بالاباقشا تاربيەشىسى مۇعالىم دارەجەسىنە جەتكىزىلەدى

2285
0
بولىسۋ:

بىرىنشى سىنىپ باعدارلاماسىنىڭ بىر بولىگى  0-سىنىپ باعدارلاماسىنا اۋىسادى. وسىلايشا ساندار مەن الىپبيدى «نولەبايدا» وقيمىز. 0-سىنىپتى بالاباقشادا وقىتاتىن تاربيەشىلەردىڭ دارەجەسى باستاۋىش سىنىپ مۇعالىمدەرىنىڭ دارەجەسىنە  جەتكىزىلەدى. بۇل تۋرالى  بىلىم جانە عىلىم مينيسترلىگىنىڭ باسپاسوز قىزمەتى حابارلادى.

اتالعان مينيسترلىكتىڭ مەكتەپكە دەيىنگى جانە ورتا بىلىم دەپارتامەنتى حابارلاۋىنشا, 0-سىنىپ وقۋلىقتارىن ەنگىزۋ 2020 وقۋ جىلىنىڭ قىركۇيەگىنە جوسپارلانىپ وتىر.
«بۇگىندە 0-سىنىپ – بالاباقشاداعى دايارلىق توبى. ەگەر مەكتەپتىڭ وز عيماراتىندا 0-شى سىنىپ ۇيىمداستىرۋعا مۇمكىندىگى بولسا, وعان تولىقتاي قۇقى بار. 0-سىنىپتى ەنگىزۋ قۇقىنان بالاباقشالاردى ەشكىم ايىرعان جوق. وسىلايشا 2020 جىلى ەلىمىز بويىنشا بارلىق مەكتەپ مەن بالاباقشادا 0-سىنىپتار اشىلادى. قولدانىستاعى بىلىم تۋرالى زاڭنامادا بالالاردى 6 جاستان 1-سىنىپقا بارۋعا مىندەتتەيتىن نورما بار. زاڭنىڭ اتالمىش نورماسىنا وزگەرىس ەنگىزىلەدى», – دەيدى دەپارتامەنت وكىلدەرى.
ول قانداي وزگەرىس, 2019 جىلى, بىلتىرعىداي, 1 قىركۇيەكتە تولىق 6 جاسقا تولاتىن بالالار 1-سىنىپقا بارا الادى. 1 قىركۇيەككە دەيىن 6 جاسقا تولماعان بالالار اتا-انانىڭ قالاۋىمەن مەكتەپكە بارا الادى نەمەسە بالاباقشادا قالۋىنا بولادى. 7 جاسار بالالار دا بىرىنشى سىنىپقا قابىلدانادى. ەگەر بالا مەكتەپالدى دايارلىق سىنىبىنىڭ باعدارلاماسىن بالاباقشادا مەڭگەرسە, مەكتەپتە ونى قايتا وقي المايتىنىن جانە 1-سىنىپقا بارۋى كەرەگى ەسكەرىلەدى.

تۇمار مىرزا

بولىسۋ: