالاتىن تاريحىمىزدى سارالاپ, وتكەنىمىزدى قۇرمەتتەۋ ۇشىن بۇل جوبانىڭ ورنى بولەك, – دەدى ۇلتتىق مۋزەي ديرەكتورىنىڭ مىندەتىن اتقارۋشى اباي ساتۋبالدين.
ەكسكۋرسييا جۇرگىزۋشىلەردىڭ ەڭبەگى اينالاسىنا جىلى ەموتسييا مەن جارقىن قۋانىش سىيلاپ, جاس ۇرپاققا مادەني-رۋحاني تاربيە بەرۋدى قالىپتاستىرۋعا ىقپال جاسايتىن اعارتۋشىلىق قىزمەتتىڭ اجىراماس بولىگىن قۇرايدى. ەل ەكونوميكاسىن دامىتۋداعى تۋريزمنىڭ رولى وسكەن سايىن مۋزەيلەردىڭ دە ماڭىزى ارتا تۇسەدى. قازاقستان تۋرالى العاشقى كوزقاراستىڭ دۇرىس قالىپتاسۋى كوپ جاعدايدا ەلىمىزدىڭ داستۇرى مەن فولكلورى, مادەنيەتى مەن تاريحى تۋرالى اڭگىمەلەيتىن وسى مامان يەلەرىنە بايلانىستى ەكەنى انىق.

 تامارا اسار,
فيلوسوفييا عىلىمدارىنىڭ دوكتورى, پسيحولوگ, انشى:
بىزدىڭ اتادان بالاعا تاريح بولىپ, مۇرا بولىپ بەرىلەتىن مۇنداي قازىنا ورىندارى مىندەتتى تۇردە ادەمى مارتەبەگە يە بولۋ كەرەك. ۇلتتىق مۋزەيدىڭ استانا جۇرەگىندە ورنالاسقانىنا 5 جىل تولعان تويى قۇتتى بولسىن! تاي-تاي باسىپ, جىگىت بولىپ, ۇلكەن اقساقال قاريياعا اينالىپ, بولاشاق ۇرپاقتىڭ اسىل مۇراسىنا اينالسىن! ۇلتتىق مۋزەيدىڭ بىر مەرەكەسىنىڭ كۋاگەرى بولۋ – مەن ۇشىن ۇلكەن مارتەبە. قۇرمەتتى اعايىن, قۇرمەتتى دوستار! قۇلاعىڭىزدى تۇرىپ, جۇرەگىڭىزدى اشىپ, وز ۇلتىمىزدىڭ قازىنا بايلىعىن قابىل الۋعا دايىن بولىڭىزدار.

قازاقستان رەسپۋبليكاسى ۇلتتىق مۋزەيى حالىقارالىق ەكسكۋرسييا جۇرگىزۋشىلەر كۇنى قالا تۇرعىندارى مەن قوناقتارى ۇشىن وز ەسىگىن ايقارا اشتى. ۇلتتىق مۋزەيدىڭ ۇزدىك جوباسى – «جۇلدىزدى گيد» شوۋ-باعدارلاماسىن اسىعا كۇتىپ جۇرگەن اعايىندى ونەر جۇلدىزدارى قارسى الىپ, مۋزەيدىڭ تۇرلى زالدارىندا ەكسكۋرسييا جۇرگىزدى. تورت جىل بۇرىن قولعا الىنعان بۇل جوبا كوپشىلىكتەن قولداۋ تاۋىپ, جىل سايىن ۇيىمداستىرىلاتىن مەرەكەلىك شاراعا اينالدى.


جوبانىڭ العاشقى شىمىلدىعىن – قاراقات ابىلدينا, مارجان اراپباەۆا, كلارا تولەنباەۆا, قۇرماش ماقانوۆ, گۇلنۇر ورازىمبەتوۆا, دوسىمجان تاڭاتاروۆ جانە اقىن قالقامان سارين سەكىلدى بەلگىلى ونەر قايراتكەرلەرى اشقان بولاتىن.

ا.احمەتقازى.
فوتو: سوۆەتبەك ماعزۇموۆ

بولىسۋ: