باعالاساڭ, ۇستازداردى باعالا…

964
0
بولىسۋ:

مۇعالىمدەر ۇشىن جاڭارتىلعان بىلىم بەرۋ باعدارلاماسىن جۇزەگە اسىرۋدىڭ ماڭىزى ەرەكشە. اسىرەسە, ماماندار مۇعالىمدەردىڭ بىلىگىن ارتتىرۋ كۋرستارىندا ولارعا قويىلعان تالاپتاردى تۇسىنىپ, پەداگوگي­كالىق تاسىلدەر مەن نەگىزگى تاقىرىپتاردى جۇزەگە اسىرۋ جولدارىن بىلۋى قاجەت. وقۋشىعا بىلىم نارىن سەبەتىن قادىرلى ماماندىق يەلەرى شاكىرتىنىڭ قالاي وقيتىنىن جاقسى تۇسىنىپ, وزدەرىنىڭ وقىتۋ تاجىريبەسىن جاقسارتقان سايىن, ولاردىڭ بالالاردى تيىمدى وقۋعا جەتەلەۋ قابىلەتى سوعۇرلىم ارتا تۇسپەك. ماڭعىستاۋ وبلىسىندا جىل سايىن داستۇرلى تۇردە وتكىزىلەتىن «بىلىم ۇزدىگى» بايقاۋى – وسىنداي يگى ىستەردىڭ باستاماسى. 

ەلباسى ن.نازارباەۆتىڭ «تور­تىنشى ونەركاسىپتىك رەۆو­ليۋ­تسييا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولدا­ۋىندا پەداگوگتار الدىندا بىلىم بەرۋ مەن عىلىمدى دامىتۋ بويىنشا ناقتى مىندەتتەر قويىلعانى بەلگىلى. پەداگوگ­تاردىڭ بەدەلىن ارتتىرۋ, ۇزدىك پەداگوگتار مەن بىلىم بەرۋ ۇيىم­دارىن ناسيحاتتاۋ, ۇستاز­دار­دىڭ جەكە جانە كاسىبي بىلىكتىلىگىن ارتتىرۋ ماقساتىندا وتكىزىلەتىن بۇل بايقاۋ العاش رەت 2017 جىلى وتتى. جىل سايىن ۇستازدار كۇنىنە ارنالعان سال­تا­ناتتى جينالىستا وسى باي­قاۋدىڭ جەڭىمپازدارى انىق­تالادى.
اتالعان كونكۋرس بويىنشا 2017 جىلى 10 اتالىمعا 500 مىڭ تەڭگەدەن, 5 ۇزدىك ۇيىم نومي­ناتسيياسى مەن «جىل مۇعالىمى» نوميناتسيياسىنا 1 ملن تەڭگەدەن قارجىلاي سىيلىقتار مەن ديپ­لومدار تابىستالدى. ال بىلتىر بۇل بايگەگە بولىنگەن قارجى كوبەيىپ, 13 نوميناتسييا بويىن­شا 500 مىڭ تەڭگە, «جىل مۇعا­لىمى» نوميناتسيياسىنا جانە 5 بىلىم ۇيىمىنا 1 ميلليون تەڭگە­دەن سىياقى تاعايىندالدى.
«كونكۋرسقا ەكى جىلدا 264 پەداگوگ جانە 53 بىلىم بەرۋ ۇيىمى قۇجاتتارىن ۇسىندى. وبلىس اكىمى جانىنداعى ساراپ­تاۋ كوميسسيياسى مۇشەلەرىنىڭ شەشىمىمەن جەڭىمپازدار انىق­تالدى. مىقتى مۇعالىم وزىق وقۋشىلاردى قالىپ­تاستىرادى. ىقىلاس-ىنتامەن ۇيرەتىلگەن ىلىم مەن بىلىم – ارقاشان جۇ­عىم­دى, ۇعىمدى. رۋحى بيىك, جى­­گەرى تاسىپ تۇرعان ۇستازدى «كە­مەل ۇستاز» دەيدى. ۇستاز
بولۋ – ۇلاعاتتى جولعا قادام باسۋ. الدىنداعى شاكىرتكە بىلىم بەرىپ قانا قويماي, بار بىلگەنىن بويىنا سىڭىرىپ, بولاشاققا باعىت-باعدار سىلتەيتىن بۇل جول­داعى جاندار عاجاپ-اق. بىزدىڭ نەگىزگى ماقساتىمىز دا سول – ۇستازدارعا دەمەۋ بەرۋ. ەڭ العاش بۇل بايقاۋدىڭ جەڭىمپازى تۇپقاراعان اۋدانى اقشۇقىر مەكتەپ-ليتسەيىنىڭ تاريح پانى­نىڭ مۇعالىمى باۋىرجان ايمانوۆ اتانسا, بىلتىر اعىلشىن تىلى پانىنىڭ مۇعالىمى, جاڭاوزەندىك زليحا رامەتۋللا توپ جاردى. قازىرگى بىلىم بەرۋ جۇيەسىنىڭ ماقساتى باسەكەگە قابىلەتتى مامان دايارلاۋ بولسا, ونداعى پەداگوگتاردىڭ اتقاراتىن ۇلەسىنىڭ ماڭىزىن ەسكەرۋ قاجەت دەپ ەسەپتەيمىن», – دەيدى ما­ڭ­عىس­تاۋ وبلىستىق بىلىم باسقار­­ما­سى­نىڭ باسشىسى اسقار سەيداليەۆ.
العاشقى جەڭىمپاز باۋىر­جان ايمانوۆ بولسا: «مەكتەپ­تەگى بىلىم بەرگەن ۇستازدارىمنىڭ ارقاسى, ۇجىمداعى ارىپتەس­تەرىم­نىڭ قولداۋىمەن, بىلىم باسقارمالارىنىڭ قولداۋىمەن وقۋ­شىلاردى وبلىستىق, رەس­پۋب­ليكالىق, حالىقارالىق دەڭگەيدەگى ارتۇرلى پاندىك وليم­پيادا مەن عىلىمي جۇمىستارعا قاتىستىرا وتىرىپ, بۇگىنگى مارا­پاتقا جەتۋىمنىڭ دە سول وقۋ­شى­لارىمنىڭ جەتىستىگىنىڭ ارقاسى دەپ بىلەمىن», – دەيدى.
ۇستازىن قادىرلەگەن ايماق بىلىم سالاسىندا تولاعاي تابىس­تارعا جەتىپ, ار جىلدى زور جەتىس­تىكپەن اياقتايدى. بۇگىندە وبلىستىڭ بىلىم سالاسىندا اۋ­قىم­دى شارالار جۇزەگە اسى­رىلىپ جاتىر. بىر جىلدىڭ وزىندە وب­لىس­تا 9 مەكتەپ, 36 بالاباقشا جانە كوللەدج ستۋ­دەنتتەرىنە ار­نالعان 1 جاتاق­حانا ىسكە قوسى­لىپ, حالىقتىڭ يگىلىگىنە بەرىلدى.
ايتا كەتۋ كەرەك, ايماق باسشى­سىنىڭ جۇلدەسى وڭىردەگى ۇزدىك بالاباقشا, مەكتەپ, پەن كاسىپتىك بىلىم بەرۋ ۇيىمدارىنا دا تابىستالدى. وسىعان قاراپ مۇنايلى وڭىردەگى بىلىم بەرۋ سالاسىن دامىتۋعا باسا كوڭىل بولىنىپ وتىرعانىن اڭعارۋ قيىن ەمەس. قولعا الىنعان تىڭ جوبالاردىڭ ىشىندە «جاسىل مەكتەبىم – جاسىل مەكەنىم» دە بار. «رۋحاني جاڭعىرۋ» باعدار­لاماسى اياسىندا ۇيىم­داس­تىرىلعان شارا وبلىستا تۇڭعىش رەت وتكىزىلىپ وتىر. جوبا اياسىن­دا كەزەڭ-كەزەڭىمەن بار­لىق مەكتەپتەردە جىلى­جايلار سالى­نىپ, مەكتەپ اۋلالارى كوگالداندىرىلادى. ايماقتىڭ كليماتتىق ەرەكشە­لىگىنە باي­لانىستى قولعا الى­نىپ وتىرعان بۇل جوبا مەتسە­ناتتار تاراپىنان قولداۋ تاپ­قان. سونداي-اق «تسيفرلى قازاق­­ستان» باع­دارلاماسى ايا­سىن­دا مەكتەپتەر 90 پايىز كەڭ­جولاقتى ينتەرنەت جەلىسى­مەن قامتاماسىز ەتىلگەن. مينيستر­لىك تاراپىنان 600-دەن استام مۇعالىم اعىلشىن تىلى كۋرستارى­نان وتىپ, جەرگىلىكتى بيۋدجەت قار­جى­سىنا 300 اۋىل مۇعالىمى اعىل­شىن تىلىن مەڭ­گەرۋدە. قاڭ­تار ايىنان باستاپ وقۋشىلارعا كاسىبىن اشۋدى ۇيرەتۋ ماق­سا­تىندا وبلىستىڭ 30 مەك­تە­بىندە كاسىپكەرلىك نەگىزدەرى جاڭا جوباسى دا باستا­لىپ كەتتى.

اقبوتا الىم

بولىسۋ: